Loma 1 - KNTP

¹ Paulo, kalume wa Yesu Kilishitu, waitwa amba ekale mutumwa wapatwilwa Mambo Awama a Lesa.

² Mambo Awama o alayile aye Lesa kala mu bangauzhi banji, mu binembelo byazhila.

³ A mwananji wasemenwe ku lukunwa wa Davida mwayila bumuntu,

⁴ kabiji watongwelwe na bulume monka mu lusanguko lwa mu bafu amba ye Mwana Lesa, mwayila Mupashi wa buzhile, aye Yesu Kilishitu Nkambo yetu.

⁵ Kupichila mwi aye mo mo twatambwijile bupe ne butumwa, amba ba mu mikoka yonse ya bantu bakookele byambo bya lwitabilo na mambo a jizhina janji.

⁶ Mwi abo mo muji ne anweba baitwa amba, mwikale ke ba kwa Yesu Kilishitu.

⁷ Ku bonse baji mu Loma, bo batemwa kwi Lesa kabiji baitwa amba bekale ke bazhijikwa. Bupe bwikale ne anweba ne mutende bifuma kwi Lesa Taata ne kwi Nkambo Yesu Kilishitu.

Milombelo ya kusanta

⁸ Patanshi, napika sante kwi Lesa wami mwi Yesu Kilishitu na mambo a anweba bonse, mambo lwitabilo lwenu lwaya nkuwa pano pantanda ponse.

⁹ Mambo Lesa ye kamonyi wami, ye mbena kwingijila na mupashi wami mu Mambo Awama a Mwananji, byo mbula kuzhikilwa kwi muvuluka

¹⁰ bimye byonse mu milombelo yami. Kasa ndomba, namba kana kampe pano nkashukwa mu kyaswa muchima wa Lesa kwiya ko muji.

¹¹ Mambo nasakishatu kwimumona, namba nemupe kya bupe kya bumupashi kya kwimukosesha.

¹² Ko kuuba amba, anweba ne amiwa bonse twitundaike atweba bene na bene, bonse na lwitabilo lwenu ne lwami pamo.

¹³ Anweba bakwetu, nasaka namba muyuke amba nafukwile javula kwiya ko muji, bino ko biji bimo byankayinye kwiya. Pakuba amba ngitabizhepo bamo ba mwi anweba byonka byo nsapwila mu Bangentila.

¹⁴ Amiwa naswikwa na mwingilo ku bantu bonse, ku Bagiliki ne ku bantu bakwabo, kabiji ne ku bamaana ne ku babulao.

¹⁵ Onkao mambo, amiwa mwine nasakishatu kusapwila Mambo Awama ne kwi anweba muji mu Loma.

Bulume bwa Mambo Awama

¹⁶ Mambo amiwa kechi neobila bumvu Mambo Awama ne; mambo bo bulume bwa Lesa buleta lupulukilo ku bonse baitabila, kutatwila ku Bayudea kabiji ne ku Bagiliki nabo pamo.

¹⁷ Mambo mo mumwekela bololoke bwa Lesa bwa mu lwitabilo ku lwitabilo, monka mo kyanembelwa amba, “Mololoke ukamwena bumi ku lwitabilo.”

Kuzhatwa kwa bantu

¹⁸ Mambo bukaji bwa Lesa bwamweka kufuma mwiulu, bwibumwekela bumbulwa kwakamwa Lesa ne bumbulwa koloka bonse bwa bantu, bavulang'anya bukine na bumbulwa koloka.

¹⁹ Mambo akya kyayukanyikwa kya Lesa kyamweka mu michima yabo; mambo Lesa wibamweshakyo.

²⁰ Mambo kufuma ku kulengwa kwa pano pantanda byanji bibula kumweka bya mwekeshatu monka mu byo alengele, bo bulume bwanji bwa myaka yonse ne bu Lesa bwanji amba, bulaka bwibashinke!

²¹ Mambo pa kumuyuka Lesa, kechi bamutumbijikile bu Lesa ne, nangwa kupika sante ne; kabiji ba alukile ke batu mu milanguluko yabo, ne michima yabo yabula maana yafichile.

²² Byo betumbijikile bene amba twi bamaana, ba alukile ke bakosama,

²³ kabiji bapimpwile lukumo lwa Lesa ubula kubola na bankishi bapashang'ana na muntu ubola, nangwa na bang'onyi, nangwa na ba nyama ba mikupa ina nangwa na bikalaba panshi.

²⁴ Onkao mambo aye Lesa wibapaine monka mwayila bya lwiso lwa michima yabo mukuuba byabipa, mu kwiipelula mibiji yabo abo bene na bene.

²⁵ Mambo abo bapimpwile bya bukine bya Lesa na bya bubela, ke bapopwele ne kwikingijila kilengwa ne kuleka Shakapanga, utotwa myaka yonse! Amena.

²⁶ Onkao mambo Lesa wibapaine ku muchima wa kusakisha kuuba byatamisha bya bumvu. Mambo banabakazhi babo balekele mobobila bantu na kwikuna.

²⁷ Ne banabalume nabo byonkabyo, balekele mwayila kisemwa kya bantu na banabakazhi, ne kusakisha mu lwiso lwabo kwikuna bene na bene, banabalume na banabalume ke beube byabula kufwainwa bya bumvu, ne kwiletelela mfweto yafwainwa bubi bwabo.

²⁸ Kabiji byonka byo bakaine kwikala na maana a kuyuka Lesa, Lesa naye wibapaine ku muchima wa bubi, bobenga byo babula kufwainwa kuuba.

²⁹ Kasa bayula na bumbulwa koloka bonse, ne bubi, ne lunkumbwa, ne nshiji, ne kuyula na kikonkoma, ne bumbanzhi, ne lutoobo, ne bujimbijimbi, ne bulwanyi, bo ba miyebe,

³⁰ ne ba mwenga, ne bamushikwa Lesa, ne ba misuula, ne benemeka bene, ne belundumika, ne betota, ne baleeta byabipa, ne balengulula bebasema;

³¹ ne babula maana, ne babula kulama milaye yabo, ne babula muchima wa bumuntu, ne babula kuuba lusa.

³² Abo nangwa bayuka koloka kwa bunchiba mambo bwa Lesa amba, boba bibye bo bafwainwa lufu. Nangwa byonkabyo abo kasa bebyubatu, kabiji ne kikwabo bebetabizha ne kwibatota aba bebyuba.