Efisesa 6 - KNTP

Baana ne bansemi

¹ Anweba baana, kookelai bemusema monka mwaswila Nkambo, mambo kino kyo kyaoloka.

² “Nemeka bashobe ne bainobe” uno ye mukambizho mutanshi uji na mulaye wa bibusa.

³ “Namba umone byawama, wikale myaka yavula pano pantanda.”

⁴ Kabiji ne anweba bashabo, kechi mwibazhingijishe baana benu ne. Poso kwibakomesha na kwibafunjisha ne kwibajimuna monka mwaswila aye Nkambo.

Bakalume ne bankambo yabo

⁵ Anweba bakalume, kookelai bankambo yenu bo mwingijila ku mubiji, na moyo ne kuzakama, monka mu bumuchima wa kine, nobe kwi Kilishitu.

⁶ Kechi ku meso konka nobe wasaka kwibatokeshatu bantu pa muchima ne, poso mwafwainwa bakalume ba Kilishitu, kasa muba kyaswa muchima wa Lesa na muchima yense.

⁷ Kasa mwingila ne ku muchima kasa kwatoka, nobe kwi Nkambo, kechi ku bantutu ne.

⁸ Byo mwayuka amba, byonse byawama byuba muntu, byo byonka byo akatambula kwi Nkambo, nangwa ye muzha, nangwa ye mwana bene.

⁹ Kabiji anweba bankambo yabo, bobilai byonkabyo, mutekanye ne kwibapingila ne. Byo mwayuka amba, Nkambo wa bonse, ne wabo ne wenu pamo, uji mwiulu, kabiji aye kechi utala ku bilungi bya bantu ne.

Bilwilo bya nkondo

¹⁰ Kabiji pano kyapelaako, ikoseshainga mwi Nkambo, ne mu bulume bwa ngovu yanji.

¹¹ Vwalai byonse bya nkondo bya Lesa, namba mukonshe kwimana kasa mwakosa ku bya bujimuku bya Diabola.

¹² Mambo kulwa kwetu kechi kwa kulwa na ba mibiji ya mashi ne, poso na bakatampe bene, ne ba luusa, ne bamfumu ba ino mfishi ya pano panshi, ne bapashi babiipa ba mwiulu.

¹³ Onkao mambo shikulai byonse bya nkondo bya Lesa, namba mukonshe kwimana kasa mwakosa mu juba jibi, ne pakupwa kuuba byonse, kasa mwaimana ponka.

¹⁴ Byonkabyo imanai, kasa mwanyingisha mukwato wa bukine mu bifuka byenu, ne kuvwala kyela kya pa kyaji kya bololoke,

¹⁵ ne kuvwala ku maulu enu makwabilo a kutengelela jimo kwa Mambo Awama a mutende.

¹⁶ Kabiji ne pa byo byo byonse mushikule jikebo ja lwitabilo, ja kuleyelamo miketo ya mujilo yonse ya kwa aye mubi.

¹⁷ Kabiji mutambule kya kulama mutwe kya lupulukilo, ne mpoko ya kwa aye Mupashi, o mambo a Lesa.

¹⁸ Kasa mulomba mu bimye byonse na lulombelo lonse ne misashijilo monka mwi aye Mupashi, ne kwilutong'amina na mukoyo mukatampe ne misashijilo ya kwibalombelela bazhijikwa bonse.

¹⁹ Ne amiwa mwine pamo namba, byambo bimpewe amiwa pa kwasamika kanwa kami, mu kwibabuula na kuchinchika akya kyafyamika kya Mambo Awama.

²⁰ Onaikajila ke ntomesha wa mu minyololo, namba monkamo ng'ambe na kuchinchika, byonka byo nafwainwa kwamba.

Bya kupezhako

²¹ Kabiji Tikikusa, mulongo wetu mutemwe, wamwingilo wakishinka wa mwi Nkambo, ye ukemubuula byonse namba, ne anweba muyuke byonji ne byo nguba.

²² Ne mutuminaye na onka ano mambo namba, muyuke byo twaikala, kabiji emukoseshe michima yenu.

²³ Mutende ekale na balongo betu ne butemwe ne lwitabilo pamo bifuma kwi Lesa Taata ne kwi Nkambo Yesu Kilishitu.

²⁴ Bupe bwikale na bonse batemwa Nkambo yetu Yesu Kilishitu na butemwe bubula kupwa.