Kolose 1 - KNTP

Lwimu lwa kwa Paulo ku bazhijikwa

¹ Paulo, mutumwa wa Kilishitu Yesu monka mwayila muchima wa Lesa, ne Timoti mulongo wetu.

² Ku bazhijikwa ne balongo bakishinka ba mwi Kilishitu baji ku Kolose. Bupe ne mutende bifuma kwi Lesa Taata wetu, bikale ne anweba.

Milombelo ya misanchilo

³ Tusanta kwi Lesa, Shanja Nkambo yetu Yesu Kilishitu, moba onse byo twimulombelela anweba.

⁴ Mambo twaumvwa mambo a lwitabilo lwenu lwa mwi Kilishitu Yesu, ne butemwe bo muji naabo ku bazhijikwa bonse.

⁵ Na mambo a kya luketekelo kimutujilwa mwiulu, kyo mwaumvwine kala mu byambo bya bukine kiji mu Mambo Awama.

⁶ Ao aishile kwi anweba monka mo aikajikilwa pano pantanda kasa apanga bipangwa ne kuya na kunanuka, byo auba ne mwi anweba, kufuma ku juba jitanshi jo mwiomvwine ne kwibuyukisha bupe bwa Lesa kya kine.

⁷ Monka mo emufunjishishe Epafalasa, mukwetu mu mwingilo, ye wamwingilo wa Kilishitu wakishinka, wasunsakena mwi atweba.

⁸ Ye witubuula mambo a butemwe bwenu bwa mu Mupashi.

⁹ Na onkao mambo ne atweba kufuma ku joja juba jo twikyumvwine, kechi tuzhikilwa kwimulombelela ne. Twimulombelela namba muyulwe na maana a kuyukisha kyaswa muchima wa Lesa mu maana onse ne milangwe ya bumupashi.

¹⁰ Mwendenga mwafwainwa Nkambo na kumutokesha pa muchima. Kasa mupanga bipangwa mu mingilo yonse yawama ne kuya na kukoma mu maana a kumuyuka Lesa.

¹¹ Bemukoseshe na bulume bonse monka mwayila ngovu ya lukumo lwanji. Ne na butekanye bonse, ne kukooka muchima ne lusekelo pamo.

¹² Kasa musanta kwi aye Taata, ye witwalwile ke bantu bafwainwa kutambula bya mu buswanyi bwa bazhijikwa bwa mu kyeya.

¹³ Aye witupokolwele mu luusa lwa mfishi ne kwitutuntulwila mu bufumu bwa Mwananji yeatemwisha,

¹⁴ mwi aye motwamwena bukuuzhi bwetu, lo lulekelo lwa mambo etu.

Kilishitu ne mwingilo wanji

¹⁵ Kilishitu ye kipasha kya Lesa ubula kumweka. Ye mubeji wa bilengwa byonse.

¹⁶ Mambo byonse byalengelwe kupichila mwi Aye, bya mwiulu ne bya pano pantanda, bimweka ne bibula kumweka, nangwa ba pa bipona bya bufumu, nangwa ba bunkambo, nangwa bene bapashi ba bulume, nangwa ba luusa. Byonse byalengelwe kwi Aye ne kulengwa byalengejilwe Aye yenka.

¹⁷ Kabiji bintu byonse kasa bikyangye kulengwa Kilishitu wajipo, kabiji mwi Aye momo byaikajikilwa byonse.

¹⁸ Aye Kilishitu ye mutwe wa mubiji, kyo kipwilo, ye ntendekelo, ye mubeji wa kusanguka mu bafu amba, mu bintu byonse akekale ke mwine wakilaamo.

¹⁹ Mambo kyamutokejile Shanji ku muchima amba kuyula konse kwa Lesa kwaikala monka mwi Kilishitu.

²⁰ Kabiji apwayinyemo bintu byonse ne Aye mwine, biji pano pantanda, nangwa biji mwiulu, pakulenga mutende na mashi a mwananji ponka pa musalabu.

²¹ Ne anweba, kala mwajingatu bangi kabiji mwajinga balwanyi mu michima yenu ne mu mingilo yenu yabiipa.

²² Pakuba pano Aye Lesa wimupwanya na lufu lwa mu mubiji wa bumuntu bwa Mwananji, mu kukemumwesha ku meso anji kasa mwazhila, babula bulema ne babula mambo.

²³ Umvwe kine mukelwe mu lwitabilo, ne kwikajikwa pa kosa ne kushikamatu ponka, ne kubula kufumapo pa luketekelo lwa Mambo Awama o mwaumvwine. O asapwijilwe mu bantu bonse ba pano panshi. O naikajile ke wa kwiengijila amiwa Paulo.

Mwingilo wa Paulo ku kipwilo

²⁴ Pano nasekela mu bya kumanama byami na mambo a anweba, kabiji mbena kuyuzha kwashajile ku bya kumanama bya Kilishitu mu mubiji wami na mambo a mubiji wanji, kyo kipwilo.

²⁵ Kyo natongwejilwe amba, ngikale wa kwikingijila monka mwayila bukalama bwa Lesa bo bampele na mambo a anweba mu kwi mufikizhizha mambo a Lesa,

²⁶ onka afyamikile kufuma ku myaka yonse ya kala ne ku bisemi byonse, pakuba pano asololwa ku bazhijikwa banji.

²⁷ Abo, boaswile Lesa kwibayukisha byo buji bukata bwa lukumo lwa mu Bangentila lwa ano mambo afyamikile. Kokuuba amba, Kilishitu uji mwi anweba lo luketekelo lwa lukumo.

²⁸ Byonkabyo tusapwila mambo a Kilishitu, kasa tufunda bantu bonse mu maana onse. Namba tufikizhe bantu bonse kasa balumbuluka mwi Kilishitu.

²⁹ Kyo kyo ng'ingijila kyakosa kasa na kolomokatu, monka mwayila kwingila kwa Kilishitu koengila mwi amiwa na bulume.