Efisesa 3 - KNTP

Mwingilo wa Paulo ku Bangentila

¹ Na onka ano mambo amiwa Paulo, kaili wa Kilishitu Yesu na mambo a anweba Bangentila,

² umvwe kine mwaumvwine mambo a bukalama bwa bupe bwa Lesa bonampelwe na mambo a anweba,

³ byo bansolwejile ku lumwekesho akya kyafyamika monka mo nanembela kala mu byambo bicheche,

⁴ byo mukebitanga mukayuka maana ami a kuyuka kyafyamika kya Kilishitu.

⁵ Kyabujilwe kusololwa ku bantu bakwabo bamu myaka ya kala pamo ne byo kyasololwa pa kino kimye ku batumwa banji bazhila ne bangauzhi kwi aye Mupashi.

⁶ Amba Bangentila bo banswanyi pamo ne atweba, bo bamu mubiji umo ne atweba, bo ba kutambula mulaye pamo ne atweba mwi Kilishitu Yesu kupichila mu Mambo Awama.

⁷ O napelwe amba, ngikale wa kwiengijila, monka mwayila akya kyo a panatu Lesa mu bupe bwanji, kyo ampele amiwa monka mwayila kwingila kwa bulume bwanji.

⁸ Kwi amiwa yenka mucheeche mwine wa mu bazhijikwa bonse, ko bwapewa buno bupe bwa kusapwila ku Bangentila mambo a bya bunonshi bwa Kilishitu bwabulwa kukonsheka kwibuyuka,

⁹ ne bwa kumwesha ku bantu bonse mo kwayila akwa kwingila kwa akya kyafyamika kyafyamikile myaka ne myaka mwi Lesa yenka walengele byonse,

¹⁰ amba pano na mambo a kipwilo maana a Lesa a misango ne misango asoloke ku bakatampe bene ne ba luusa ba mwiulu.

¹¹ Monka mwayila akwa kufuukula kwa myaka ne myaka koafukwile mwi Kilishitu Yesu Nkambo yetu.

¹² Mwi aye motuchinchikila kabiji motutwelela na luketekelo na mambo a lwitabilo lwetu lwa mwi aye.

¹³ Onkao mambo nasaka namba, kechi mupungile na mambo a bya malwa byami byo nemumanamina ne, mambo byo bya kwi muletela lukumo.

Butemwe bwa Kilishitu

¹⁴ Na onka ano mambo amiwa namufukamina na manungo ami aye Taata,

¹⁵ ko kyatambula jizhina kisaka kyonse kya mwiulu ne kya pano pantanda.

¹⁶ Ndomba namba emukoseshe na bulume mu bumuntu bwenu bwa mukachi na Mupashi wanji, monka mwayila bunonshi bwa lukumo lwanji,

¹⁷ namba Kilishitu ekale monka mu michima yenu na lwitabilo. Pa kutabilamo ne kushimikwa ponka pa butemwe bwa Lesa,

¹⁸ amba mukonshe kukwatakanya pamo ne bazhijikwa bonse mwayila bula bwabo ne bwipi bwabo ne kiimino kyabo ne kuzhika kwabo.

¹⁹ Ne kwibuyuka butemwe bwa Kilishitu bukankalwa maana kuyuka, namba muyule paa! Kufika ne ku kuyula konse kwa Lesa.

²⁰ Pano kwi aye wakonsha kuuba byakijishatu byonse byo tulomba nangwa byo tulanguluka, monka mwayila bulume bwingila mwi atweba,

²¹ kwi aye kwikale lukumo mu kipwilo ne mwi Kilishitu Yesu kufika ne ku nkulo yonse ya myaka ne myaka. Amena.