Byubilo 4 - KNTP

Petelo ne Yoano ku meso a kije

¹ Kabiji byo bakyambilenga ku bantu, bang'anga ne mukulumpe wa bakalama ba ku nzubo ya Lesa ne Basadusea bebasolomokele,

² kasa bebazhingijila bingi mambo ba funjishenga bantu, ne kwibasapwila amba Yesu wasanguka mu bafu, ke kiyukilo amba bafu ba kasanguka.

³ Ponkapo bebakwachile, ne kwibabiika mu kaleya poso ke keesha, mambo ajinga ke mabanga.

⁴ Pakuba bavula ba umvwine lusapwilo baitabijile; ne pa kwibabala banabalume bafikile kampe ke biumbi bitanu.

⁵ Byo bwakiile lukeelo, bapwijile pamo mu Yelusalema, bandamakyalo babo, ne bakulumpe babo, ne banembeshi.

⁶ Ne Anasa ng'anga mukatampe ne Kaifasa, ne Yoano, ne Alekesanda, ne bonse mobavujila balongo bang'anga mukatampe.

⁷ Kabiji byo bebabikile mukachi, be bepwizhe amba, “Nanchi mu ng'anyi bulume nangwa mu ng'anyi jizhina mo mwaubila kino?”

⁸ Ponkapo Petelo, wayujile na Mupashi Wazhila, ne kwibambila amba, “Anweba bandamakyalo mulama bantu, ne bakulumpe,

⁹ inge leelo mwitwipuzha mambo a kintu kyawama kyamubijilwe uno muntu walemana ne moabukilwa,

¹⁰ yukai anweba bonse, ne ku bonse bena Isalela amba, uno muntu waimana ku meso enu ke mutuntulu mu jizhina ja Yesu Kilishitu mwina Nazala, ye mwaipayile pa musalabu anweba, ye asangwile Lesa mu bafu.”

¹¹ Yesu jo joja, “Jibwe jo mwalengulwile anweba bashimika jo jaaluka ke mutwe wa jikonka.”

¹² “Kabiji lupulukilo lujitu monka mwi aye, pakuba kechi paji jizhina jikwabo muno munshi japewa mu bantu jo twafwainwa kupulukilamo ne.”

¹³ Bino byo bamwene Petelo ne Yoano kasa bachinchika, ne kuyuka amba bajinga bantutu babula kufunda, bakuminye bingi. Kaiji bayukile amba, bajinga ne Yesu.

¹⁴ Ne byo bamwene muntu ye babukile kasa aimana naabo, kechi bajinga na mwakwikyambila ne.

¹⁵ Bino byo bebakambizhe amba, akifumaimo mukije, beipwizhe bene na bene amba,

¹⁶ “Lelo tusakwiboba byepi bano bantu? Mambo kine kino kiyukilo kya kukumya bobe kyuba, be kiyuka ku bonse bamu Yelusalema, kabiji kechi tuji ne mwa kwikikaina ne.

¹⁷ Bino kuchiina amba kyakakumbana mu bantu, twibafunde kechi bambe jibiji nangwa ku muntu umo mu jo jino jizhina ne.”

¹⁸ Byonkabyo bebechile ne kwibakambizha amba, kechi bambe ne kufunjisha nangwa pachechetu mu jizhina ja Yesu ne.

¹⁹ Bino ba Petelo ne Yoano bebakumbwile amba, “Pwishai kana kyawama ku meso a Lesa kwi mukookela anweba kukila kumukookela Lesa nyi?

²⁰ Mambo atweba kechi twakonsha kuleka kwamba bintu byotwamwene ne byo twaumvwine ne.”

²¹ Ne abo, byo bebafunjile jibiji bebalekele, byo babujile kumona bya kwibakabishishamo na mambo a bantu; mambo bantu bonse bamutumbijikilenga Lesa, pa kyokya kyaubilwe.

²² Mambo awa muntu wabukilwe na kya kukumya, myaka yanji yakijile makumi ana.

Baitabila byo balombele amba bekale bachinchika

²³ Kabiji byo bebalekele, bayile ku balongo babo, na kwibabula byonse byo bebambijile ku bang'anga bakatampe ne bakulumpe.

²⁴ Ne abo, pa kwibyumvwa basanswile mawi abo kwi Lesa na muchima umo amba, “Anweba Nkambo, mwalengele jiulu ne ntanda, ne kalunga ka mema, ne byonse bijimo!

²⁵ Mwa ambile na Mupashi Wazhila, mu kanwa ka mushakulu wetu Davida, muntu wenu wamwingilo amba,” “Mambo ka o bazhingijila Bangentila, Mambo ka ne bantu nabo balangulukila byatu?

²⁶ Bamfumu ba pano pantanda beimanya nzhita ne bandamakyalo bamubungulukila Nkambo ne Mushingwa wanji.

²⁷ Mambo kine monka mu yeuno muzhi, Heloda ne Pontiusa Pilato, ne Bangentila ne bena Isalela, bonse bamubungulukile Yesu wamwingilo wenu wazhila, ye mwashingile manyi.

²⁸ Kumuba byonse byo mwafukwijile jimo kuuba na bulume bwenu.

²⁹ Ne pano Nkambo, talai abo byo bapinga bipingo, kabiji mwibape bakalume benu kwamba mambo enu na kuchinchika.

³⁰ Mutanyike kuboko kwenu ne kwibabuka bantu, kabiji ne biyukilo ne bya kukumya byubiwe mu jizhina ja wamwingilo wenu wazhila Yesu.”

³¹ Ponkapo byo balombele, ne momwa mobapwijile mwasunkene, ne bonse bayujile na Mupashi Wazhila, ke bambetu mambo a Lesa na kuchinchika.

Baitabila byo bekwashishenga na bya bunonshi bwabo

³² Ne jibumba ja baitabila bajingatu na milanguluko imo ne na muchima umo. Kafwako nangwatu umo watelele kintu kya mu bunonshi bwanji amba kyami amiwa mwine ne, kabiji byonse byo bajinga naabyo byajinga bya bonse.

³³ Ne na bulume bukatampe batumwa bashimwinenga mambo a lusanguko lwa Nkambo Yesu, ne bupe bukatampe bwaikajile pe abo bonse.

³⁴ Mwi abo kechi mwajinga nangwa umo wakajilwe ne. Mambo bonse bajinga na mishiji nangwa na mazubo bebipoteshenga, kabiji baletelenga mali o bamwenejilemo,

³⁵ ne kwiatula ku maulu a batumwa, ne kwiabanya ku bonse monka mwayijile kukajilwa kwabo.

³⁶ Kabiji Yosefwa, ye batumbile batumwa jikwabo amba Banabasa (pa kulumbulula, ko kuuba amba, “Mwana wa bukwasho,”) mwina Levi wasemekejilwe ku Kipilusa,

³⁷ wajinga na bujimi bwanji bo apoteshe, ne mali wialetele ne kwiatula ku maulu a batumwa.