Efisesa 4 - KNTP

Mubiji umo wa Kilishitu

¹ Byonkabyo amiwa kaili wa Nkambo, ne musashijila namba mwendenga mwafwainwa lwito lo mwaichilwe.

² Na kwipelula konse ne bukimote, ne na kukooka muchima, kasa mwitekenya anweba bene na bene mu butemwe.

³ Ne kuteshako muchima kulama bu muchima umo wa Mupashi mu lufungwa wa mutende.

⁴ Kuji mubiji umo ne Mupashi umo, byonka byo mwaichilwe mu luketekelo lumo lwa lwito lwenu.

⁵ Nkambo umo ne lwitabilo lumo ne lubatizhilo lumo.

⁶ Lesa umo Shanja bonse ye uji pa bonse, ye wingila mu bonse, ye uji mu bonse.

⁷ Atweba bonse pa muntu pa muntu, twapewa bupe monka mwayila kipimo kya bupetu kya Kilishitu.

⁸ Onkao mambo aye wa amba amba, “Byo akanjijile mwiulu, wasendele jibumba ja ntundu, Kabiji wapaine bya bupetu ku bantu.”

⁹ Kabiji kino kya kwamba amba, “Wakanjijile” Nanchi kyayila mu ka? Kyayila mukuuba amba, patanshi waikijile munshi mwine ya ntanda.

¹⁰ Aye waikijile ye yenka wakanjijile kupitaila meulu onse, amba ayuzhe bintu byonse.

¹¹ Kabiji bamo wibapele butumwa, bamo bungauzhi, bakwabo busapwishi, kabiji bakwabo bu kafunga ne bufunjishi.

¹² Na mambo a kwibanengezha bazhijikwa amba bekale ba kwingila mwingilo, wa kukomesha mubiji wa Kilishitu.

¹³ Poso bonse byo tukalumbuluka mu bu umo bwa mu lwitabilo ne mu maana a kumuyukisha Mwana Lesa, ke bantu bakoma, bafika ku kipimo kya kimino kya kufikila kwa Kilishitu.

¹⁴ Amba kechi tukikale banyike ne, kasa tukumpaulwa ne kulelaulwa na luvula lonse lwa mafunjisho a bantu mu bujimuku bubi, bo bebajimukila bantu mu kwibatwala mungi.

¹⁵ Pa kwamba bukine monka mu butemwe, tukomenga mwi aye mu bintu byonse, yenkaye mutwe wetu Kilishitu.

¹⁶ Mwi aye mubiji yense, wanungankana pamo ne kusambakana ke umo konka ku abya bipaana manungi onse. Pa kwingila bulongo byonse pa kintu pa kintu, mubiji wikomesha mwine monka mu butemwe.

Bwikalo bupya mwi Kilishitu

¹⁷ Byonkabyo naamba kino ne kwimubuujisha mwi Nkambo, namba kechi mukyendenga monka mobendela Bangentila, mwayila milanguluko yabo yatu ne,

¹⁸ mambo maana abo a aluka ke a mfishi, kabiji bebabanya ku bumi bwa Lesa na bulubi bo baji naabo na mambo a kukosa kwa michima yabo.

¹⁹ Abo, byo babula bumvu, bepana mu kulondalonda bya bunya, mu kwingila bubipisho bonse na lwiso.

²⁰ Pakuba anweba kechi mwafunjile Kilishitu byonkabyo ne.

²¹ Inge kine iye ye mwaumvwine, ne kufunjishiwa mwi aye, monka mwayila bukine buji mwi Yesu.

²² Amba, muvuule mwayila awa musango wa bwikalo bwenu butanshi, abwa bumuntu bwa kala bubena kuya na konaika monka mwayila lwiso lwa bujimbijimbi bwabo.

²³ Musangulwenga ke bapya mu mupashi wa michima yenu,

²⁴ ne kuvwala bumuntu bupya bwalengwa mu bololoke ne buzhile bwa bukine monka mwaikajila Lesa.

²⁵ Onkao mambo muleke bubela, “Kasa mwiambila bya bukine anwe bene na bene” mambo atweba bene na bene twi bya mubiji umo.

²⁶ “Nangwa mwazhingila kechi mulenge mambo ne” kechi muleke juba jizhike kasa mwazhingila ne.

²⁷ Nangwa kumushiila mpunzha aye Diabola ne.

²⁸ Awa wiba kechi ebe jibiji ne, kana engile kyakosa kasa engila na maboko anji kintu kyawama, amba amwenemo bya kupana kwiyewa wakajilwa.

²⁹ Kechi muleke byambo byatama bifume mu kanwa kenu nangwa kimo ne, kana byonka byawama bibakomesha bantu, bibafwainwa mu kyonkakyo kimye, amba bibaleetele bibusa abo bebyumvwa.

³⁰ Kabiji kechi mu mufichishe ku muchima aye Mupashi Wazhila wa Lesa ne, mwi aye mo mwabikilwe kayukilo ka kufika ne ku juba ja bukuuzhi.

³¹ Bululu bonse, ne bukaji, ne kubuuka bukaji, ne kubwazanga, ne mwenga, ne lupato lonse mwibifumye mo muji.

³² Kabiji kasa mwiubila lusa anweba bene na bene, mwikale ba michima yanekena, ne kwilekela mambo anweba bene na bene, byonka byo emulekejile mambo aye Lesa mwi Kilishitu.