Loma 12 - KNTP

Bwikalo bwa mu mwingilo wa Lesa

¹ Byonkabyo anweba bakwetu, ne musashijila na bya lusa lwa Lesa, namba mulambule mibiji yenu, ke kitapisho kyumi, kyazhila, kyaitabilwa kwi Lesa, kokunemeka Lesa kwenu kwa mu muchima.

² Kabiji kechi mwipashang'anyenga na ba pano pantanda ne, poso mwalulukenga ke bangi na kusangulwa kwa michima yenu, namba mukayukenga kyaswa muchima wa Lesa, akya kyawama ne kyaitabilwa ne kyalumbuluka.

³ Mambo amiwa naambila monka mwayila bupe bonapewa ku bonse ba mwi anweba. Namba kechi mwilanguluke kukilapo pomwafwainwa kwilangulukila ne. Poso mulangulukenga byonka byafwainwa kulanguluka, monka mo emupimina Lesa pa muntu pa muntu kipimo kya lwitabilo.

⁴ Mambo byonka byo tuji na bya mubiji byavula mu mubiji umo, ne byonse kechi biji na mwingilo umotu ne.

⁵ Byonkabyo ne atweba, nangwa twavula, twi mubiji umo mwi Kilishitu, ne pa muntu pa muntu, bonse twi bamo.

⁶ Kasa tuji na bya bupe bya pusanapusana monka mwayila bupe botwapewa, nangwa bungauzhi, twaule monka mwayila kipimo kya lwitabilo lwetu;

⁷ nangwa mwingilo wa bukwasho, tuteshe muchima monka mu mwingilo wetu; aye ufunjisha naye ateshe muchima monka mu kufunjisha kwanji;

⁸ nangwa utundaika na byambo, naye ateshe muchima mu kutundaika kwanji. Aye upana na kukwasha bakwabo, apanetu na muchima yense; aye ulama bantu, naye ateshekotu muchima; aye uba lusa, naye obe lusa na lusekelo.

⁹ Butemwe bwikale bwa kubula bujimbijimbi. Shikwai byatama, kakachilai kyawama.

¹⁰ Mu butemwe bwa balongo kasa mwitemwisha na lusa anweba bene na bene, mu buneme namo kasa mwinemeka anweba bene na bene.

¹¹ Kechi mube mukose pafwainwa kuuba lupata ne, mwikale na muchima walupata, ingijilai Nkambo.

¹² Sekelai mu luketekelo, tekanyai mu bya malwa, kasa mukelwa mu milombelo.

¹³ Panai ku bazhijikwa bakajilwa kabiji ikalai na muchima wa kutambwila benyi.

¹⁴ Bapeshai bemumanyika, peshai, kufing'ang'ana ne.

¹⁵ Sekelai na boba babena kusekela, jilai na boba babena kujila.

¹⁶ Ikalai na muchima umo anweba bene na bene. Kechi muteshe michima yenu ku bya kwitumbijika ne, swai kutambula mingilo yasulwa. Kechi mwilanguluke anweba bene amba mwi bamaana ne.

¹⁷ Kechi mushinkanye kibi na kibi kikwabo nangwa na muntu umo ne. Langulukilai jimo bintu bikawama ku meso a bantu bonse.

¹⁸ Umvwe kyakonsheka kubiwa, monka mwayila bulume bwenu, mwikale mu mutende na bantu bonse.

¹⁹ Anweba batemwe, kechi mushinkanye ne, bino lekai bukaji bwa Lesa bwingile. Mambo kyanembwa amba, “Kushinkanya ko kwami, amiwa yami nkashinkanya, byo byaamba Nkambo.”

²⁰ Bino “umvwe mulwanyi wobe wafwa nzala, umujishe; umvwe wafwa kilaka, mupe bya kutoma. Mambo pakuba bibye wauba nobe wabiika makala pa mutwe wanji.”

²¹ Kechi mushindwe na bubi ne, poso mushinde bubi na byawama.