Loma 11 - KNTP

Lusa lwa Lesa pa bena Isalela

¹ Naipuzha namba, aye Lesa wibataya bantu banji nyi? Ine kabiji akyo ne! Mambo ne amiwa mwine ne mwina Isalela, wa munkunwa ya Abulahama, ne wa mu mukoka wa Benjamina.

² Aye Lesa kechi wataya bantu banji boayukijile jimo ne. Mambo kechi mwayuka byaamba kinembelo byo kyaamba mambo a Elaija nyi? Byoebemejileko bena Isalela kwi aye Lesa amba,

³ “Nkambo, baipaya bangauzhi benu, bebikundwila panshi byenu byakusokelapo bitapisho, ne amiwa nashalatu bunke, kabiji babena kusaka ne mweo wami.”

⁴ Bino Lesa pa kumukumbula wa ambile amba ka? Amba, “Nelamina amiwa mwine bantu biumbi bitanu na bibiji, bonka babula kufukamina Baela.”

⁵ Byonkabyo ne mu kyo kino kimye nakyo po baji bamo bashalapo monka mwayila kusalulwila jimo kwa bupe.

⁶ Bino umvwe kyokya mu bupe, nanchi kechi kya mu mingilo ne. Inge kechi imomo ne, inge bupe pano kechi bo bupe ne.

⁷ Pano nanchi kiji byepi? Akya kyo bakebelenga bena Isalela kechi bekimwene ne. Pakuba basalululwa bo bekimwene. Bino bakwabo bakoseshiwe michima.

⁸ Monka mo kyanembelwa amba, “Lesa wibapele muchima watulo, ne meso abula kumona, ne matwi nao abula kumvwa kufika ne leelo jino.”

⁹ Kabiji ne Davida amba, “Lekai tebulu wabo aluke ke kakose, ne kijiba, ne kya kwituntulako, ne kya kwibamanyika.

¹⁰ Lekai pa meso paabo pafiite, babule kumona; ne misana yabo mwiibandamike myaka yonse.”

¹¹ Pano amiwa naipuzha namba, betuntwile mukuuba amba baponejijiletu nyi? Ine kabiji, akyo ne! Nanchi mu kupona kwabo momo lwaishila lupulukilo ku Bangentila, amba bebobishe bena Isalela kichima.

¹² Pano umvwe kupona kwabo kwalumbulula kushukwa kwa ba pano pantanda, kabiji inge kukankalwa kwabo kwaleeta jishuko ku Bangentila. Nanchi kulubulwa kwabo kukakijishatu kwibashukisha Bangentila!

Lupulukilo lwa Bangentila

¹³ Pano amiwa mbena kwamba kwi anweba Bangentila. Byonji mutumwa ku Bangentila, natumbijika mwingilo wami.

¹⁴ Namba nangwa na kya byepi, nebobishe kichima balongo bami Bayudea, ne kupulushapo bamo mwi abo.

¹⁵ Mambo umvwe kutayiwa kwabo ko kwalengela kwibapwanya ba pano pantanda, nanchi kutambulwa kwabo jibiji ku kalumbululaka, kechi kikekala nobe bumi bwafuma mu bafu nenyi?

¹⁶ Pakuba umvwe wa nsomo wazhila, abyo ne mushinshi yense naye wazhila; kabiji umvwe muzhazhi wazhila, abyo ne misampi nayo pamotu yazhila.

¹⁷ Bino umvwe misampi imo beichimunako, kabiji obewa byo uji kichi kya olivi kya mungye, ba kusokankanyamo mwi ayo kabiji pano ke uji wa kwabana nayo mema afuma mu muzhazhi wa kichi kine kya olivi.

¹⁸ Kechi witote na misampi iine ne. Bino umvwe witota, vuluka amba, kechi obewa ulama muzhazhi ne, poso muzhazhi ye ukulama obewa.

¹⁹ Ponkapo obewa ukamba amba, “Misampi beichimwineko, pakuba amba bansokankanyemo.”

²⁰ Ee, ibyo, byonkabyo beichimwineko na mambo a milengulwila yabo, bino obewa wakoselamo mambo onka a lwitabilo lobe. Byonkabyo kechi witote ne; wikale na moyo.

²¹ Mambo umvwe Lesa kechi walekele kwiichibako misampi iine ne, ne obewa kechi ukakuleka ne.

²² Nanchi akitala ku lusa ne ku kushinta kwa Lesa. Kwi boba baponene, kushinta kwamwekele; pakuba kwi obewa lusa lwa Lesa lolwamweka, umvwe ukelwe mu lusa lwanji. Umvwe ne, ne obewa baka kuchibako.

²³ Kabiji ne abo nabo, umvwe ne kutwajijila mu milengulwila yabo ne, bakebasokankanyamo jibiji; mambo aye Lesa wakonsha kwibasokankanyamo jibiji.

²⁴ Mambo umvwe obewa bakuchibile ku kichi kya olivi kya mungye, kabiji ba kusokankanyamo mu kichi kya olivi kya kujimba, mwabula kufwainwa kuuba; kabiji ino, byo iji misampi ine, kechi ikakijishepo kwiisokankanyamo mu kichi kyayo ayo ine nenyi?

Lusa lwa Lesa pa bantu bonse

²⁵ Anweba bakwetu, kechi nasaka namba mulube kino kyafyamika ne, kuchiina amba mwaketota mu maana enu anweba bene. Namba kukosa kwa michima ya bena Isalela bamo kwibaponena, poso kuvula kwa Bangentila kukafike.

²⁶ Kabiji byonkabyo bena Isalela bonse bakapuluka. Monka mo kyanembelwa amba, “Mu Ziona mukafuma Mupokolweshi; Aye ukafumyamo bumbulwa kwakamwa Lesa mwi Yakoba.

²⁷ Kabiji luno lo lulayang'ano lwami naabo, byo nkebafumya mambo abo.”

²⁸ Mwayila ano Mambo Awama, bo balwanyi ba Lesa na mambo a anweba. Bino na mambo a kusalulwilwa jimo, bo batemwe banji na mambo a bashakulu babo.

²⁹ Mambo bya bupe ne lwito lwa Lesa kechi byakonsheka kwalululwa ne.

³⁰ Anweba byonka byo mwalengulwile Lesa mu kimye kya kala, pakuba pano mwaubilwa lusa na mambo a milengulwila yabo.

³¹ Byonkabyo ne abo nabo pano balengulula amba ne abo nabo bobilwe pano lusa na mambo anweba mwaubilwa lusa.

³² Mambo Lesa wibashinkila bonse mu milengulwila, amba, nkebobile lusa bonse.

³³ Mama! Byo bwazhika bunonshi, ne maana, ne kuyukisha kwa Lesa! Ne bunchiba mambo bwanji byo bwabula kukonsheka kuyukanyikwa, ne mashinda anji nao byo abula kukonsheka kwialondalonda!

³⁴ “Mambo ng'anyi wayuka biji mu muchima wa Nkambo? Nangwa ng'anyi wamubujile maana?”

³⁵ “Nangwa ng'anyi wajinga mutanshi kumupa kintu amba akambwezhezhe?”

³⁶ Mambo byonse bifuma mwi aye, kabiji byalengelwe kwi aye, ne kwikala byamwikajila aye yenka. Lukumo lwikale kwi aye myaka ne myaka! Amena.