Efisesa 2 - KNTP

Kufuma ku lufu kuya ku bumi

¹ Anweba mwajinga bafu na mambo a mizhilulwila yenu ne mambo enu.

² Mo mwaendelenga kala monka mwayila musango wa pano pantanda, monka mo asakila mfumu wa baluusa lwa mu mwela, ye mupashi wingila ne pano mu baana bamilengulwila.

³ Motwaikajile kala ne atweba bonse, monka mu bya lwiso lwa buntunshi bwetu. Kasa tuuba bisakasaka mubiji ne muchima, kabiji mu kusemwa kwetu twajinga bafwainwa bukaji pamo ne bonse bakwetu.

⁴ Kabiji Lesa byo aji na lusa lukatampe, na mambo a butemwe bwanji bukatampe bo etutemenwe,

⁵ nangwa byotwajinga bafu na mambo a mizhilulwila yetu, aye witusangwile ke bomi pamo ne Kilishitu. Ko ku bupe bwa Lesa ko mwapulukila.

⁶ Ne kwitusangula pamo ne aye, ne kwitwikazha pamo ne aye mwiulu mwi Kilishitu Yesu.

⁷ Amba mu myaka ikeya akamweshe bunonshi bwine bwa bupe bwanji mu kwituubila lusa mwi Kilishitu Yesu.

⁸ Mambo ko ku bupe ko mwapulukila monka mu lwitabilo. Kabiji kechi kyo kintu kyafuma kwi anweba bene ne, kyokya kupanatu aye Lesa.

⁹ Kechi kya mu mingilo ne, kuchiina amba, muntu nangwa umo waketota.

¹⁰ Mambo atweba twi ba mubusendwe bwanji, twalengwa mwi Kilishitu Yesu amba tukengilenga mingilo yawama, yo atongwejile jimo Lesa amba tukendenga monka.

Bu umo mwi Kilishitu

¹¹ Onkao mambo vulukai, amba anweba kala mwajinga Bangentila ku mubiji batelwa amba, “Bambulwa mukanda” kuboba batelwa amba, “Bamukanda” wa ku mubiji, waubiwa na maboko.

¹² Kabiji mu kyokya kimye mwabujile Kilishitu, mwajinga bangi mu kikota kya bena Isalela, mwajinga benyi ku malayang'ano a milaye, kechi mwajinga na luketekelo nangwa pacheche ne, kabiji mwabujilwe Lesa pano pantanda.

¹³ Pakuba pano mwi Kilishitu Yesu anweba mwajinga kwalepa kala, bemufwenya kubwipi na mashi a Kilishitu.

¹⁴ Mambo aye Kilishitu ye mutende wetu, ye walenga bonse babiji ke umo, ne kukundula kibamba kya pakachi kya lwabano.

¹⁵ Byo azhimang'enye na mubiji wanji mizhilo ya mikambizho ya mu byatongolwa amba, alengelemo mwi aye mwine aba babiji ke muntu umo mupya, aleete mutende.

¹⁶ Kabiji amba ebapwanye na Lesa bonse babiji mu mubiji umo konka ku musalabu, byo azhimang'enye mfika konka.

¹⁷ Kabiji waishile na kwimusapwila Mambo Awama a mutende anweba mwajinga kwalepa ne abo bajinga kwipi.

¹⁸ Mambo monka mwi aye atweba bonse babiji tuji na mwa kwishila mu Mupashi umo kwi aye Taata.

¹⁹ Byonkabyo kabiji pano kechi mukiji bangi nangwa benyi ne, mwi bena muzhi pamo na bakwenu bazhijikwa, mwi ba munzubo ya Lesa.

²⁰ Kasa mwashimikwa pa kitendekesho kya batumwa ne bangauzhi, ne Kilishitu Yesu mwine jo jibwe jine ja jikonka.

²¹ Monka mwi aye mo mwanungankena kishimikwa kyonse, kasa kikoma ke nzubo yazhila ya Lesa mwi Nkambo.

²² Mwi aye ne anweba mwashimikwa monka amba mwikale ke kya kwikalamo Lesa na Mupashi.