Byubilo 27 - KNTP

Lwendo lwa kwa Paulo kuya ku Loma

¹ Kabiji byo kyafukwilwe amba, tuye mu bwato ku Italya, bapaine Paulo ne bamo bakwabo bakaili ku mukulumpe wa bashilikale, jizhina janji Julyasi, wa kipamo kya Augusatusa.

² Kabiji pa kuya mu bwato bwa ku Adalamituma, bo bwasakile kuya ku mizhi ya ku mukulo ya mu Asha, twaendele mu bwato pamo ne Alisatakusa mwina Makedonya wa ku Tesalonika ye twajinga nanji.

³ Byo bwakiile lukeelo twafikile pa Shidona. Ne Julyasi wamubijile lusa Paulo kabiji wamuswishishe kuya ku balunda nanji na kutambulako byo a kajilwe.

⁴ Byo twafumineko, twasezhezhe Kipilusa kwazhitama na mambo a lubesha wapupilenga mu meso.

⁵ Kabiji byo twaabukile kalunga ka mema kaji ku Kilikya ne Pamfilya, twafikile ku Mila muzhi wa mu Lisya.

⁶ Kabiji konkakwa aye mukulumpe wa bashilikale wataine bwato bwa ku Alekesandiliya bwasakilenga kuya ku Italya, kabiji aye witubikile monka.

⁷ Twayilenga pacheche moba avula ne kufika pamwekela Kinidiusa kasa tumona lukatazho, kabiji lubesha byoetukainye kuya kulutwe, twayile kasa tusezha Keleta kwazhitama, pamwekela Salamona.

⁸ Kabiji twamwene byakatazha, twafikile kuntu kutelwa amba, Pakiito Kiyampe, pepi na ku muzhi wa Laseya.

⁹ Byo twaikajileko kimye kyabaya, ne lwendo byo lwaubile ke lwakatazha, mambo moba a kuzhikilwa na nzala apichile kala, Paulo wibajimwine,

¹⁰ ne kwibambila amba, “Mwane, pano namona namba luno lwendo lwa pa mema lukaleeta bya malwa ne bono bwabaya, kechi ku bwato bonka ne, ne bintu bijimo, nanchi ne ku myeo yetu pamo.”

¹¹ Bino aye mukulumpe wa bashilikale watesheshe bingi muchima kwi kapitenyi ne ku mwina bwato, kukila ku bya ambile Paulo.

¹² Kabiji mambo Pakiito byo pabujile kuwama kwikalapo mu ba ng'ondo ba mashika, bamo bavula ba ambile amba, tufumeko tuyenga kana tukafike ku Fenese, ne kwikala konka mu ba ng'ondo ba mashika. Ko kukiito kya ku Keleta, kyatala ku musela na ku kabeta ka bulenge muzhika ne ku kabeta ka buyeke muzhika.

Lubesha pa kalunga ka mema

¹³ Pano lubesha wa ku kabeta ka ku bulenge byo a pupilenga pacheche, abo balangulukile amba, pano bamona kyo basakilenga, ba abwile kimiko ketusezhe Keleta kwipi na ku musezho.

¹⁴ Bino pakupitatu ka kimye kacheche kwaishile kipuupu kikatampe kyafumine ku ntanda, kyo batela amba Eulakwilo.

¹⁵ Kabiji bwato byo bwakwachilwe naakyo, ne kukonsha kwibutazha kwaishijilenga mwela ne, twibulekeletu kasa bebutwala na mwela.

¹⁶ Pakupita kwapela kajikuji kobateela amba Kaluda kwazhitama, ku kabeta kabulenge. Twamwene mwa kwikakashila bulongo kabwato kajingako, nakyo na lukatazho lukatampe.

¹⁷ Byo bekakokejile pa bwato bashikwile ntambo ne kwiipisha munshi ya bwato amba twibukoseshe. Pakuba byo bachiine amba twakapita pa buchichi bwa Sulatisa, baikizhe kisapi kya bwato, ne kuleka bwato kasa buyatu na mwela.

¹⁸ Kipuupu byo kyatwajijiletu na kupupishatu ne kwitukabisha, lukeelo batatwile kufumyamo bipe bimo ne kwibitaya mu mema,

¹⁹ kabiji pa juba ja busatu batayile na maboko abo bene bintu bimo bya kwingijisha mu bwato.

²⁰ Byo papichile moba avula, kwakubula ku mona juba ne, nangwa tubangabanga ne, ne kipuupu kechi kicheche ne, kipupu kikatampe kyatwajijile na kwitukatazha. Onkao mambo twatayile ne luketekelo lonse lwakuuba amba tusakupuluka.

