Byubilo 5 - KNTP

Ananyasa ne Safila

¹ Bino kwajinga muntu umo jizhina janji Ananyasa, ne mukazhanji Safila, bapoteshe bujimi bwabo.

² Wafumishepo mali amo ne kwiafya byo apoteshe, ne mukazhanji naye kasa ayuka, bino mali amo wialetele ne kwiatula ku maulu a batumwa.

³ Ponkapo Petelo wamwambijile amba, “Ananyasa, mambo ka Satana ayuzhizha muchima obe amba ubepe Mupashi Wazhila, ne kufyapo mali amo o wapotesha mushiji wobe?

⁴ Kasa ukyangye kumupotesha, kechi wajinga wobe nenyi? Ne byo wapoteshe, kechi wajinga na luusa lwakuuba na mali obe monka mo usakila nenyi? Mambo ka owabikila kino kintu mu muchima wobe? Kechi wabepa bantu ne, wabepa Lesa.”

⁵ Ponkapo Ananyasa pakumvwa byobyo byambo waponene panshi ne kufwa, ne moyo mukatampe wibakwachile bonsetu bekyumvwine.

⁶ Ne bansongwalume baimene ne kumuvungavunga, bamutwajile na kumuzhiika.

⁷ Kabiji pakupita kampe ma awala asatu, mukazhanji naye watwelele, kasa abula kuyuka akya kyaubiwe ne.

⁸ Kabiji Petelo wamwambijile amba, “Mbulai kana ano o mali onse o mwapoteshe mushiji wenu nyi?” Aye amba, “Ee, ibyo.”

⁹ Byonkabyo Petelo wamwambijile amba, “Mwaumvwang'ena ka pamo ku mweseka Mupashi wa Nkambo? Tala, maulu a baji kuya nakazhiika mwata obe aji pa kibelo, bo basakukutwala ne obewa.”

¹⁰ Ponkapotu waponene ku maulu anji, ne kufwa wafwile. Kabiji bansongwalume byo batwelele bamutaine wafwa, bamutwajile na kumuzhiika konka kobazhiikile mwata wanji.

¹¹ Ne moyo mukatampe wakwachile kipwilo kyonse ne bonse bebyumvwine bino bintu.

Biyukilo ne bya kukumya

¹² Pano biyukilo ne bya kukumya byavula byaubiwe ku maboko a batumwa mu bantu. Kabiji bonse baikele na muchima umo mu bukonde bwa Solomone.

¹³ Bino kafwako bangi bachinchikile nangwa umo amba belamikeko kwi abo ne, kabiji bantu bebanemekele.

¹⁴ Ne mabumba a baitabijile banabalume ne banabakazhi a nungilwengako kwi Nkambo.

¹⁵ Onkao mambo balupwijilenga bakolwa mu mikwakwa, ne kwibalajika pa myanya ne pa bilaalo, amba Petelo pakupita kimvule kyanji kiiye kipite nangwa pa umo.

¹⁶ Kabiji mabumba a bantu apwijile bafumine mu mizhi ya kubwipi na Yelusalema, baleetelenga bakolwa, ne bo bamanyikile ku bapashi babipa, ne bonsetu babukilwe.

Batumwa byo bamanyikilwe

¹⁷ Bino ng'anga mukatampe waimene, ne bonse bo ajinga naabo, kyo kipamo kya Basadusea, kabiji bebobijile bingi kichima.

¹⁸ Ne abo bebakwachile batumwa, ne kwibabika mu kaleya ka bonsetu.

¹⁹ Bino kimye kya bufuku malaika wa Nkambo washinkwile binzhilo bya kaleya, wibalupwilemo, ne kwibakambizha amba,

²⁰ “Yainga, mukemane mu nzubo ya Lesa mukebambile bantu byambo byonse bya buno bumi.”

²¹ Ne byo ba umvwine bino, batwelele mu nzubo ya Lesa pakusama juba, ne kufunjisha. Ponkapo ng'anga mukatampe ne bo ajinga naabo bepwizhizhe pamo bena kije, ne bonse bakulumpe bene ba bena Isalela ne kutuma jiwi ku kaleya amba bakebalete.

