Byubilo 23 - KNTP

¹ Kabiji Paulo watajile pajinga bena kije, wibambijile amba, “Anweba bakwetu, ku meso a Lesa konaikajilenga na muchima watoka wakubula kwizhachisha, kufika ne ku jino juba ja leelo.”

² Ponkapo aye ng'anga mukatampe, Ananyasa, wakambiizhe baimene ko ajinga amba, “Mupumai pa kanwa.”

³ Kumvwa aye Paulo amba, “Lesa usakukupuma ne obewa, obewa lubumbu washingwa mpemba! Waikala pa kije na kunchibila mambo monka mwayila Mizhilo, nangwa byonkabyo kechi wayuka amba wauba akya kyakanya mizhilo pa kukambizha amba, bampume!”

⁴ Kumvwa baimene konka amba, “Olo, ke umuneene mwenga ng'anga mukatampe wa Lesa nyi?”

⁵ Kumvwa Paulo amba, “Bakwetu, kechi naji kuyuka namba ye ng'anga mukatampe ne, mambo kyanembwa amba, kechi ukamwambila kyatama ndamakyalo wa bantu bobe ne.”

⁶ Kabiji Paulo byo ayukile amba, bamo bo Basadusea ne bamo bo Bafaliseo, wabijikile mukije amba, “Anweba bakwetu, amiwa ne mufaliseo, mwana wa Bafaliseo. Ke na mambo a luketekelo lwa lusanguko lwa bafu o mbena kuchibilwa mambo kuno leelo!”

⁷ Kabiji byo a ambiletu bino, mwabukile lupata mu Bafaliseo na Basadusea, ne jibumba ja abene.

⁸ (Mambo Basadusea bamba amba, lusanguko kafwako, nangwa bamalaika nangwa mupashi kafwako; bino Bafaliseo baitaba bino byonse.)

⁹ Ponkapo kwabukile kiwowo kikatampe, ne bamo banembeshi bamu Bafaliseo baimene, ke bapachike amba, “Kechi twamonamo kibi mu ye uno muntu ne. Apo kampe mupashi nangwa malaika kine wa mwambila!”

¹⁰ Kabiji byo pabuukile lupata lukatampe, aye mukulumpe mwine wa bashilikale byo achiine amba, basa kumutabaula Paulo, wakambiizhe bashilikale banji amba bekile bakebangataye na bulume, ne kumuleeta mu kamba.

¹¹ Bonkabwa bufuku Nkambo waimene pajinga Paulo ne kumwambila amba, “Kuuba moyo ne, mambo byonka byo wanshimuna mu Yelusalema byobyo ukanshimuna ne mu Loma.”

Byo basakile kumona mwa kumwipayila Paulo

¹² Byo bwakiile lukeelo, Bayudea bebungizhe pamo ne kuchipa amba, kechi baje nangwa kutomatu ne, poso Paulo bamwipaye.

¹³ Bachipile luno luchipo bakijile makumi ana.

¹⁴ Bayile ku bang'anga bakatampe ne bakulumpe amba, “Atweba twikasa pamo na luchipo, namba kechi tusume pa kajo ne poso tumwipaye Paulo.

¹⁵ Pano byonkabyo anweba bena kije mutume jiwi ne kumwambila mukulumpe mwine wa bashilikale amba amulete Paulo ko muji, nobe musaka kuyukisha mambo anji bulongo. Ne atweba twinengezha kumwipaya kasa akyangye kufika kwipi.”

¹⁶ Pakuba mwana nyenga yanji Paulo, wa umvwine mambo a kumubelamina kwabo, byonkabyo wayile na kutwela mu kamba, ne kumubula Paulo.

¹⁷ Paulo waichile umo mukulumpe wa bashilikale ne kumwambila amba, “Mutwale uno nsongwalume ku mukulumpe mwine, mambo uji na bya kumubuula.”

¹⁸ Kepo a mutwajile ne kumuleeta ku mwine mukulumpe wabo ne kwamba amba, “Paulo, kaili, wajikungita, wankunsaka amiwa kuleeta uno nsongwalume ko muji, byo aji na bintu bya kwimubuula.”

¹⁹ Ne aye mwine mukulumpe wabo wamukwachile pa kuboko, wamutwajile kwa bunke ne kumwipuzha amba, Ng'anyi kintu kyo usaka kumbuula?

²⁰ Kumvwa aye amba, “Bayudea baumvwang'ana kwimulomba anweba amba mukamulete Paulo keesha ku kije, nobe basaka kwipuzha bulongo mambo anji.

²¹ Mwane kechi mwibetabe ne mambo bamubelamina bantu bakila makumi ana, bonka bekasa pamo ne kuchipa amba kechi baje nangwa kutoma ne, poso bamwipaye. Ne pano babena kutengelatu jiwi kufuma kwi anweba.”

²² Ponkapo aye mwine mukulumpe wamulekele nsongwalume amba, yanga, ne kumufunda amba, “Kechi ubuule nangwa muntu umo byo wambuula bino bintu ne.”

Paulo bamutuma kwi ndamakyalo Felikisa

²³ Ponkapo waichile bakulumpe babiji ba bashilikale ne kwibambila amba, “Nengezhezhai jimo bashilikale bitota bibiji, ne ba pa bambili makumi atanu na abiji ne ba mafumo bitota bibiji kuya ku Kesalea, bemane pa kimye kya busatu bufuku.

²⁴ Kabiji mumwene jimo ne banyama ba kuyapo Paulo, mumufikizhe bulongo kwi Felikisa, ndamakyalo.”

²⁵ Kabiji wanembele ne nkalata ya byonka bino.

²⁶ “Amiwa Kaludiusa Lisiasa, kuji anweba ba Felikisa, ndamakyalo wa buneme bwine, mutende.

²⁷ Uno muntu bamukwachile ku Bayudea, kabiji byo basakilenga kumwipaya, amiwa naishile kobaji abo na bashilikale ne kumupokolola, byo naumvwine amba ye mwina Loma.

²⁸ Kabiji amiwa byo nasakile kuyuka mambo o bamushinawijile, na mutwajile ku kije kyabo.

²⁹ Nataine amba bamushiina na bya mu mizhilo yabo, kechi washiinwe na mambo afwainwa lufu nangwa kukaswa ne.

³⁰ Kabiji byo bajikumbula amba, bakamubelamina, byonkabyo namutuma ko muji, ne kukambizha bakumushiina amba bakamushiine ku meso enu.”

³¹ Byonkabyo bashilikale, monka mo bebakambizhizhe, bamushikwile Paulo ne kumutwala bonkabwa bufuku kwi Antipatalisa.

³² Kabiji byo bwakiile lukeelo balekele baji pa bambili kuya nanji, abo babwelele ku kamba.

³³ Abo, byo bafikile ku Kesalea ne kufikizha nkalata kwi aye ndamakyalo, bamufikizhe ne Paulo ku meso anji.

³⁴ Byo apwishishe kutanga nkalata, waipwizhe ku kyalo koafumine. Kabiji byo a umvwine amba, ye mwina Kilikya,

³⁵ wamwambijile amba, “Nkomvwa mambo obe onse byo bakafika bakukushiina.” Ponkapo wakambiizhe amba, alamwe mu nzubo ya mfumu, yajinga yakwa Heloda.