Byubilo 3 - KNTP

Kubukwa kwa walemana maulu

¹ Ba Petelo ne Yoano bakanjijilenga mu nzubo ya Lesa pa kimye kya milombelo, po pa kulemba juba.

² Kabiji baleetele mwanamulume kasa bamupaapa, kilema maulu kufuma pa kusemwa kwanji, bamutujilenga pa juba pa juba ku kibelo kya nzubo ya Lesa, kyobatelele amba, “Kibelo kya Buya,” na kulomba bukwasho ku batwela mu nzubo ya Lesa.

³ Aye pa kumona ba Petelo ne Yoano, ke basake kutwela mu nzubo ya Lesa, wibalombele amba bamupepo kya bupetu.

⁴ Petelo wamutajijishe, ne Yoano pamo, ne kumwambila amba, “Talai kuno!”

⁵ Ne aye wateeleko muchima kwi abo, na luketekelo lwa kutambula kintu kufuma kwi abo.

⁶ Pakuba Petelo wa ambile amba, “Siliva ne a ngolode kechi nji nabyo ne, pakuba kyonji naakyo, nsakwimupa. Mu jizhina ja Yesu Kilishitu mwina Nazala, imanai mwende.”

⁷ Ne aye wamukwachile pa kuboko kwa kilujo, ne kumwimanya; ponkapo maulu anji ne tupokoso twanji byakosele.

⁸ Ne aye wakilukile, ne kwimana, ne kwenda kaende; ne kutwela watwelele naabo mu nzubo ya Lesa, kasa enda ne kukilauka, ne kutota Lesa.

⁹ Ne bantu bonse bamumwene saenda na kutota Lesa,

¹⁰ ne abo bamuyukile, amba, i ye waikajilenga na kulomba ku kibelo kya nzubo ya Lesa, ne abo bakuminye bingi na kyokya kyamumwekele.

Lusapwilo lwa Petelo mu nzubo ya Lesa

¹¹ Ne aye byo ebakakachile ba Petelo ne Yoano, bantu bonse bebanyemejile mu bukonde bo batelele amba, bwa Solomone, kasa bakumya bingi.

¹² Petelo byo ekimwene, wa ambijile bantu amba, “Anweba bena Isalela, mambo ka kyomwakuminya kino kintu, kabiji mubena kwitutajiisha atweba, nobe atweba bene twamwendesha ku bulume bwetu nangwa na kunemeka Lesa kwetu?

¹³ Bino aye Lesa wakwa Abulahama ne Izaka, ne Yakoba, Lesa wa bashakulu betu, ye watumbijika wamwingilo wanji Yesu. Yemwazhachiishe anweba, ne kumukana ku meso a Pilato, byoafukwiile kumukasulula.

¹⁴ Pakuba anweba mwamukaine yenkaye Wazhila ne Waoloka, mwasakile amba bemupeeko mbanzhi,

¹⁵ ne kwipaya mwaipayile Upana bumi, ye asangwile Lesa mu bafu, ne atweba twi batumonyi banji.

¹⁶ Kabiji mu lwitabilo lwa mu jizhina janji, uno muntu yemwamona, ne alwa lwitabilo luji mwi aye, lo lwamupa buno butuntulu ku meso enu anweba bonse.”

¹⁷ “Byonkabyo anweba bakwetu nayuka namba, mwikyubile na bakulumpe benu pamo na mambo a kubula kuyuka.

¹⁸ Pakuba abya bintu byo a ambijile jimo Lesa mu kanwa ka bangauzhi banji, amba, Kilishitu wami ukamanama, aye wibifikizha.

¹⁹ Byonkabyo lapilai, ne kwaluluka, mambo enu afuchiwe,

²⁰ amba kukeye myaka ya kubwezha michima ifuma ku meso a Nkambo, kabiji ukatuma ne Kilishitu, ye bemutongwela, yenkaye Yesu.

²¹ Ye wafwainwa kwikala mwiulu poso ifike myaka ya kubwezha byonse, byo a ambile Lesa kala mu kanwa ka bangauzhi banji bazhila.

²² Ne Mosesa kine wa ambile amba, Nkambo Lesa ukemwimenya ngauzhi wanji mu balongo benu, byonka biji amiwa, ne aye mukamumvwe mu byonse byo ake mwambila.

²³ Kabiji bonse bakabula kumukookela awa ngauzhi, bake bonaunatu mu bantu, pelu!

²⁴ Kine ne bangauzhi bonse kufuma kwi Samwela, ne bamulondejile bonse mobavujila, ba ambilenga mambo a ano moba,

²⁵ Anweba mwi baana ba bangauzhi, kabiji mwi baana bamu lulayang'ano loalayang'ene naabo Lesa bashakulu benu, byo a mwambijile Abulahama amba, mu lukunwa wobe mikoka yonse ya pano pantanda ikamwenamo bibusa.

²⁶ Lesa byo amusangwile wamwingilo wanji, wamutumine kwi anweba patanshi, na kwimupesha, amba anweba bonse muvundamine ku bubi bwenu.”