²¹ Byo babujile kuja kajo moba avula ne, Paulo waimene mukachi, ne kwibambila amba, “Mwane, inge mwang'umvwine ne kufumako ku Keleta ne, inge kechi mwamona bino bya malwa ne bono ne.

²² Pano nemulomba namba michima yenu ikose, mambo kechi mukafwa nangwa umo ne, poso bwato bonka.

²³ Mambo bufuku bwa leelo kwaji kwimana malaika wa Lesa konji, aye amiwa ne wanji, kabiji ye ye mpopwela,

²⁴ Ne aye wajikung'ambila amba, Paulo! Kuchiina ne; wafwainwa obewa kukemana ku meso a kwa Kesala. Kabiji tala, Lesa wakupa bonse bo uji naabo mu bwato.

²⁵ Byonkabyo mwane, michima yenu ikose. Mambo nji na lwitabilo mwi Lesa namba, monka mo bang'ambila mo mobikamwekela.

²⁶ Kabiji kitufwainwa tukatayiwe pa jimo jikuji.”

²⁷ Pakufika bufuku bwa bujikumi na buna, kasa betunyakawila kuuku ne kuuku pa kalunga ka mema ka Adalia, pepi na pakachi ka bufuku, bamingilo ya bwato balangulukile amba ke tufwenye kubwipi na mushiji.

²⁸ Byonkabyo byo bapimine panshi na lutambo palepele kitoota kimo ne makumi abiji; byo ba endeleko pacheche bapimine jibiji, pajinga makumi atanu ne makumi ana.

²⁹ Kabiji pa kuchiina amba twakekunka ku mikunko, baikiizhe bimiko bina kunyuma, basakilenga amba bukikye.

³⁰ Kabiji bamingilo ya bwato byo basakile kunyema mu bwato, baikiizhe kabwato pa mema, mu kubepa amba, tukekizhe bimiko bikwabo ku ntonga ya kulutwe.

³¹ Ponkapo Paulo wa ambijile mukulumpe wa bashilikale ne bashilikale amba, “Inge bano ne kwikala muno mu bwato ne, kechi musakupuluka ne.”

³² Ponkapo bashilikale bachibile ntambo ya kabwato, bekaponesheshe ke kaye.

³³ Kabiji byo bwayilenga na kukya, Paulo wibasashijile bonse amba, “Muje, ja leelo jo ja bujikumi na buna jo mwapembelela kasa muzhikilwatu na nzala, ne kuja ne.

³⁴ Onkao mambo nemusashijila namba mujepo tukajo. Mambo kino kisakwimupa ngovu. Mambo kechi pajipo nangwa lusuki wa ku mitwe yenu, nangwa wa ku umo ukonaika ne.”

³⁵ Kabiji byo a ambiletu bino, washikwile shinkwa, ne pa kusanta kwi Lesa ku meso a bonse, wamutebwile ne kuja kaje.

³⁶ Ponkapo ne bonse michima yakosele, ne abo bonse ke baje.

³⁷ Atweba bonse bantu twajinga mu bwato twajinga bitota bibiji ne makumi atanu na abiji ne batanu na umo, (276).

³⁸ Kabiji pa kwikuta, bapeleeshe bwato ne kutaya wichi mu mema.

Konaika kwa bwato

³⁹ Kabiji byo bwakiile lukeelo kechi beiyukile ntanda ne, bamwene kito kiji na kitulu kyaselebala, ke bomvwang'ane amba, kana tusakukonsha kutwala bwato monka.

⁴⁰ Byonkabyo bachibileko bimiko ne kwibisha mu mema, kabiji pa kimye kimotu bakasulwile ne ntambo ya byalulula bwato. Ponkapo batanyikile kisapi kya kulutwe kulubesha, ke baye ne ku kitulu.

⁴¹ Bino pakufika pasambakena mikuku ibiji ya mema, bebuchichimikile bwato panshi; ne ntonga ikujile monka ne ayo yakosejilemo, pakuba ntonga ya kunyuma yatatwile kulalaika na bulume bwa manyaki.

⁴² Ponkapo bashilikale ba ambile amba twipaye bakaili, kuchiina amba bamo bowe pa mema banyeme.

⁴³ Pakuba aye mukulumpe wabo, byo asakile kupulusha Paulo, wibakainye kuuba mo balangulukijile. Ponkapo wakambiizhe amba, bonse bayuka kowa bekale batanshi kwiela pa mema ne kuya kumutunta;

⁴⁴ kabiji bakwabo bashalapo, bamo baye pa bipabi, bamo nabo pa bipimvwa bya ku bwato. Kabiji byonkabyo bonsetu bapulukile, bafikile kungye.