Byubilo 25 - KNTP

Paulo byo asakile amba bamuchibile mambo anji kwi Kesala

¹ Pano Fesatusa, byo aishile mu kyalo, pakupita moba asatu, wayile ku Yelusalema kufuma ku Kesalea.

² Kabiji bang'anga bakatampe ne bakulumpe ba Bayudea bamubujile mambo akwa Paulo, ne kumusashijila,

³ ne kumulomba amba, ebobile lusa pakutuma jiwi amba ba kamulete Paulo ku Yelusalema, mambo bamupingijile amba baka mubelamine pa jishinda ne kumwipaya.

⁴ Pakuba Fesatusa wa ambile amba, “Paulo bamulama ku Kesalea, ne amiwa mwine nkayako palutwe kacheche.

⁵ Byonkabyo, aye amba, abo ba luusa mwi anweba bakaye ne amiwa, bakamushinawine ao muntu, kana mwi aye muji byatama.”

⁶ Fesatusa waikajile naabo moba kechi akijile atanu na asatu, nangwa jikumi ne, kepo ayile ku Kesalea. Byo bwakiile lukeelo waikele pa kipona kya kije ne kukambizha amba, bamulete Paulo.

⁷ Pano byo aishile, Bayudea bafumine ku Yelusalema bamuzhokolokele, kasa bamushinawina na mambo avula akatampe o babujile kukonsha kumwesha bishiinka pa kwialumbulula.

⁸ Bino Paulo wiambile aye mwine amba, “Amiwa nangwa ku mizhilo ya Bayudea, nangwa ku nzubo ya Lesa, nangwa kwi Kesala, kechi nalengapo mambo ne.”

⁹ Pakuba Fesatusa, byo asakile kwibatokesha Bayudea pa muchima, wamukumbwile Paulo amba, “Waswanyi kuya ku Yelusalema, baka kuchibile mambo obe konka ku meso ami nyi?”

¹⁰ Pakuba Paulo amba, “Naimana ku kipona kya kije kya kwa Kesala, koko nafwainwa kuchibilwa mambo. Kechi nalenga mambo ku Bayudea ne, ne anweba bene mwayukishatu.

¹¹ Pakuba umvwe ne ngubabibi, ne kuuba nauba kintu kyafwainwa lufu, amiwa kechi nakaana kufwa ne. Kabiji umvwe mu bibye byonse byo banshiina kafwamo kya kine, kafwako muntu wakonsha kumpana kwi abo ne. Naponena kwi Kesala akomvwe mambo ami.”

¹² Kabiji aye Fesatusa, byo aumvwang'ene naabo ba kije, wamwambijile amba, “Obewa byo wasashijila kuya kwi Kesala, nanchi konka kwi Kesala ko ukaya.”

Mfumu Agilipa ne mukazhanji Belenise

¹³ Pano byo papichile moba amo, Agilipa mfumu ne Belenise bafikile ku Kesalea na kumwimuna Fesatusa.

¹⁴ Kabiji byo baikajile konka moba avula, Fesatusa wamubujilemo mfumu mambo a Paulo amba, “Kuji muntu umo ye ashiile Felikisa kasa akaswa.

¹⁵ Ao muntu, byo naji kuya ku Yelusalema, bang'anga bakatampe ne bakulumpe ba Bayudea bambujile mambo anji, ne kusaka amba, namuzhachishe.

¹⁶ Ne amiwa nebakumbwile amba kechi kisela kya bena Loma kupanatu muntu nangwa wa byepi poso washiinwa wamonang'ana naabo bamushiina kilungi ne kilungi ne kumona mwa kwiambila mambo anji o bamushinawina.

¹⁷ Onkao mambo byo bapwijile pamo kuno, kechi natayile kimye ne, pakuba lukeelo naikajile pa kipona kya kije, ne kukambizha amba, ao muntu bamuleete.

¹⁸ Byo baimene ba kumushinawina, kechi bamushinawijile byatama byo naketekejile ne.

¹⁹ Poso na mambo amo a bya mu kupandawila kwabo bene, ne a umo Yesu, wafwile, ye a ambilenga Paulo amba mumi.

²⁰ Amiwa, byo nazhinaukile mwa kwipwizha bulongo bino bintu, namwipwizhe namba kana mwaswa kuya ku Yelusalema na kuchibilwa ano mambo nyi?

²¹ Bino Paulo, byo a musashijile mwine mfumu kineeme, amba a nchibile mambo, amiwa nakambizhe namba, alamwe poso nkamutume kwi Kesala.”

²² Ponkapo aye Agilipa wamwambijile Fesatusa amba, “Ne amiwa nasaka ku mumvwa awo muntu amiwa mwine.” Kumvwa aye amba, “Mukamumvwa keesha.”

²³ Ponkapo byobwakile lukeelo, aye Agilipa waishile ne Belenise, na buneme bukatampe, batwelele ne mobomvwina mambo, ne bakulumpe bene ba bashilikale, ne bakulumpe ba mu muzhi pamo. Ponkapo Fesatusa wapaine mukambizho ne Paulo bamuletele monka.

²⁴ Ponkapo aye Fesatusa wa ambile amba, “Mfumu Agilipa, ne bantu bonse botuji naabo muno, mwamumona uno muntu ye jang'ambijile jibumba jonse ja Bayudea mu Yelusalema ne kuno, kasa babijikizha amba, kechi wafwainwa kukikala na bumi ne.

²⁵ Pakuba amiwa namwene namba kechi wauba kintu kyafwainwa lufu ne. Kabiji mwine byo a musashijile mwine mfumu kineeme, amiwa napwishishe mu muchima namba, nanchi nkamutuma konka.

²⁶ Kabiji mwi aye kechi nji na kintu kine kya kunemba kwi nkambo yami ne. Onkao mambo kyo namuletela kwi anweba bonse, ne kwiine ke kwi anweba Mfumu Agilipa, namba, pa kupwisha kumwipuzhaipuzha, mmonemo bya kunemba.

²⁷ Mambo amiwa nalanguluka namba, kechi kyafwainwa kutuma kaili kwakubula kutela mambo o bamufwisha nao ne.”