Filipai 2 - KNTP

Kwipelula kwa Kilishitu ne bukata bwanji

¹ Pakuba kana muji lutundaiko mwi Kilishitu, kana muji lutekenesho lwa butemwe, kana muji lumvwang'ano lwa Mupashi, kana muji bumuchima wanekena ne bya lusa,

² fikizhai lusekelo lwami ne kwikala ba milanguluko imo, ne na butemwe bumo, kabiji mwikale ba kuyila mumo ne bamuchima umo.

³ Kechi mube kintu nangwa kimo mu kwilanguluka anwe bene nangwa mu kwitota kwatu ne, poso na muchima wipelula kasa mulanguluka bonse, pa muntu pa muntu amba, mukwetu wankila mu kuwama.

⁴ Pa muntu pa muntu kechi muteshe michima ku bintu byenu byonkatu ne, kana ne ku bya bakwenu pamo.

⁵ Ikalai na ye uno muchima mwi anweba, yenka waji mwi Kilishitu Yesu:

⁶ Aye nangwa waikajile mu musango wa bu Lesa, kechi walangulukile amba, kwesakana na Lesa kyo kintu kya kukakachila ne.

⁷ Bino wialwile mwine ke waatu, pa kutambula musango wa buzha, ne kusemwa mu kipasha kya bantu.

⁸ Kabiji wipelwile mwine, wakookejile ne ku lufu, nalo lo lufu lwa pa musalabu.

⁹ Onkao mambo Lesa naye wamutumbijikisha bingi, wamupa ne jizhina jakila mazhina onsetu.

¹⁰ Amba mu jizhina ja Yesu manungo onse akafukame panshi, a mwiulu, nangwa a pano pantanda, ne a munshi ya ntanda,

¹¹ Ne majimi onse aketabe amba Yesu Kilishitu ye Nkambo, mu kumuletela lukumo Lesa Taata.

Musaamenga nobe kyeya pano pantanda

¹² Byonkabyo, anweba batemwe bami, byonka byo mwankookejilenga moba onse, ne pano munkookele byonji kungi, twajijilai kwingila na moyo ne kuzakama mulumbulule lupulukilo lwenu,

¹³ mambo ye Lesa wingila mwi anweba mu kwimusakisha kuuba, ne kwingila bintu byamutokela ku muchima wanji.

¹⁴ Ubai byonse kwakubula kwipachika nangwa kwijizhang'anya,

¹⁵ pakuba amba mwikale bakubula mambo, baana ba Lesa babula jintomya mukachi kakisemi kyatama ne kyaluwankana, mo mubena kusaama nobe byeya bya pano pantanda.

¹⁶ Kasa mwakwachisha ku byambo bya bumi. Amba mu juba ja Kilishitu nketotelemo namba kechi nanyemene kyatu nangwa kwingila kyatu ne.

¹⁷ Nangwa inge nkechilwa nobe mulambo pa kitapisho kya mingilo yenu ya lwitabilo lwa kwi Lesa, nasekela kabiji nkasekela pamo ne anweba.

¹⁸ Byonkabyo ne anweba mwafwainwa kusangalala ne kusekela pamo ne amiwa.

Timoti ne Epafulodita

¹⁹ Naketekela mwi Nkambo Yesu kumutuma Timoti ko muji katataka, pakuba amba ne amiwa nkatundaikwe pakumvwa byo mwaikala.

²⁰ Mambo kechi nji na mukwabo wateeshako kya kine muchima ku bwikalo bwenu ne.

²¹ Bonse bakwabo bateesha michima yabo ku byo basaka kuuba abo bene kechi ku bintu bya kwa Yesu Kilishitu ne.

²² Pakuba anweba mwamuyukisha Timoti byo aji wakishinka, byonka biji mwana ne shanji aye wingila pamo ne amiwa mu Mambo Awama.

²³ Byonkabyo naketekela kumutuma bukiji pa kumona monkekajila amiwa.

²⁴ Kabiji nji na luketekelo mwi Nkambo namba pakupita kakimye kacheche ne amiwa nsakukeya ko muji.

²⁵ Nalanguluka namba kyafwainwa kwimutumina Epafulodita mulongo wami mu mwingilo, kabiji mukwetu mu bushilikale, ye muluwe wenu kabiji aye unkwasha mu bya kukajilwa kwami.

²⁶ Mambo aye uji na muchima wa kusakisha kwimumona kabiji waubile bingi kijikila byo mwaumvwine amba wakolwa.

²⁷ Kine wakolelwe bingi pepi kufwa. Pakuba Lesa wamubiile lusa, kabiji kechi aye yenka ne, ne amiwa pamo kuchiina amba na kekala na bulanda pa bulanda bukwabo.

²⁸ Nasakisha kumutuma, pakuba amba mukasekele pa kumumona kabiji byo mukamumona bulanda bwami bukapwa.

²⁹ Byonkabyo mutambulai mwi Nkambo na lusekelo ne kwibanemeka bantu ba byonkabye,

³⁰ mambo waji pepi kufwa mambo a mwingilo wa Kilishitu, ne kupana mweo wanji amba engile akya kyo mwabujile kukonsha kuuba anweba pa mingilo yenu ya kung'ingijila amiwa.