Filipai 1 - KNTP

Bya kwimuna

¹ Kufuma kwi Paulo ne Timoti bakalume bakwa Kilishitu Yesu. Ku bonse bazhijikwa baji mwi Kilishitu Yesu, baji mu Filipai ne bantangi balama kipwilo pamo ne bankwasho.

² Bupe kwi anweba, ne mutende bifuma kwi Lesa Taata ne kwi Nkambo Yesu Kilishitu.

Bya kusanta ne milombelo

³ Namusanchila Lesa wami bimye byonse byo nemuvuluka;

⁴ bimye byonse mu milombelo yami yo ne mulombelela anweba bonse, ne mulombelela na lusekelo

⁵ mambo a kukwashang'ana kwenu mu Mambo Awama kufuma ku juba jitanshi kufika ne leelo.

⁶ Kabiji nayukishatu kino namba, aye watatwile mwingilo wawama mwi anweba, ukamulumbulula kufika ne kumpelo mu juba ja Kilishitu Yesu.

⁷ Kyawama kwi mulanguluka byonka bino. Mambo nemulama mu muchima wami, anweba bonse mwaingijile pamo ne amiwa mu bupe, ne mu mfungwa yami, ne mu kwialwila Mambo Awama, ne mu kwiekajika.

⁸ Lesa ye kamonyi wami byo nemusakisha anweba bonse na butemwe bwa Kilishitu Yesu.

⁹ Kabiji ndomba ne kino namba butemwe bwenu buyenga na kukomenako, pamo ne maana a kwibiyukisha bintu byonse,

¹⁰ namba muyuke byakila mu kuwama. Ne kwikala bakine babula mambo kufika ne ku juba ja Kilishitu.

¹¹ Bwikalo bwenu buyule bipangwa bya bololoke bifuma kwi Yesu Kilishitu mukuleeta lukumo ne lutotelo kwi Lesa.

Kwikala na bumi ye Kilishitu

¹² Anweba balongo bami nasaka namba muyuke, amba abya byammwekejile amiwa, byakwasha kutwala Mambo Awama kulutwe.

¹³ Na onka ano mambo, bashilikale ba mu kipango ne bonse kuno bayuka amba amiwa nji mu mfungwa na mambo a Kilishitu.

¹⁴ Kabiji kwikala kwami mu mfungwa kwibakosesha balongo bami ba mwi Nkambo, baikala na kuchinchika bimye byonse mu kusapwila mambo kwakubula moyo.

¹⁵ Kine bamo basapwila Kilishitu mambo a kichima ne lupato, bino bakwabo na muchima wawama.

¹⁶ Bamo boba bino mambo a butemwe, byo bayuka amba bambika kuno mambo akwialwila Mambo Awama.

¹⁷ Bakwabo kechi basapwila Kilishitu na bukishinka ne, kana na muchima wa kwitemwa; abo balanguluka kumbikilapo bya malwa byonji mu mfungwa.

¹⁸ Kechi o ene mambo ne! Nasekela na mambo a kino, mambo Kilishitu wasapwilwa mu onse mashinda, nangwa mu jishinda jabubela nangwa ja kine, kabiji nkatwajijila na kusekela,

¹⁹ mambo nayuka namba kupichila mu milombelo yenu ne na bukwasho bwa Mupashi wa Yesu Kilishitu kino kikekala ke bupokolweshi bwami,

²⁰ Kabiji naitaba ne kuketekela namba kechi nkamona bumvu nangwa mu kintu kimo ne, bino naikala na kuchichinka kwawama amba, byonka byo atumbijikwa Kilishitu mu mubiji wami moba onse, nkatwajijila na kumutumbijika mu bumi nangwa mu lufu.

²¹ Mambo kwi amiwa kwikala na bumi ye Kilishitu, ne kufwa ko kukila mu kushukwa.

²² Pakuba umvwe kwikala mu mubiji kyokya ntongwelwa akya kikamwesha bipangwa bikwabo mu mingilo yami. Byonkabyo kyonkasalula kechi nekiyuka ne.

²³ Bantabakanya ku bintu bibiji. Byo nasaka kuya na kwikala ne Kilishitu, mambo kino kyakijisha mu kuwama;

²⁴ nangwa byonkabyo, kwikala mu mubiji kyo kyakila mu buneeme na mambo a anweba.

²⁵ Byo nayukishatu kino, namba nkekala nenu anweba bonse, mu kwimukomesha amba mukamone lusekelo lwa mu lwitabilo lwenu,

²⁶ pakuba amba kutota kwenu kuvujishe mwi Kilishitu Yesu na mambo a amiwa pa kwikala ne anweba jibiji.

²⁷ Bino lekai bwikalo bwenu bwikale bwafwainwa Mambo Awama a Kilishitu, namba nangwa nkeya na kwimumona, nangwa nji kungi, nkemumvwe amba, mwakosela mu mupashi umo, kasa mwibilwila na muchima umo abya byaitabilwa bya Mambo Awama.

²⁸ Ne kulengeshiwa moyo nangwa mu kintu kimo ku bemulwisha ne; a kyo kikekala kwi abo ke kayukilo ka lonaiko, pakuba kwi anweba kikekala ke kayukilo ka lupulukilo, lwafuma kwi Lesa.

²⁹ Mambo kechi kimupewa anweba na mambo a Kilishitu, kumwitabilatu konka ne, poso ne kumumanamina nako pamo.

³⁰ Ikalai na bulwi bumo bonka bo mwamwene mwi amiwa, ne pano mwibumvwa amba, buji mwi amiwa.