Kolose 3 - KNTP

¹ Byo mwasangwilwe pamo ne Kilishitu, kebai biji mwiulu, monka muji Kilishitu kasa aikala ku kilujo kya Lesa.

² Teshai michima yenu ku bintu biji mwiulu, kechi ku bintu biji pano pantanda ne.

³ Mambo mwafwile, ne bumi bwenu bebufya pamo ne Kilishitu mwi Lesa.

⁴ Kilishitu, aye bumi bwetu byo akamweka, ponkapo ne anweba mukamweka nanji mu lukumo.

Bwikalo bwa kala ne bwikalo bupya

⁵ Onkao mambo ipayai bya ku mibiji yenu biji pano pantanda, bulalelale ne bubipisho ne kusakasaka kubindankanya muchima ne kusakasaka kubi konse ne lunkumbwa, alo ko kupopwela bankishi.

⁶ Na mambo a bino bintu bukaji bwa Lesa bubena kwiya pa bantu bamilengulwila.

⁷ Mo mwaendelenga kala ne anweba, byo mwaikajile mu bino bintu.

⁸ Pakuba pano bitayai ne bino byonse; kubuuka bukaji ne bukaji ne nshiji ne kayebe ne mwenga mu kanwa kenu.

⁹ Kechi mwibepele anwe bene na bene ne, byo mwavujijila bumuntu bwenu bwa kala ne byubilo byabo

¹⁰ kabiji mwavwala bu muntu bupya, bo bubena kusangulwa ke bupya mu kumona maana monka mwayila kipasha kya yewa wibulengele.

¹¹ Amo kechi muji mugiliki, nangwa muyudea, nangwa wa mukanda, nangwa wabulwa mukanda, nangwa mwenyi, nangwa mwina Sikitya nangwa muzha, nangwa mwana bene, pakuba Kilishitu ye byonse, kabiji uji mu byonse.

¹² Onkao mambo byo muji basalululwa bakwa Lesa, bazhila, batemwe, vwalai bu muchima wanekena, ne lusa ne kwipelula ne bukimote ne kukooka muchima.

¹³ Kasa mwitekenya anweba bene na bene, ne kwilekelako mambo, umvwe umo uji na mambo na mukwabo. Monka mo emulekejile mambo Nkambo, momo mwafwainwa kuubila ne anweba.

¹⁴ Kabiji kyakila pa bino byonse vwalai butemwe, ye mukwato ulumbulula byonse.

¹⁵ Kabiji lekai mutende wa Kilishitu ekale wa kwimulama mu michima yenu; ye ye mwaichilwa mu mubiji umo. Kabiji ikalai na michima ya kusanta.

¹⁶ Lekai mambo a Kilishitu ekajishetu avula mwi anweba. Mu maana onse kasa mwifunjisha anweba bene na bene na masalamo ne nyimbo ya kutota ne nyimbo ya bumupashi, kasa musanta mu michima yenu kwi Lesa.

¹⁷ Kabiji byonse byo muuba, nangwa byo mwamba, byubai mu jizhina ja Nkambo Yesu, kasa musanta kwi Lesa Taata monka mwi aye.

Bwikalo bwa bena Kilishitu mu bisemi byabo

¹⁸ Anweba banabakazhi basongolwa, nekenenai bamwata wenu, monka mo kyafwainwa mwi Nkambo.

¹⁹ Anweba banabalume basongola, temwai bakazhi benu, kabiji kechi mwibashintaukile ne.

²⁰ Anweba baana, kookelai bansemi benu mu byonse, mambo kino kyo kibafwainwa ba mwi Nkambo.

²¹ Anweba bashabo, kechi mwibazhingijishe baana benu ne, kuchiina amba mwa kebatuntwisha.

²² Anweba bakalume, kookelai mu byonse bankambo yenu bo muji naabo pano pantanda; kechi ku meso konka nobe mwasaka kwibatokeshatu bantu pa muchima ne, poso na bukishinka bwa muchima, na kwakamwa Nkambo.

²³ Byonse byo muuba, byubai na muchima yense, nobe kwi Nkambo kechi ku bantu ne.

²⁴ Byo mwayuka amba, mukatambula mfweto kwi Nkambo bo buswanyi. Ye Nkambo Kilishitu ye mwingijila.

²⁵ Mambo aye uba kyatama ukatambwila monka mu kyatama kyanji kyo aubile, kabiji kechi kuji kutala ku bilungi ne.