Filemonyi 1 - KNTP

¹ Paulo, kaili wa Kilishitu Yesu, ne Timoti mulongo wetu. Kwi Filemonyi mutemwe ne mukwetu mu mwingilo umo,

² ne Afiya nyenga yetu, ne Akipusa mukwetu mu bushilikale, ne kipwilo kipwila mu nzubo yenu.

³ Bupe ne mutende bikale ne anweba bifuma kwi Lesa Taata wetu ne kwi Nkambo Yesu Kilishitu.

Butemwe ne lwitabilo lwa kwa Filemonyi

⁴ Namusanchila Lesa wami moba onse, kasa nemutela mu milombelo yami.

⁵ Byo naumvwa mambo a butemwe bwenu, ne lwitabilo lomuji naalo mwi Nkambo Yesu, ne ku bazhijikwa bonse.

⁶ Nalomba namba kukwashang'ana kwa mu lwitabilo lwenu kwikale ke kwa kwibayukisha bantu byonse byawama byo tuji naabyo mwi Kilishitu.

⁷ Mambo namwene lusekelo lukatampe ne kutundaikwa na butemwe bwenu anweba batemwe. Mambo akwikizha michima ya bazhijikwa kwi anweba mulongo wami.

Kumwambilako Onesimusa

⁸ Onkao mambo, nangwa nji na luusa mwi Kilishitu lwa kwimukambizha kuba byafwainwa,

⁹ kechi nasaka kwikyuba ne, kana na mambo a butemwe nasaka kwi musashijila byonji mukote, amiwa Paulo, kabiji ne pano ne kaili wa Kilishitu Yesu pamo.

¹⁰ Ne musashijila na mambo a mwanami mwi Kilishitu Onesimusa, yenasema kasa nji mu mfungwa.

¹¹ Yenkaye wajinga waatu kala kwi anweba, pakuba pano ke wa bukwasho kwi anweba ne kwi amiwa.

¹² Ye mbena kubwezha pano ko muji, ye wauba nobe muchima wami amiwa mwine.

¹³ Ye nasakile namba ngikale nanji kuno, obe nobe anweba mubena kung'ingijila byonji mu mfungwa ya Mambo Awama.

¹⁴ Pakuba kwakubula kuyuka milanguluko yenu anweba bene, kechi nasaka kwiubila kintu ne amba buwame bwenu kechi bwikale bwa kwimukajikizha ne, poso monka mo mwaswila anweba bene.

¹⁵ Mambo kampe aye waabene nenu kimye kimo, na mambo a kuuba amba mu mutambule mukekale nanji kikupu.

¹⁶ Pano kechi pamo nobe kalume ne, poso pamo nobe muntu wakila kalume. Ke mulongo, mutemwe wakilaamo kwi amiwa, pakuba kwi anweba ko kwine, ne kumubiji ne mwi Nkambo.

¹⁷ Kabiji inge anweba muntela amba mukwetu, mu mutambule byonka byo mwakonsha kuntambula amiwa.

¹⁸ Pakuba umvwe aye wimubile kyatama, nangwa wakongwele kintu nangwa kya byepi, munembelemo amiwa.

¹⁹ Amiwa Paulo nanemba na kuboko kwami amiwa mwine, namba nkekibwezha. Bino kechi nemwambila byo mwauba nobe wa kikoloto kwi amiwa mambo a bwikalo bwenu bupya bwa mwi Kilishitu ne.

²⁰ Kine, mulongo wami, mmwenemo lusekelo mwi anweba mwi Nkambo, ikizhai muchima wami mwi Kilishitu.

²¹ Naketekela namba mu kankookela, nemunembela kasa nayuka namba, mukebyuba ne bikwabo byo nabula kuteela.

²² Ne pa kimye kimo, byonkabyo nengezhai ne mwakufikila amiwa, mambo na mambo a milombelo yenu, naketekela namba, nkapanwa kwi anweba.

Lwimu lwa kupezhako

²³ Epafalasa, mukwetu kaili wa mwi Kilishitu Yesu, wimwimuna;

²⁴ ne Mako, ne Alisatakusa, ne Demasa, ne Luka, bakwetu bamu uno mwingilo, nabo bemwimuna.

²⁵ Bupe bwa Nkambo yetu Yesu Kilishitu bwikale na mipashi yenu.