Kolose 2 - KNTP

¹ Mambo nasaka namba muyuke byo nemulukuchila kyakosa, ne abo baji ku Laodikea pamo, ne bonse bakyangye kumonapo kilungi kyami.

² Namba michima yabo itundaikwe bulongo bakwatankane ke umo mu butemwe, kabiji bekale na bunonshi bonse bwa maana a kukwatankanya ne kuyukisha kyafyamika kya Lesa, ye Kilishitu.

³ Monka mwi Aye mo byafyamikila bya buneme byonse ne bya milangwe ne bya maana.

⁴ Nemwambila kino mambo a kuuba amba, kafwako nangwa umo emujimbaike na byambo bya mulambisha ne.

⁵ Mambo nangwa mubiji wami ufwako, mupashi wami uji nenu, kasa nsekela pa kumona byo mwaikala bulongo, ne kukosa kwa lwitabilo lwenu lwa mwi Kilishitu.

Bwikalo bwa mwi Kilishitu

⁶ Byonkabyo monka mo mwatambwijile Kilishitu Yesu Nkambo, endelainga monka mwi aye.

⁷ Kasa mwatabilamo ne kushimikwa monka mwi Aye, ne kukoselamo mu lwitabilo lwenu, monka mo bemufunjishishe. Kasa muvuzha kusanta.

⁸ Jimukai kuchiina amba, bakemukwata buzha ku muntu nangwa umo na buntemwa maana bwanji, monka mwayila lufunjisho lwatu lwa bantutu, mwayila bya bwanyike bya pano pantanda, kechi mwayila Kilishitu ne.

⁹ Mambo mwi aye Kilishitu, mo mwaikala kuyula konse kwa Lesa monka mu mubiji wanji,

¹⁰ kabiji mwi Aye momo mwayujila ne anweba. Aye ye wakila bonse bapashi ba bulume ne ba luusa.

¹¹ Mwi aye Kilishitu momo mwaubilwa mukanda, kechi mukanda waubiwa na maboko ne, ye wa kuvujijila kwa mubiji wa buntunshi, mu mukanda wa Kilishitu.

¹² Byo mwazhiikilwe nanji mu lubatizhilo, kabiji imo mo mwasangwilwe nanji monka mu lwitabilo lwenu lwa mu kwingila kwa aye Lesa, yenka wamusangwile mu bafu.

¹³ Kabiji anweba mwajinga bafu mu mizhilulwila yenu ne mu bumbulwa mukanda bwa mibiji yenu. Naamba namba, aye Lesa wimusangwile anweba ke bomi pamo ne aye, byo etulekejile mizhilulwila yetu yonse.

¹⁴ Ne kwiazhimang'anya malayang'ano a byatongolwa etwimejile na kwitushinawina, kabiji wiangachilemo mu jishinda jetu byo e apopele pa musalabu.

¹⁵ Kabiji wibangachile bilwilo byabo byonse bapashi ba bulume ne ba luusa, ne kwibamwesha bumvu patoka ne kwi bashinjila ponka pa musalabu.

¹⁶ Onkao mambo kechi muleke muntu nangwa umo emuzhachishe mu bya kuja, nangwa mu bya kutoma ne, nangwa na juba ja kijiilo, nangwa juba ja kutentama kwa ng'ondo nangwa na juba ja Sabado ne.

¹⁷ Abya byo bimvule bya bintu bikeya, pakuba mubiji mwine ye wa Kilishitu.

¹⁸ Kechi muleke muntu emulengeshe kubulwa mpasela ne, na mambo a kwipelula kwanji ne kupopwela bamalaika. Kasa akoselapotu pa bimwesho byo amwene, ne kwilundumika na muchima wanji wa buntunshi

¹⁹ ne kukakachila ku mwine Kilishitu ne, mwi aye Kilishitu, moayila na kukoma mubiji yense na bukomo bufuma kwi Lesa, kasa bamukosesha ne kumunungakanya na manungi ne mishipe yonse.

Bumi bupya mwi Kilishitu

²⁰ Byo mwafwile pamo ne Kilishitu ku bya bwanyike bya pano pantanda, mambo ka o mwakookela tumizhilo nobe mwi ba pano pantanda?

²¹ Amba, “Kukwatako ne,” nangwa “Kutompapo ne,” nangwa “Kukwatapo ne?”

²² Abya bintu byonse byonaika pa kwingila naabyo; monka mwayila mizhilo ne mafunjisho a bumuntu.

²³ Bya byonkabyo kine, bimweka nobe bya maana mu kupopwela kwa kwitongwela bene mu kwipelula, ne mu kukatazhatu mubiji, abino bintu byo byatu kechi bikanya bya lwiso lwa buntunshi ne.