Byubilo 8 - KNTP

¹ Ne Saulo waitabizhe lufu lwanji. Kabiji pa jonkaja juba kwabuukile lupato lukatampe lwa kwikipata kipwilo kya mu Yelusalema. Ne bonse bapalang'ejile monse mu Yudea, ne mu Samaliya, poso bonka batumwa.

Kipwilo byo bekimwesheshe byamalwa kwi Saulo

² Kabiji banabalume batekanya bamuzhiikile Setepena, ne kumujila bingi na mabingo akatampe.

³ Pakuba aye Saulo waonawinenga kipwilo, kasa atwela mu mazubo, na kwibakulumunamo banabalume ne banabakazhi ne kwibataya mu kaleya.

Mambo Awama byo asapwijilwe mu Samaliya

⁴ Kabiji aba bapalang'enejilemo bayilenga na kusapwila Mambo Awama.

⁵ Filipa wayile ku Samaliya, na kusapwila mambo a Kilishitu.

⁶ Ne mabumba ateeleko muchima ku byambo bya ambilenga Filipa na muchima umotu, byo ba umvwine ne kumona biyukilo byo aubilenga.

⁷ Mambo bavula bajinga na bapashi babipa bafuminengamo mwi abo, kasa batama na jiwi jikatampe, ne bavula babelelenga kalepu, nangwa balemana babukilwe.

⁸ Byonkabyo mwajinga lusekelo lukatampe mu yewa muzhi.

Shimona nga'anga wa lubuko

⁹ Bino kwajinga muntu umo jizhina janji Shimona, ye waubilenga bingelekezha kala mu yewa muzhi kabiji walengeshe bena Samaliya kukumya, kasa etumbijika amba yami mukatampe,

¹⁰ Ne bonsetu batele michima koaji, kufuma kumwanyike kufika ne ku mukulumpe amba, “Uno bo bulume bwa Lesa bwatelwa amba, bo bukatampe.”

¹¹ Kabiji bateleko muchima kwi aye, mambo aye kimye kyabaya wibalengeshanga kukumya na bya bung'anga bwanji.

¹² Bino byo baitabijile kwi Filipa byoasapwijilenga Mambo Awama a bufumu bwa Lesa ne a jizhina ja Yesu Kilishitu, ba batizhilwe banabalume ne banabakazhi.

¹³ Ne aye Shimona waitabijile, kabiji byo abatizhilwe waikajilenga ne Filipa. Ne byo amwene biyukilo ne mingilo ya bulume ikatampe byaubilwenga, wakuminye.

¹⁴ Kabiji batumwa bajinga mu Yelusalema byo ba umvwine amba bena Samaliya batambula mambo a Lesa, bebatumijile ba Petelo ne Yoano.

¹⁵ Ne abo bafikileko, be balombelejile amba batambule Mupashi Wazhila.

¹⁶ Mambo waji ukyangye kwibekijila nangwa pa muntu umo ne, bino ba batizhilwetu mu jizhina ja Nkambo Yesu.

¹⁷ Ponkapo be batentekele maboko abo ne kutambula batambwile Mupashi Wazhila.

¹⁸ Kabiji aye Shimona byo amwene amba Mupashi Wazhila upanwa pa kwibatenteka maboko batumwa, waletele mali,

¹⁹ amba, “Bampe ne amiwa buno bulume, bwa kuuba ne amiwa ye nabiika maboko ami, watambula Mupashi Wazhila.”

²⁰ Bino Petelo wamwambijile amba, “Mali obe onaike ne obewa mwine pamo, mambo obewa walanguluka amba, wakonsha kutambula kya bupetu kya Lesa na mali.

²¹ Kechi ujimo na lubaji nangwa pachechetu mu ano mambo ne, mambo muchima wobe kechi waoloka ku meso a Lesa ne.

²² Lapila, ku buno bubi bobe, ne kulomba kwi Nkambo amba, kana apo kino kintu kiji mu muchima obe kisakukulekelwa.

