Byubilo 7 - KNTP

Byambo bya ambile Setepena

¹ Ponkapo aye ng'anga mukatampe wa ambile amba, “Bino byoibyo nyi?”

² Kumvwa aye amba, “Anweba bakwetu ne bashetu, ng'umvwai! Lesa wa lukumo wamwekele ku mushakulu wetu Abulahama, byo akijinga mu Mesopotamya, kasa akyangye kwikala mu Halani,

³ ne kumwabila amba, ‘Fuma mu kyalo kyobe ne ku balongo bobe, uye ku kyalo kyo nsakukubuula.’

⁴ Ponkapo aye wafumine mu kyalo kya bena Kalodeya, ne kwikala waikele mu Halani. Byo afwile shanji, Lesa wamufumishemo ne kumuleeta ku kyo kino kyalo, kyo mwaikalamo anweba pano.

⁵ Kabiji kechi wamupelepo pa kwikala muno ne, nangwa pachechetu pafwainwa kunyantapo kuulu ne, wamulayile amba, nkakupakyo kikekale ke kyobe, ne kya ba munkunwa yobe baka kulondela panyuma, nangwa wajinga ukyangye kwikala na mwana.

⁶ Ne Lesa wa ambile byonkabyo amba, ba munkunwa yobe bakekala bwenyi mu kyalo kingi, bakebalula ke bazha, ne kwibamanyika, myaka bitota bina.

⁷ Bino amiwa nkakabisha awa mukoka ye bakengijila, byo bya ambile Lesa, kabiji palutwe bakafumamo ne kumpopwela monka muno.

⁸ Ne aye wamupele lulayang'ano lwa mukanda. Kabiji byonkabyo Abulahama wasemene Izaka, ne kumutwezha mu mukanda mu juba ja butanu na busatu, kabiji Izaka naye wasemene Yakoba, ne Yakoba naye wasemene aba bashakulu jikumi ne babiji.”

⁹ “Kabiji aba bashakulu byo bamubijile kichima Yosefwa, bamupoteshe, ne kumutwala mu Ijipita; bino Lesa wajinga nanji,

¹⁰ kabiji wamupokolwele ku kumanama kwanji konse ne kutalwa bulongo ne maana ku meso a Felo, mfumu wa mu Ijipita, ne aye naye wamupele bundamakyalo bwa mu Ijipita, ne bwa pa nzubo yanji yonse.

¹¹ Kabiji kwaishile kipowe kya nzala mu kyalo kyonse kya Ijipita, ne mu kyalo kya Kenana, ne malwa akatampe. Ne bashakulu betu bakankelwe kumona kajo.

¹² Bino aye Yakoba byo a umvwine amba ku Ijipita ko kuji kajo, watumineko bashakulu betu pa lwendo lwabo lutanshi.

¹³ Kabiji pa lwendo lwa bubiji Yosefwa wisolwele ku balongo banji, ne kisaka kyanji Yosefwa kyayukanyikilwe kwi Felo.

¹⁴ Kabiji aye Yosefwa watumineko jiwi na kumwita shanji Yakoba koaji ne kisaka kyanji kyonse, bantu makumi atanu na abiji ne bantu batanu.

¹⁵ Ne aye Yakoba wayile ku Ijipita, ne kufwa wafwijile monka, aye ne bashakulu betu pamo.

¹⁶ Kabiji bebatwajile ku Shekema, ne kwibabiika mu kilende kyapotele Abulahama na mutengo wa mali ku baana ba Hamola mu Shekema.”

¹⁷ “Bino byo afwenyenye pepi awa mwaka ye bamulayile Abulahama kwi Mwine Lesa, aba bantu bavujile bingi mu Ijipita;

¹⁸ kufika ne byo apingilepo mfumu ungi wabujile kumuyuka aye Yosefwa.

¹⁹ Ye wajimukijile kisaka kyetu ne kwibakanjikizha bashakulu betu kusha pangye ya mazubo abo twana twabo twalukeke amba, kechi twikale na bumi ne.

