Byubilo 26 - KNTP

Paulo byo e ambijile mambo anji ku meso a kwa Agilipa

¹ Kabiji Agilipa wamwambijile Paulo amba, “Pano bakuleka wiambile obewa mwine.” Ponkapo Paulo watanyikile kuboko ka ambe ne kwamba amba.

² “Anweba bamfumu ba Agilipa, amiwa leelo nalanguluka namba, ku muchima kwatoka, byo naya neambile ku meso enu mwayila byonse byo banshinawina ku Bayudea,

³ mambo anweba mwayukishatu mwayila bisela byonse ne mambo onse aji mu Bayudea. Kyokyo nemusashijila namba, aki ntekelai muchima, mung'umvwe.

⁴ Bino bwikalo bwami kufuma ne ku bwanyike bwami, bonka bwatatwijile mu mukoka wami ne ku Yelusalema, bwa yukanyikwa ku Bayudea bonse.

⁵ Kasa bayuka ne bwikalo bwami bwakala, kana baswa kushimuna, byo najinga Mufaliseo, kasa ndonda mwayila lwipatulo lwakila mu kulama mizhilo lwa mu kupandawila kwetu.

⁶ Kabiji pano naimana kuno na kuchibilwa mambo, mambo onka a kuketekela mulaye ye alayile Lesa ku bashakulu betu,

⁷ ku yeo mulaye mikoka yetu jikumi na ibiji, kasa bapopwela Lesa na muchima yense bufuku ne mute, ya ketekela kufikako, Kabiji mambo a luketekelo luno oo nashiinwa ku Bayudea, anweba Mfumu!

⁸ Mambo ka anweba bonse kyo mwalangulukila amba, kyo kintu kyabula kufwainwa kwitaba amba, Lesa usangula bafu?”

⁹ “Ne amiwa mwine nalangulukile namba kyamfwainwa amiwa kuuba byavula byakulengulula jizhina ja Yesu wa ku Nazala.

¹⁰ Kabiji kyokyo naubile mu Yelusalema. Natambwile luusa ku bang'anga bakatampe ne kushinkila bazhijikwa mu kaleya; kabiji byo bebachibijile mambo a kwibepaya ne amiwa naswishishe.

¹¹ Ne ba kabishishenga javula mu mashinagoga onse kasa ngeseka kwibakanjikizha ku kana lwitabilo lwabo. Ne bazhingijilenga bingi, mambo a kwibapata ne balondaizhenga ne ku mizhi ya mu byalo bingi.”

Paulo waamba byo aitabijile

¹² Na mambo a kino kintu kyonayijile ku Damasakasa kasa nji na luusa ne kutumwa kufuma ku bang'anga bakatampe.

¹³ Kabiji mu jishinda pa kushinkimana juba, “Anweba Mfumu, Namwene kyeya kyafumine mwiulu, kyakijile kusaama kwa juba, kasa kyansaamina konse ne bonailenga naabo pamo.

¹⁴ Kabiji byotwaponene panshi bonse, naumvwine jiwi kasa jing'ambila mu Kihebelu amba, ‘Saulo, Saulo, ubena kummanyikila ka? Ubena kwikatazha kusobwela kuulu pa mingele.’

¹⁵ Ne amiwa namba, yenu ba ng'anyi Nkambo? Kumvwa Nkambo amba, yami Yesu ye ubena kummanyika obewa.

¹⁶ Pano buukapo wimane. Mambo na kumwekela namba nkutongole wikale ke wamwingilo, ne kamonyi wa abya bintu byo wamona mwi amiwa, kabiji ne wabyobya byo nkakumwesha kulutwe.

¹⁷ Nkakupokolola ku bantu bena Isalela ne ku Bangentila ko nakutuma.

¹⁸ Na kwibalabisha meso abo bavundamine ku mfishi balulukile ku kyeya kabiji bavundamine ku luusa lwa Satana balulukile kwi Lesa, batambule lulekelo lwa mambo, ne buswanyi mwi abo bazhijikwa na lwitabilo lwa mwi amiwa.”

Paulo byo a shimwine mwayijile mwingilo wanji

¹⁹ “Onkao mambo, anweba Mfumu Agilipa, kechi nalengulwile kimwesho kyafumine mwiulu ne.

²⁰ Bino patanshi natatwile kwibabula bena Damasakasa ne ba ku Yelusalema ne bamonse mu Yudea, ne Bangentila pamo, amba balapile ne kwalulukila kwi Lesa, bobe mingilo yafwainwa lulapilo.

²¹ Onkao mambo Bayudea bankwachile mu nzubo ya Lesa, ne kweseka kungipaya.

²² Bino kufuma kujino juba natambwile bukwasho bufuma kwi Lesa, amiwa ko kwimana ko nakimana mu jino juba ja leelo, kasa ne babuujisha bacheche ne bakatampe, kwambapo nangwa kingi ne, kana byonka bya ambile bangauzhi ne Mosesa, amba bikafika.

²³ Byo kyafwainwe aye Kilishitu kumanama, kabiji pa kwikala mutanshi kusanguka mu bafu ekale wa kusapwila mambo a kyeya ku bantu bena Isalela ne ku Bangentila.”

²⁴ Kabiji byo akyambilenga byonkabyo, Fesatusa wa ambile na jiwi jikatampe amba, “Obewa Paulo, wakonya! Kufunda kobe kukatampe kubena kukwalula ke mukonye!”

²⁵ Pakuba aye Paulo amba, “Kechi nakonya ne, anweba Fesatusa, wa buneme bwine! Kabiji mbena kwamba byambo bya kine ne bya butekanye.

²⁶ Mambo aye mfumu, ye mbena kwambilapo wibiyuka bino bintu, kabiji nakonsha kwamba na kuchinchika mambo nayuka namba, kafwako kintu nangwa kimo kya mu bibye kyafyamika kwi aye ne, mambo kino kechi kyaubilwe kumbaji ne.

²⁷ Anweba Mfumu Agilipa, mwaitaba bangauzhi nyi? Nayuka namba mwaitaba!”

²⁸ Ne Agilipa wa ambijile Paulo amba, “Mu kimye kicheche wakonsha kungitabizha amba, ngaluke ke mwina Kilishitu nyi?”

²⁹ Kumvwa Paulo amba, “Nasakisha kwi Lesa namba, nangwa mu bicheche nangwa mu byavula, kechi anweba yenka ne, kabiji ne bonse ba bena kung'umvwa mu jo jino juba ja leelo, bekale byonka byonji, kanatu mu yo ino mfungwa ne.”

³⁰ Ponkapo aye mfumu waimene, ne aye ndamakyalo, ne Belenise, ne bo aikajile naabo pamo.

³¹ Kabiji byo bayile kwa bunke, ba ambang'ene bene na bene amba, “Uno muntu kechi wauba kintu kyafwainwa lufu nangwa kukaswa ne.”

³² Ne Agilipa wa ambijile Fesatusa amba, “Uno muntu inge kechi wamusashijile Kesala ne, inge kyawama kumukasulula.”