²² Pakuba bakalama byo bafikile bataine bafwamo mu kaleya, kepo babwelele na kwibabula amba,

²³ “Kaleya twikataana monka bekashinkila, ne baota kasa baimana pa bibelo, bino pakushinkulamo, twataana bafwamo.”

²⁴ Ponkapo byo ba umvwine bino byambo mukulumpe wa bakalama ba ku nzubo ya Lesa ne bang'anga bakatampe bekikuminye bingi, amba kino kyayila muka?

²⁵ Ponkapo kwaishile umo ne kwibabula amba, “Talai! Aba bantu bomwabikile mu kaleya baji mu nzubo ya Lesa, baimana na kufunjisha bantu.”

²⁶ Ponkapo mukulumpe wa bakalama ne bakalama bayile na kwibaleeta, bino kwakubula kwibashintaukila ne, mambo bachiine bantu kwibaasa mabwe.

²⁷ Kabiji byo bebaleetele, bebabikile mukije, ponkapo ng'anga mukatampe wibepwizhe amba.

²⁸ “Atweba twimukambiizhe bingi, namba kechi mufunjishenga mu jino jizhina ne. Ke ibyo nyi? Kabiji anweba mwakumbanya Yelusalema na mafunjisho enu, ne kusaka mwasaka kwitushinkamika mashi a ye uno muntu.”

²⁹ Kumvwa Petelo ne batumwa bakwabo amba, “Atweba twafwainwa kukookela Lesa kukila bantu.

³⁰ Aye Lesa wa bashakulu betu wamusangwile Yesu, ye mwaipayile anweba, byo mwamukobekele ku kichi.

³¹ Aye uno yenka, Lesa wamutumbijikile ku kuboko kwanji kwa kilujo amba, ekale Ntangi ne Mupulushi, ebape bena Isalela lulapilo ne lulekelo lwa mambo.

³² Ne atweba twi batumonyi ba byo bino byambo, ne Mupashi Wazhila naye pamo, ye apana Lesa ku bamukokela.”

³³ Kabiji abo, pakumvwa bino, bibazhingijishe bingi, ke basake kwibepaya.

³⁴ Pakuba umo Mufaliseo mukije jizhina janji Ngamaliela, mufunjishi wa Mizhilo kabiji washing'ama mu bantu bonse, wakambiizhe amba. Aki balupulaimo kakimye kacheche.

³⁵ Ne aye wibambijile amba. “Anweba bena Isalela, tekanyai nakyo musaka kwiboba bano bantu.

³⁶ Mambo kala kwaimene Teusadasa, witelele mwine amba ye mwine, kabiji kwaishile bantu bamo kampe bitota bina, bamwipayile ne bonse mo bavujile bamulondejilenga, bebapalang'enye kabiji kechi kwashajile nangwa umo ne.

³⁷ Kabiji palutwe, mukwabo naye waimene Yudasa mwina Ngalilea mu moba a kunembesha mazhina, ne aye waongwele bamo ne kumulondela bamulondejile, bino ne aye naye waipayiwe, ne bonse bamukookejile, bebapalang'enye.

³⁸ Byonkabyo ne pano nemwambila namba, balekai bano bantu ne kwibaleka bunke bwabo! Mambo inge ano maana ne uno mwingilo byo bya bantu bikazhimang'anatu,

³⁹ bino inge bya Lesa, kechi mukakonsha kwibashinda ne. Kuchiina amba mwakekala ke ba kulwa na Lesa.”

⁴⁰ Kabiji ne abo bamumvwine. Kabiji byo bebechile batumwa, bebapumine ne kwibakambizha amba, Kechi mukambe mu jizhina ja Yesu ne, ne kwibaleka bebalekele ke baye.

⁴¹ Byonkabyo bafumine mukije kasa basekela na mambo a kutongolwa amba, bo bafwainwa kwijimwena bumvu jizhina ja Yesu.

⁴² Ne moba onsetu mu nzubo ya Lesa ne kwabo, kechi balekele kufunjisha ne kusapwila Mambo Awama a Yesu amba ye Kilishitu ne.