²⁰ Po pa kimye kyasemekelwe Mosesa, aye wajinga wawama bingi ku meso a Lesa. Walelelwe monka mu nzubo ya ba shanji bang'ondo basatu;

²¹ kabiji byo bamutujile kungi, mwana Felo wamukazhi wamutolele, ne kumulela ke mwananji mwine.

²² Kabiji aye Mosesa bamufunjiishe maana onse a bena Ijipita kabiji wajinga kilobo mu byambo byanji ne mu mingilo.”

²³ “Mosesa byo afikizhe myaka makumi ana, kyaishile mu muchima wanji kupempula balongo banji bena Isalela.

²⁴ Kabiji byo amwene umo mwina Ijipita kasa amumanyika mwina Isalela, wamupokolweleko, ne kumulwila awa ye bamanyikilenga ne kushinkanya nanji mwina Ijipita, ne kumwipaya.

²⁵ Ne aye walangulukile amba, balongo bami bayuka amba, Lesa ubena kwibapokolola na kuboko kwanji, bino abo kechi bayukile ne.

²⁶ Kabiji juba ja londejilepo aye wibataine babiji kasa batoboka, wasakile kwibapwanya bulongo amba, anweba bantu mwi balongo na balongo. Mambo ka kyo mubena kwiubila byatama anweba bene na bene?

²⁷ Bino awa waubilenga mukwabo byatama wamushinjikile amba, ng'anyi wakupa bundamakyalo ne bukulumpe bwa kwituchibila mambo?

²⁸ Usaka kungipaya pamo byonka byo waipayile mwina Ijipita keesha nyi?

²⁹ Pakumvwa bino ponkapo Mosesa wanyemene, ne kwikala bwenyi mu kyalo kya Mijanyi, mo moasemene baana babiji ba balume.”

³⁰ “Kabiji pakupita myaka makumi ana, malaika wamumwekejile mungyetu ku mutumba wa Sinai, mu lubeebe lwa mujilo mu kipuupu.

³¹ Kabiji Mosesa byo ekimwene wakuminye, wafwenyenye kwipi amba ne kimweshe, ponkapo wa umvwine jiwi ja Nkambo amba;

³² ‘Amiwa ne Lesa wa bashakulu bobe, ne Lesa wa kwa Abulahama, ne wa kwa Izaka, ne wa kwa Yakoba.’ Ne Mosesa wazakamine, kabiji wachiine kutalako.

³³ Ne aye Nkambo wamwambijile amba, vuula makwabilo ku maulu obe, mambo po waimana po pa mushiji wazhila.

³⁴ Kine namona malwa a bantu bami baji mu Ijipita, kabiji naumvwa kubinza kwabo, kabiji naikila namba nebapokolole. Kabiji pano iya, nkutume mu Ijipita.”

³⁵ “Mosesa ye basujile amba, ng'anyi wakupa bundamakyalo ne bukulumpe bwa kwituchibila mambo. Ye yenka ye atumine Lesa amba, ekale ke ndamakyalo, ne mukuzhi na kuboko kwa malaika wamumwekejile mu kipuupu.

³⁶ Uno muntu ye wibafumishemo, byo apwishishe kuuba bya kukumya ne biyukilo mu ntanda ya Ijipita, ne ku Kalunga Kachila, ne mu kiselebwa myaka makumi ana.

³⁷ Uno ye yenkawa Mosesa, wa ambijile bena Isalela amba, ‘Monka mu balongo benu Lesa ukemwimenyamo ngauzhi pamo ne amiwa.’

³⁸ Uno ye yewa wajinga na kipwilo kya mungye na malaika, yenkawa wisambile nanji ku mutumba wa Sinai. Wajinga na bashakulu betu. Ye watambwile byambo bya bumi bya kwitupa atweba.”

³⁹ “Ye bakaine kukookela bashakulu betu, ne kumushinjikila kungi, ke babwezhe michima yabo ku Ijipita.

⁴⁰ Ne kwambila Alona amba, ‘Mwitulengele ba lesa ba kwitutangijila. Mambo awe Mosesa, witufumishe mu kyalo kya Ijipita, kechi twayuka kyamumwekela ne.’

