Filipai 4 - KNTP

Bikwabo bya kwibafunda

¹ Onkao mambo, balongo bami, batemwe bo nasakisha! Lusekelo lwami ne munchinya wami, imanai kasa mwakosa byonkabyo mwi Nkambo, batemwe bami.

² Nebasashijila ba Yodia ne Shinchike, namba bekale na muchima umo mwi Nkambo.

³ Ee kine, na kusashijila ne obewa mukwetu wa kine mu mwingilo namba, mwi bakwashe bano banabakazhi, mambo baingijilenga kyakosa bingi pamo ne amiwa mu Mambo Awama, pamo ne Kilemente, ne bonse bakwetu bamwingilo bona bula kutongola mazhina abo, baji na mazhina abo mu buku wa bumi.

⁴ Sekelai mwi Nkambo moba onse. Kabiji nkamba jibiji, namba sekelai!

⁵ Kukooka muchima kwenu ku yukanyikwe ku bantu bonse. Nkambo uji pa bwipi.

⁶ Kechi mubambishe michima yenu nangwa mu kintu kimo ne, pakuba mu bintu byonse kasa musolola kwi Lesa byo musaka monka mu milombelo, ne mu misashijilo ne mukuuba sante pamo.

⁷ Kabiji mutende wa Lesa ubula kuyukanyikwa ukalama michima ne milanguluko yenu mwi Kilishitu Yesu.

⁸ Kyapelaako, balongo bami, langulukai byonse bya kine, ne byonse bya mushingi, ne byonse byaoloka ne byonse byawamisha, ne byonse bya buuya, ne byonse bya lusa, kabiji umvwe kobuji buwame ne lutotelo, bilangulukai bino bintu.

⁹ Kabiji abya bintu byo mwafunjile ne byo mwatambwile, ne byo mwaumvwine ne byo mwamwene mwi amiwa, byubai bino bintu, ne Lesa wa mutende ukekala ne anweba.

Kusanta na mambo a bupe

¹⁰ Nasekela bingi mwi Nkambo, pa byo mwatatula kundanguluka jibiji. Kabiji pano nayuka namba mwandangulukilenga ne kala bino mwabujile mwa kwikyubila.

¹¹ Kechi naamba mambo nakajilwa ne, mambo nafuunda kala mwa kwikajikila muchima nangwa nji na bintu nangwa sanabulwabyo.

¹² Nayuka byo kuji kukajilwa ne byo kuji kwikala na bintu byavula. Nafunda kino kyafyamika, kokuba amba monsetu, pa kimye kyonse natondwa, mu kwikuta nangwa mu kwikala na nzala, nangwa jina byavula nangwa mfwabyo.

¹³ Nakonsha kuuba bintu byonse mwi aye unkosesha.

¹⁴ Pakuba anweba mwaubile kyakila mu kuwama pa kushilang'ana mu makatazho ami.

¹⁵ Anweba bena Filipai mwayukishatu bulongo amba byo nafumine ku Makedonya mu moba atanshi a Mambo Awama, yenu yenka kipwilo kya nkwashishe ne kushilang'ena ne amiwa mu kupana ne kutambula.

¹⁶ Kabiji kukila pa kimye kimo byo nakebele bukwasho byo naji ku Tesalonika, mwantumijile bukwasho.

¹⁷ Kabiji kechi naamba mambo nasakatu kutambula bya bupe ne, bino kine kyo nasaka namba anweba mwikale na bipangwa byavula.

¹⁸ Natambula bukwasho bwavula ne kukilapo. Nabila ne kubila byo natambwile kufuma kwi Epafulodita bya bupe byo mwantumijile, bobwema bunuunka bulongo, kyo kitapisho kyaitabilwa kyamutokela Lesa pa muchima.

¹⁹ Kabiji Lesa wami ukemumwena byonse byo mwakajilwa mwayila bunonshi bwanji bwa mu lukumo bwa mwi Kilishitu Yesu.

²⁰ Pano kwi aye Lesa wetu Taata, kwikale lukumo myaka ne myaka! Amena.

Mutende wa kupezhako

²¹ Imunai bazhijikwa bonse baji mwi Kilishitu Yesu. Balongo betu bonse bonji naabo bemwimuna.

²² Kabiji bonse bazhijikwa nabo bemwimuna, ne ba mu kipango kya kwa Kesala bo bene.

²³ Bupe bwa Nkambo Yesu Kilishitu bwikale na mipashi yenu.