Kolose 4 - KNTP

¹ Anweba bankambo yaabo, mwibobile ba kalume benu kyonka kyaoloka ne kya esakana. Byo mwayuka amba, ne anweba muji na Nkambo yenu mwiulu.

Bya kwibafunda bikwabo

² Mwikale bakosela mu milombelo, mulabenga ne kukenkenta na kusanta.

³ Kasa mwitulombelela ne atweba, namba Lesa aketushinkwile kibelo kya Mambo, tukambe akya kyafyamika kya Kilishitu. Kyo nakashilwa mu kaleya amiwa.

⁴ Namba nkekisolole monka mo nafwainwa kwikyambila.

⁵ Kasa muuba bintu byonse na maana kuboba babula kwitabila, ne kwingijisha bulongo bimye byenu.

⁶ Byambo byenu bikale na bupe moba onse, byalungwa na mukele, muyuke mwafwainwa kwibakumbwila bonse, pa muntu pa muntu.

Lwimu lwapelaako

⁷ Tikikusa ukemubuula byonse byo mbena kuuba kuno. Aye ye mulongo wetu mutemwe ye nkwasho wakishinka, ye kalume mwi Nkambo pamo ne amiwa.

⁸ Ye nemutumina na onka ano mambo, namba muyuke byotwaikala, kabiji akatundaike michima yenu.

⁹ Namutuma pamo ne Onesimusa, mulongo wetu mutemwe kabiji wakishinka, ye umo wa mwi anweba, bo bakemubuula bintu byonse biji kuno.

¹⁰ Alisatakusa, mukwetu kaili, wimwimuna, ne Mako, muvyala wanji Banabasa. (Mwatambwile kala mukambizho amba, umvwe aye waiya ko muji, mutambulai.)

¹¹ Ne Yoshua yebateela amba, Yusutusa wimwimuna. Bano bo bonka bakwetu bamukanda bengila ne amiwa na mambo a bufumu bwa Lesa, bo baana balume bankwasha amiwa.

¹² Epafalasa mulongo wenu, kalume wa Kilishitu Yesu, wimwimuna. Bimye byonse aye wimulukuchila mu milombelo yanji amba, mwikale bashikamatu, bakoma mu lwitabilo monse mwaswila muchima wa Lesa.

¹³ Mambo amiwa na mushimuna namba, aye uji na mingilo yavula yakosa na mambo a anweba, ne na mambo a abo baji mu Laodikea, ne abo baji mu Hilapolisa.

¹⁴ Luka, ng'anga mutemwe, ne Demasa nabo bemwimuna.

¹⁵ Imunai bakwetu baji mu Laodikea ne Nyifwasa ne kipwilo kipwila mu nzubo yanji.

¹⁶ Kabiji ino nkalata pa kupwisha kwiitanga mwenu, mwibatangisheyo ne ba mu kipwilo kya bena Laodikea. Kabiji ne anweba mutange ne nkalata ya ku Laodikea.

¹⁷ Kabiji mumwambile Akipusa amba, “Tesha muchima ku mwingilo ye watambula mwi Nkambo, ne kumupwisha.”

¹⁸ Lwimu lwami amiwa Paulo: Nanemba na kuboko kwami amiwa mwine. Langulukai mfungwa yami! Bupe bwikale ne anweba.