Loma 10 - KNTP

¹ Anweba bakwetu, kyo nasakisha mu muchima wami ne kyo nebalombelela kwi Lesa, kyokya kuuba namba bapuluke!

² Amiwa nebashimuna namba baji nalupata lwa kusaka Lesa, bino kechi mwayila maana ne.

³ Mambo byo babula kuyuka bololoke bufuma kwi Lesa, ne kukeba kwimika bwabo abo bene, kechi bakookela bololoke bwa Lesa ne.

⁴ Mambo Kilishitu yo mpelo ya Mizhilo pakuba amba, bonse baitabila bamone bololoke.

Lupulukilo lwa bantu bonse

⁵ Mambo Mosesa wanemba na mambo a bololoke bwaimana pa Mizhilo amba, “Awa muntu uba byaoloka byatongola Mizhilo ukamwenamo bumi.”

⁶ Pakuba bololoke bwa mu lwitabilo bwa amba amba, “Kechi wambe mu muchima wobe amba, ng'anyi ukakanjila mwiulu?” (Ko kuuba amba, na kumwikizha Kilishitu panshi).

⁷ “Nangwa amba, ng'anyi ukekila mu kalengwa?” (Ko kuuba amba, na kumufumya Kilishitu mu bafu).

⁸ Kine kyo bwa amba ke kino amba, “Byambo uji nabyo pa bwipi, monka mu kanwa kobe, ne mu muchima wobe,” o mambo a lwitabilo otusapwila.

⁹ Pakuba umvwe witabe pa kanwa kobe amba, Yesu ye Nkambo, ne kwitabila mu muchima wobe amba, Lesa wamusangwile mu bafu, ukapuluka.

¹⁰ Mambo na muchima muntu witabila ne kumona bololoke; kabiji na kanwa nako witabila ne kumona lupulukilo.

¹¹ Mambo kinembelo kyaamba amba, “Bonse bamwitabila kechi bakamona bumvu ne.”

¹² Mambo Bayudea ne Bagiliki kechi bapusana ne; mambo Nkambo umo ye Nkambo wa bonse, kabiji Aye wibapesha bonse bamwita.

¹³ Mambo, “Bonse bakeeta pa jizhina ja Nkambo bakapuluka.”

¹⁴ Lelo bakamwita byepi ye babula kwitabila? Kabiji bakamwitabila byepi ye babula kumvwa? Kabiji bakomvwa byepi kwakubula musapwishi?

¹⁵ Kabiji bakasapwila byepi kwakubula kwibatuma? Monka mo kyanembelwa amba, “Byo auba buuya maulu aboba basapwila Mambo Awama!”

¹⁶ Bino bonse kechi bakookela Mambo Awama ne. Mambo Isaya wa amba amba, “Nkambo, ng'anyi waitaba kusapwila kwetu?”

¹⁷ Byonkabyo lwitabilo lwiya pakumvwa, kabiji kumvwa nako kwiya na byambo bya Kilishitu.

¹⁸ Bino amiwa naipuzha namba, nanchi kechi ba umvwine nenyi? Ee, kine ba umvwine, “Jiwi jabo jakumbana pano pantanda ponse, ne byambo byabo nabyo byafika ne kwapela ntanda.”

¹⁹ Bino amiwa naipuzha jibiji namba, bena Isalela kechi ba umvwine nenyi? Patanshi aye Mosesa amba, “Amiwa nkemubisha kichima na bantu babula mukoka. Kabiji na mukoka wabula maana nkemuzhingijisha.”

²⁰ Byonkabyo ne Isaya naye wa ambishatu na kuchinchika amba, “Natanwa na aba babujile kunkeba; Nemwesha kuboba babujile kunkeba.”

²¹ Pakuba kubena Isalela aye amba, “Juba jonsetu natambika maboko ami ku bantu bamilengulwila ne ba lupata.”