Efisesa 1 - KNTP

¹ Paulo, mutumwa wa Kilishitu Yesu monka mwayila muchima wa Lesa. Ku bazhijikwa baji mu Efisesa, bakishinka ba mwi Kilishitu Yesu.

² Bupe kwi anweba ne mutende bifuma kwi Lesa Taata ne kwi Nkambo Yesu Kilishitu.

Bibusa bya bumupashi mwi Kilishitu

³ Atotwe Lesa, Shanja Nkambo yetu Yesu Kilishitu, ye witubijiile bibusa byonse bya mwiulu, bya bumupashi mwi Kilishitu.

⁴ Monka mo etusalulwijile mwi aye pano pantanda kasa pakyangye kulengwa, amba twikale bazhila, babula bulema ku meso anji, mu butemwe bwanji.

⁵ Mambo witutongwejile jimo amba aketwalule ke baana banji aye mwine mwi Yesu Kilishitu, monka mo kyamutokela ku muchima wanji,

⁶ mukuleeta lutotelo lwa kutota lukumo lwa bupe bwanji, boetupeletu mwi aye Mutemwe.

⁷ Mwi Kilishitu mo muji bukuuzhi bwetu bwa mu mashi anji, lo lulekelo lwa mizhilulwila yetu, monka mwayila bunonshi bwa bupe bwanji,

⁸ bo etuvuzhizhe atweba na maana onse, ne na kuyuka konse.

⁹ Byo etusolwejile akya kyafyamika kya ku muchima wanji, monka mwayila akya kyamutokela ku muchima kyo afukwijile jimo mwi Kilishitu.

¹⁰ Amba akekajike bukalama bwa pa byonse ponka pa kukafikila myaka yoatongola, ne kwibikonkenya bintu byonse mwi Kilishitu, biji mwiulu ne biji pano pantanda.

¹¹ Kabiji mwi Kilishitu mo etwalulwile ke buswanyi bwanji, byo twatongwejilwe jimo monka mwayila kufuukula kwanji, aye wingila byonse monka musakila muchima wanji,

¹² amba atweba batanshi baketekejile mwi Kilishitu, twikale ke ba kumuletela lutotelo lwa kutota lukumo lwanji.

¹³ Kabiji ne anweba mwaumvwine Mambo a Bukine, o Mambo Awama a lupulukilo lwenu. Kabiji byo mwaitabijile Kilishitu mwabikilwe kayukilo, ye Mupashi Wazhila wa mulaye.

¹⁴ Ye bukikizhi bwa buswanyi bwetu, mu kupembela kukuulwa kwa banji bo emwenejile jimo mwine, mukuleta lutootelo lwa kutota lukumo lwanji!

Milombelo yakwa Paulo

¹⁵ Na onka ano mambo, amiwa byo naumvwa mambo a lwitabilo lwenu lwa mwi Nkambo Yesu, ne butemwe bomumwesha ku bazhijikwa bonse,

¹⁶ kechi nzhikilwa kusanta na mambo a anweba ne. Kasa nemutela mu milombelo yami

¹⁷ namba Lesa wa Nkambo yetu Yesu Kilishitu, Shanja lukumo, emupe Mupashi wa maana ne wa lumwekesho lwa kumuyukisha aye mwine.

¹⁸ Meso a michima yenu alabe, muyuke mwayila luketekelo lwa lwito lwanji, ne mwayila bunonshi bwa lukumo lwa buswanyi bwanji bwa mu bazhijikwa.

¹⁹ Ne mwayila bukata bwine bwa bulume bwanji bwa kwi atweba baitabila, monka mwayila akwa kwingila kwa bulume bwa ngovu yanji,

²⁰ bo aingijilenga mwi Kilishitu, byo amusangwile mu bafu, ne kumwikazha konka ku kilujo kyanji mwiulu.

²¹ Kupitaila kwine kwapela bufumu bonse, ne luusa lonse, ne bulume bonse, ne bunkambo bonse, ne mazhina onse atelwa, kechi onka apa ino ntanda ne, ne apa ikeya kulutwe.

²² Kabiji wibikookesha bintu byonse munshi ya maulu anji, ne kumupana aye amba ekale mutwe wa byonse ku kipwilo.

²³ Ne kipwilo ye mubiji wa Kilishitu, ye kukumbana kwanji, aye wa kumbana byonse, monse monse.