Filipai 3 - KNTP

Bololoke bwa kine

¹ Kyapelaako, balongo bami sekelai mwi Nkambo. Kwimunembela bintu bimo byonka kwi amiwa, kechi kyankatazha ne. Bino kwi anweba ke kya kwimukikizha.

² Jimukai ku aba bakabwa, jimukai kwi abo boba bibi, jimukai na boba bachiba byendelwa.

³ Atweba, yetu bene baji na mukanda wa kine, tupopwela na Mupashi wa Lesa ne kwitotela mwi Kilishitu Yesu ne kubika nangwa pacheche luketekelo mu buntunshi ne.

⁴ Nangwa amiwa inge nasaka inge nji na mwa kuketekela mu buntunshi. Umvwe muntu mukwabo wilanguluka amba amiwa nji na mwa kuketekela mu buntunshi, amiwa nakila.

⁵ Natwezhiwe mu mukanda mu juba jabutanu na busatu, kabiji ne wa mu kikota kya Isalela, ne wa mu mukoka wa Benjamina, ne mu Hebelu wa ba Hebelu. Mwayila Mizhilo, amiwa ne Mufaliseo,

⁶ mwayila lupata, namanyikile kipwilo. Mwayila bololoke bwa mu mizhilo nabujilwe mambo.

⁷ Nangwa byonkabyo abya byonse byajinga bya kumwenamo amiwa, ne bimona namba ke byatu na mambo a Kilishitu.

⁸ Kine, ne bimona byonse ke byatu na mambo a kuwama kwa muneema wa kumuyuka Kilishitu Yesu Nkambo yami. Na mambo a aye naswa kuleka ne kutaya byonse ne kwibimona nobe binchatu, namba mmwenemo Kilishitu

⁹ ne kutanwa mwi aye, kasa nabula bololoke bwami amiwa mwine bwishila mu mizhilo. Poso bonkabwa bwishila mu lwitabilo lwa mwi Kilishitu, bo bololoke bufuma kwi Lesa na lwitabilo.

¹⁰ Namba namuyuke kabiji ngyuke ne bulume bwa lusanguko lwanji, ne lumvwang'ano lwa mu bya kumanama kwanji, namba ngikale na lufu lwapashang'ana na lufu lwanji,

¹¹ namba monse mo kyakonshekela nkatanweko ku alwa lusanguko lwa mu bafu.

Kunyema kapeela ne kupwisha kikonkwanyi

¹² Kechi kya kwamba amba natambula kala ne, nangwa amba, nalumbululwa kala ne. Bino mbena kwibikako namba nkekikwate kyonkakya kyo bankwachiile kwi Kilishitu Yesu.

¹³ Anweba bakwetu, amiwa kechi nalanguluka namba nekitambula kala ne; bino kuji kintu kimo kyonguba, mvulama bintu biji kunyuma kasa nkanamina ku bintu biji kulutwe.

¹⁴ Kasa nebikishakotu kunanga kikonkwanyi kya mpasela ya lwito lwa mwiulu lwa Lesa mwi Kilishitu Yesu.

¹⁵ Onkao mambo atweba bonse bakoma ku mupashi twikale na muchima wa byonkabyo. Kabiji umvwe mu kintu nangwa kimo muji na muchima ungi, Lesa ukekisolola kwi anweba.

¹⁶ Bino monka mo twaendelako kala kufika pano potuji, tutwajijile kwendela monka.

¹⁷ Anweba bakwetu, bonse ikalai ba kundondela amiwa. Ne kwibatajisha benda byonka byotwaikala atweba kebenu ba kumwenako.

¹⁸ Mambo bavula benda kingi, bonemubujile kala javula, ne pano nemubuula na mipolo, namba bo balwanyi bamusalabu wa Kilishitu.

¹⁹ Kumpelo yabo ke lonaiko, kabiji lesa wabo jo jivumo jabo, kabiji lukumo lwabo luji mu bya bumvu bwabo, bo bata michima yabo ku bintu bya pano pantanda.

²⁰ Pakuba atweba bwina mwiulu bobwetu, momo tutengela Mupulushi Nkambo Yesu Kilishitu.

²¹ Ye ukapimpula mibiji ya bumvu bwetu ke ya lukumo amba, ikapashang'ane na mubiji wanji wa lukumo, monka mwayila bulume bwanji boakonsha kwi bikookesha bintu byonse kwi aye mwine.