Efisesa 5 - KNTP

Kwikala mu butemwe

¹ Byonkabyo ikalai balondela Lesa, byafwainwa baana boatemwa.

² Ne kwenda monka mu butemwe, byonka byo etutemenwe Kilishitu, ne kwipana mwine na mambo a atweba, ke mulambo ne kitapisho kwi Lesa, bikale bwema bwawama.

³ Pakuba bulalelale ne bubipisho bonse, ne lunkumbwa, kechi mwibiswe nangwa kwibiteelatu mwenu mo muji ne, mo mwafwainwa bazhijikwa.

⁴ Nangwa bya bunya, nangwa misambo ya kwendalala, nangwa miteleko ibi, abyo kechi byafwainwa ne, kana konka kusanta.

⁵ Mambo kino anweba mwi kiyukishatu kine amba, kafwako mulalelale, nangwa muntu wabiipa, nangwa wa lunkumbwa, (kokuuba amba upopwela bankishi), uji na buswanyi mu bufumu bwa Kilishitu ne Lesa ne.

⁶ Kechi muleke muntu emujimbaike na byambo byatu ne, mambo na mambo a byonka bino bintu bukaji bwa Lesa bukebafikila bantu bamilengulwila.

⁷ Byonkabyo kechi mwikale ba kupwang'ana naabo ne.

⁸ Mambo kala mwajinga mfishi, pakuba pano mwi kyeya mwi Nkambo. Endainga mwafwainwa baana ba kyeya,

⁹ (mambo bipangwa bya kyeya biji mu buwame bonse ne bololoke ne bukine),

¹⁰ ne kweseka kuyuka bimutokesha ku muchima aye Nkambo.

¹¹ Kabiji kechi mumvwang'ane nayo mingilo yatu ya mfishi ne, poso konka kwibilengulula.

¹² Mambo bintu byo boba kumbaji ke bumvu pa kwibiteela.

¹³ Kabiji bintu byonse pa kulengululwa bisololwa patoka na kyeya,

¹⁴ mambo byonse bisololwa patoka bya aluka ke kyeya. Onkao mambo kyaambiwa amba: “Buuka, obewa walaala, ne kusanguka mu bafu, Kabiji Kilishitu ukakusamina.”

¹⁵ Tajijishai bulongo byo mwenda, kechi pamo na babula maana ne, kana pamo na bamaana.

¹⁶ Kasa mwingijisha bimye bulongo, mambo ano moba atama.

¹⁷ Onkao mambo kechi mwikale bakosama ne, yukai mwayila kyaswa muchima wa Nkambo.

¹⁸ Kabiji kechi mupendwe binyu ne, mo muji bono, kana muyulwe na Mupashi.

¹⁹ Kasa mwisamba anweba bene na bene mu masalamo ne nyimbo ya kutota ne nyimbo ya bumupashi, ne kwimba ne kuuba kimenge na muchima yense kwi aye Nkambo.

²⁰ Kasa mwibisanchila byonse moba onse mu jizhina ja Nkambo yetu Yesu Kilishitu kwi Lesa Taata.

Baji mu masongola

²¹ Inekenenai anweba bene na bene mu kumwakamwa Kilishitu.

²² Anweba banabakazhi basongolwa, nekenenai bamwata wenu, nobe Nkambo.

²³ Mambo mulume ye mutwe wa mukazhanji, byonka biji Kilishitu ye mutwe wa kipwilo, ye mwine upulusha kipwilo, ye mubiji wanji.

²⁴ Kabiji kipwilo byo kyamunekenena Kilishitu, byonkabyo ne banabakazhi basongolwa nabo banekenene bamwata wabo mu byonse.

²⁵ Anweba banabalume basongola, temwai bakazhi benu, byonka byo atemenwe Kilishitu kipwilo, ne kwipana mwine na mambo a akyo.

²⁶ Amba ekizhijike, byo ekitokesha pa kwikyovwa na mema a mu byambo,

²⁷ amba epeekyo aye mwine ke kipwilo kya lukumo, kyabula jintomya nangwa jimfunye, nangwa kikwabotu kya byonkabyo ne, poso amba kikale kyazhila kyabula bulema.

²⁸ Byonkabyo, byo byo kyafwainwa banabalume basongola nabo kutemwa bakazhi babo bene pamo nobe mibiji yabo abo bene. Awa watemwa mukazhanji, witemwa ne aye mwine.

²⁹ Mambo kafwako muntu nangwa umo washikwapo mubiji wanji mwine ne; kana kumujisha ne kumulela bulongo, byonka byo oba Kilishitu na kipwilo;

³⁰ mambo atweba twi bya mubiji wanji.

³¹ “Naonka ano mambo muntu ukaleka shanji ne inanji, ne kulamachila ku mukazhanji, kabiji abo babiji bakekala ke mubiji umo.”

³² Kino kyafyamika kyo kikatampe, bino naamba mambo a Kilishitu ne a kipwilo.

³³ Nangwa byonkabyo, anweba bonse kasa mutemwa bakazhi benu pamo byonka byo mwitemwa anweba bene, au mukazhanji au mukazhanji, ne mwanamukazhi wasongolwa naye anemeke mwata wanji.