⁴¹ Kabiji mu oa moba balengele kipashang'ano kya mwana ng'ombe, ne kuleeta kitapisho kuyewa nkishi, kabiji basekejile mu mingilo ya ku maboko abo.

⁴² Bino Lesa wibavundamijile ne kwibaleka amba bapopwele bintu bya mwiulu, monka mo kyanembelwa mu buku wa bangauzhi amba,” “Lelo anweba ba munzubo ya Isalela. Mwandambwilenga banyama ba kwipaya ne bitapisho myaka makumi ana mungyetu nyi?

⁴³ Mwashikwile tente wa Moloka, Ne kabangabanga ka awa lesa Lefanyi, Byo bipashang'ano byo mwalengele amba, twibipopwelenga. Kabiji nkemutwala ku bushiya bwa Babilona.”

⁴⁴ “Bashakulu betu bajinga na Tente wa lushimuno mungye, monka mo atongwejile aye wamubujile Mosesa amba, amulenge pamotu na kyokya kipashang'ano kyo amwene.

⁴⁵ Ye baleetele bashakulu betu bapingilepo, byo batwelele ne Yoshua mu kyalo kya Bangentila, boapangile Lesa ku meso a bashakulu betu, kufika ne ku myaka ya Davida.

⁴⁶ Ye wamwene lusa ku meso a Lesa, kabiji waipwizhe lusa lwa kumumwena mwa kwikala, aye Lesa wa Yakoba.

⁴⁷ Bino Solomone ye wamutungijile nzubo.”

⁴⁸ “Byonkabyo Aye Mwine kechi wikala mu mazubo obatunga na maboko ne; monka mwa ambijile ngauzhi amba,”

⁴⁹ “Mwiulu jo jitanda jami, panshi kyo kipona kya maulu ami. Ng'anyi musango wa nzubo yo mukantungila? Byo byaamba Nkambo, nangwa po nkakokolokela po pepi?”

⁵⁰ Kechi kuboko kwami kwalengele bino byonse nenyi?

⁵¹ “Anweba bauma mashingo! Ne ba michima ne matwi byabula kutwezhiwa mu mukanda, mukelwa kukanya Mupashi Wazhila. Monka mwaubijile bashakulu benu ne anweba mo monka.

⁵² Ng'anyi ngauzhi ye babujile kupata bashakulu benu? Kabiji bebepayile ba ambilejilenga jimo na mambo a kwiya kwa aye Mololoke. Kabiji anweba pano yenu mwamusolola ne kumwipaya.

⁵³ Yenka anweba mwatambwile Mizhilo monka mo bemufikizhizheyo ku bamalaika ne kwiilama ne!”

Setepena byo bamwashile mabwe

⁵⁴ Pano abo byo bebyumvwine bino, bazhingijile ne kumushenkela ku meno.

⁵⁵ Pakuba aye, byo ayujile na Mupashi Wazhila, watajile mwiulu ne kumona lukumo lwa Lesa ne Yesu kasa aimana ku kilujo kya Lesa.

⁵⁶ Wa ambile amba, “Talai, namona jiulu jashinkuka, ne Mwana Muntu kasa aimana ku kilujo kya Lesa.”

⁵⁷ Ponkapo babijikishe na jiwi jikatampe ne kushinka mu matwi abo. Ne kumuvundumukilatu kya mumo,

⁵⁸ Ponkapo bamutayile pangye ya muzhi, ne kumwasa mabwe. Kabiji batumonyi batujile bivwalo byabo ku maulu a nsongwalume, jizhina janji Saulo.

⁵⁹ Kabiji byo bamwashilenga mabwe Setepena wabijikile kwi Nkambo amba, “Nkambo Yesu, tambulai mupashi wami!”

⁶⁰ Ponkapo wafukamine panshi, ne kubijika na jiwi jikatampe amba, “Nkambo! Kechi mwibape ano mambo ne!” Pa kupwisha kwamba byobyo, wafwile.