Byubilo 9 - KNTP

Kwitabila kwa Saulo

¹ Bino Saulo, byo akipingilenga bipingo bya kwibepaya baana babwanga ba Nkambo, wayile kwi ng'anga mukatampe,

² na kulomba makalata a kuya nao ku Damasakasa ku mashinagoga, amba kana nkatanako bamo bamu jije Jishinda, banabalume nangwa banabakazhi, nkebalete mu mfungwa ku Yelusalema.

³ Kabiji byo akiyilenga pa kufwenya kwipi na Damasakasa, ponkapotu kyamusamijile kyeya kya mwiulu konsetu ko ajinga.

⁴ Kabiji aye byo aponene panshi, wa umvwine jiwi amba, “Saulo, Saulo, ikika kyo ubena kummanyikila?”

⁵ Ne aye amba, “Lelo yenu ba ng'anyi Nkambo?” Kumvwa aye amba, “Amiwa ne Yesu ye ubena kummanyika obewa.

⁶ Pano imana, utwele mu muzhi, kabiji bakakubula kyo wafwainwa kuuba.”

⁷ Aba bantu bo ayilenga naabo, baimenetu nzo, kasa bomvwa jiwi jonka, bino kumona muntu ne.

⁸ Saulo wabuukile panshi, kabiji nangwa meso anji alabilenga, kechi wamwenenga ne. Byonkabyo bamutangijile kasa bamukwata ku kuboko ne kumufikizha ku Damasakasa.

⁹ Ne aye waikajile moba asatu kwakubula kumona ne, ne kuja ne, nangwa kutoma ne.

¹⁰ Bino mu Damasakasa mwajinga mwana wabwanga umo jizhina janji Ananyasa. Kabiji aye Nkambo wamwambijile mu kimwesho amba, “Ananyasa.” Ne aye amba, “Amiwa bano, Nkambo.”

¹¹ Ne Nkambo wamwambijile amba, “Imana, uyenga mu mukwakwa yebateela amba, waoloka, ukepuzhe ku nzubo yakwa Yudasa muntu jizhina janji Saulo, mwina Talasusa. Mambo tala, ubena kulomba,

¹² kabiji wamona muntu mu kimwesho jizhina janji Ananyasa watwela na kutenteka maboko anji pe aye amba amone jibiji.”

¹³ Bino aye Ananyasa wakumbwile amba, “Nkambo, namumvwa ku bantu bavula uno muntu, byoeboba byatama byavujisha bazhijikwa benu ba ku Yelusalema.

¹⁴ Kabiji ne kuno nako uji na luusa loatambula ku bang'anga bakatampe lwa kukasa bonse batela jizhina jenu.”

¹⁵ Bino Nkambo wamwambijile amba, “Yangatu, mambo aye kyo kintu kyami kyo nasalulula, kya kutwala jizhina jami ku Bangentila, ne ku ba mfumu, ne kubena Isalela.

¹⁶ Mambo amiwa nkamumwesha byo kuji kuvula kwabyo abya bintu bya malwa byo afwainwa kumona mu jizhina jami.”

¹⁷ Byonkabyo Ananyasa wayile, wakatwelele mu nzubo. Ne aye wa mu tentekele maboko anji ne kumwambila amba, “Mukwetu Saulo, aye Nkambo Yesu, yenkaye wimumwekejile mu jishinda byo mwaishilenga, ye wantuma amba, mumone jibiji ne kuyulwa na Mupashi Wazhila.”

¹⁸ Kabiji ponkapo pa meso anji paponene biji nobe mabamba, ne kumona kamone. Ponkapo waimene ne kubatizhiwa;

¹⁹ kabiji byo apwishishe kuja kajo ngovu yanji ya bwelelemo. Kabiji aye Saulo waikajile moba amo na baana babwanga bajinga mu Damasakasa.

Saulo byo asapwijile mu Damasakasa

²⁰ Kabiji ponkapotu wasapwijilenga mambo a Yesu mu mashinagoga amba “Ye Mwana Lesa.”

²¹ Kabiji bonse bamumvwine bakuminye ne kwamba amba, “Olo! Uno kechi yewibepayilenga mu Yelusalema batelanga jino jizhina? Nanchi kechi kyo aishijile kuno amba, nkebatwale mu mfungwa ku bang'anga bakatampe nyi?”