²³ Mambo namona byo uji na ndulu ya bululu ne mu mfungwa ya bubi.”

²⁴ Kepo Shimona a ambijile Petelo ne Yoano amba, “Ndombelelaiko anweba kwi Nkambo, namba abyo byo mwa amba kechi bimfikile nangwa kimo ne.”

²⁵ Byonkabyo abo, byo bashimwine ne kwamba naabo mambo a Nkambo, babwelele ku Yelusalema, kasa basapwila Mambo Awama mu mizhi yavula ya bena Samaliya.

Filipa ne ntungu wa ku Itiopia

²⁶ Kabiji malaika wa Nkambo wamwambijile Filipa amba, “Imana, uyenga ku kabeta ka bulenge mu jishinda jafuma ku Yelusalema jaya ku Gaza japita mungyetu.” (Mu kiselebwa.)

²⁷ Ne aye waimene kaye. Kabiji kwajinga muntu mwina Itiopia, ntungu wapewe luusa lukatampe kwi Kandese mfumu wamukazhi wa bena Itiopia, aye wajinga kalama wa nsabo yanji yonse, waishile ku Yelusalema na kupopwela,

²⁸ kabiji wabwelelenga kasa aikala mu kalaki wanji. Kasa atanga mu buku wa Isaya ngauzhi.

²⁹ Ponkapo Mupashi Wazhila wamwambijile Filipa amba, “Fwenya kubwipi, ulamate kuyewa kalaki.”

³⁰ Kepo Filipa anyemejile konka kabiji wamumvwine byo atangilenga mu buku wa Isaya ngauzhi ne aye wamwipwizhe amba, “Mubena kwibyumvwa byo mubena kutanga nyi?”

³¹ Ne aye wa ambile amba, “Nakonsha kumvwa byepi kwakubula ne wa kundumbulwila?” Ne aye wamwichile Filipa kukanjila mu kalaki ne kwikala nanji.

³² Pene poatangilenga mu binembelo, po pa byo bino byambo amba, “Bamutwajile nobe mukooko ye basaka kwipaya, byonka bizhindama mwana mukooko mu kyenyi kya bamutenda boya, byonkabyo ne aye kechi wa asamikile kanwa kanji amba ng'ambe ne.

³³ Mu kupelulwa kwanji bafumya kuchibilwa nsambu yanji. Ng'anyi ukamba mambo a kisaka kyanji? Mambo mweo wanji bamufumyapo pano pantanda.”

³⁴ Kabiji aye ntungu wamwambijile Filipa amba, “Nemusashijila namba aye ngauzhi pa kwamba bino wateela ng'anyi? Aye mwine nyi, inyi muntu mukwabo?”

³⁵ Ponkapo aye Filipa watendekele kwamba, watatwile pa kyonkakya kinembelo ne kusapwila wamusapwijile mambo a Yesu.

³⁶ Ne byo bakiilenga mu jishinda, bafikile ne kwajinga mema, kumvwa aye ntungu amba, “Talai mema ao, kisakunkanya kubatizhiwa i kika?”

³⁷ Ponkapo Filipa wamwambijile amba, “Umvwe mwaitabila na muchima wenu yense, mwakonsha kubatizhiwa.” Kumvwa aye amba, “Naitaba namba, Yesu Kilishitu ye Mwana Lesa.”

³⁸ Ponkapo wakambiizhe kalaki amba emane, kabiji bonse babiji baikijile mu mema, Filipa ne aye ntungu, kabiji wa mubatizhile.

³⁹ Kabiji byo batuntukile mu mema, Mupashi wa Nkambo wamutwajile Filipa, ke kikupu, ne aye ntungu kechi wamumwenepo jibiji ne, kabiji wayile mu jishinda janji na lusekelo.

⁴⁰ Bino Filipa watainwe pa Azotusa kabiji wapichile mu kyalo kasa asapwila Mambo Awama mu mizhi yonse, ne byo akafikile ku Kesalea.