²² Pakuba aye Saulo, bulume bwanji bwayilenga na kuvula, kashinke ne bulaka bwa Bayudea baikajile mu Damasakasa, pa kwibalumbulwila amba, uno yenka ye Kilishitu.

²³ Ne pakupitapo moba avula, Bayudea bamumvwang'ejile amba, bamwipaye,

²⁴ pakuba akya kyo bafukwile kuuba kyayukanyikilwe kwi Saulo. Bapembelejilenga ku bibelo mute ne bufuku amba bamwipaye.

²⁵ Bino baana banji babwanga bamutwajile bufuku ne kumupisha pansakwa, kasa bamwikizha bitende, bitende mu kyaabo.

Saulo byo ajinga mu Yelusalema

²⁶ Kabiji byo afikile ku Yelusalema, aye waesekele amba elamikeko ku baana babwanga. Bino bonsetu bamuchiine, mambo kechi bamuswile amba ye mwana wabwanga ne.

²⁷ Pakuba Banabasa wamushikwile ne kumuleeta ku batumwa ne kwibabula moamumwekejile Nkambo mu jishinda, ne Nkambo byoesambile nanji, ne byoasapwijilenga mu jizhina ja Yesu na kuchinchika mu Damasakasa.

²⁸ Byonkabyo aye waikajilenga naabo kasa atwela ne kulupuka mu Yelusalema, kasa asapwilatu mu jizhina ja Nkambo na kuchinchika.

²⁹ Kabiji aye wa ambilenga ne kupachika naabo Bahelena. Pakuba abo basakilenga kumwipaya.

³⁰ Kabiji balongo pa kwikiyuka, bamutwajile ku Kesalea, ne kumwimanya amba, ayenga ku Talasusa.

³¹ Kabiji byonkabyo kipwilo kya monse mu Yudea ne mu Ngalilea ne mu Samaliya kyamwene mutende, ne kukoma kyakomene, ne kwenda na kwakamwa Nkambo, ne mu bukwasho bwa Mupashi Wazhila, kasa kiya na kubaya.

Petelo mu Lida ne mu Yopa

³² Aye Petelo byo apitang'enenga monsetu, waishile ne ku bazhijikwa bajinga mu Lida.

³³ Wataineko muntu, jizhina janji Eneasa, walajilenga pa mwanya wanji myaka itanu na isatu, wabelelenga kalepu.

³⁴ Kepo Petelo a mwambijile amba, “Eneasa, Yesu Kilishitu wimubuka, imanai mwanshike mwanya wenu.” Kabiji ponkapotu waimene.

³⁵ Ne bonse baikajile mu Lida ne mu Salona bamumwene, ne kwaluluka ba alulukijile kwi Nkambo.

³⁶ Kabiji mu Yopa mwajinga mwana wabwanga umo wamukazhi, jizhina janji Tabita, (pa kulumbulula ko kuuba amba Dokasi.) Aye wavujile mingilo yawama ne kupana bya bupe byavula ku balanda.

³⁷ Kabiji mu onkao moba aye waponejile mu kikola, ne kufwa wafwile, byo bamovwele, bamutujile mu nzubo ya peulu.

³⁸ Kabiji ku Lida, byo kwajinga kwipi na ku Yopa, baana babwanga, byo ba umvwine amba, Petelo uji konka, batumineko bantu babiji na kumusashijila amba, “Kechi mubande kwiya kotuji ne.”

³⁹ Ponkapo Petelo waimene, kaye ne naabo. Pakufikako bamutwajile mu nzubo ya peulu. Ne bonse banabakazhi bafwilwa baimene ko ajinga kasa bajila, ne kumumwesha mikangyo ne bivwalo bikwabo byo asonene Dokasi, byo akijinga naabo.

⁴⁰ Ne aye Petelo wibalupwilemo bonse, ne pa kufukama panshi walombele; kabiji waalukijile ku mufu, ne kumwambila amba, “Tabita, buka!” Ponkapo walabile; ne pa kumona Petelo, wabuukile ne kwikala.

⁴¹ Ponkapo Petelo wamutambikile kuboko, wamwimenye; ne kwita waichile bazhijikwa ne banabakazhi bafwilwa, wibapeleye ke mumi.

⁴² Kabiji kino kyayukanyikilwe ne monsetu mu Yopa, ne bavula bamwitabijile Nkambo.

⁴³ Ne aye waikajilemo moba avula mu Yopa kwi Shimona sendwe wa biseba.