Byubilo 22 - KNTP

¹ Anweba bakwetu ne bataata, ng'umvwai byo nsakwiambila ko muji.

² Kabiji byo ba umvwine byo keebambile mu Kihebelu, ponkapo bazhindamishepotu nzo, kumvwa aye amba.

³ “Amiwa ne mu Yudea, nasemenwe mu Talasusa mu Kilikya, kabiji nakomejile mu ye uno muzhi, ku maulu a Ngamaliela. Nafunjishiwe monka mwayilatu musango wa Mizhilo ya bashakulu betu, kasa naikala na muchima wauba lupata mu bya Lesa, pamo byonka byo muji anweba leelo.

⁴ Kabiji napachile jino Jishinda namba nejipaye, kasa ne bakasa ne kwibataya mu kaleya banabalume ne banabakazhi.

⁵ Abyo ne aye ng'anga mukatampe wakonsha kushimuna, ne bonse baji mukije kya bakulumpe nabo pamo. Kabiji kwi abo ko konatambwile ne makalata a kutwala ku balongo Bayudea, nayile namba nkakwate baji ku Damasakasa, ne kwibaleeta ku Yelusalema kasa bakaswa amba bebakabishe.”

Paulo byo a ambile mambo a kwaluluka kwanji

⁶ “Ponkapo byonakiyilenga pakufika kwipi na Damasakasa, juba kasa jashinkimana pakachi, ponkapo kyeya kikatampe kyasamine kufuma mwiulu ne kunzhokoloka.

⁷ Ne amiwa naponene panshi, kabiji naumvwine ne jiwi jang'ambijile amba, ‘Saulo, Saulo, ubena kummanyikila ka?’

⁸ Kepo amiwa naipwizhe namba, nanchi anweba yenu bang'anyi, Nkambo? Ne aye wang'ambijile amba, ‘Amiwa ne Yesu wa ku Nazala, ye ubena kumanyika obewa.’

⁹ Kabiji bonajinga naabo bekimwene akya kyeya, bino kechi ba umvwinenga jiwi ja yewa wang'ambijilenga ne.

¹⁰ Ne amiwa na ambile namba, pano ngube byepi, Nkambo? Kumvwa aye Nkambo wang'ambijile amba, ‘Imana, uyenga ku Damasakasa, koko bakakubula bintu byonse bya kutongwelwa kuuba obewa.’

¹¹ Kabiji amiwa byo nabujile kukonsha kumona na mambo a lukumo lwa kyokya kyeya, natangijilwe na kuboko kwa boba bonajinga naabo, ne kufika nakafikile mu Damasakasa.”

¹² “Kabiji muntu umo wa jizhina ja Ananyasa, watekanya mwayila Mizhilo, watelelwe bulongo ku Bayudea bonse baikajile momwa.

¹³ Waishile ne kwimana ponajinga ne kwamba amba, ‘Mulongo wetu Saulo, utambule meso!’ Ponkapo pa kyonkakya kimye nainwine meso ne kumumona.

¹⁴ Ne aye amba, Lesa wa bashakulu betu, ye wakutongola amba uyuke kyaswa muchima wanji, kabiji umumone ne aye Mololoke, ne kwijumvwa jiwi ja mu kanwa kanji.

¹⁵ Mambo obewa ukekala kamonyi wanji wa kumushimuna ku bantu bonse mu byonse byo wamona ne byo waumvwa.

¹⁶ Kabiji pano ikika kyo upembela? Imana, ubatizhiwe, owe bubi bobe, pa kwita pa jizhina janji.”

Lwito lwa Paulo lwa kusapwila ku Bangentila

¹⁷ “Kabiji ponkapo byo nabwelele ku Yelusalema, byo nalombelenga mu nzubo ya Lesa, namwene kimwesho,

¹⁸ ne kumona na mumwene kasa ang'ambila amba, Pelawizha ufume mu Yelusalema bukiji, mambo kechi baketaba lushimuno lobe lwa kunshimuna amiwa ne.

¹⁹ Ne amiwa namba, Nkambo, abo bene bayuka byo nebatayanga mu kaleya, ne kwibapuma mu mashinagoga bonse bemwitabijilenga anweba.

²⁰ Kabiji byo baichijile mashi a kwa Setepena, kamonyi wenu, amiwa najinga ponka ne kwitabizha, nalamine ne bivwalo bya bamwipayile.

²¹ Kumvwa aye wang'ambijile amba yanga, mambo amiwa nkakutuma kwalepa ku Bangentila.”

²² Kabiji baswile kumumvwa poso byo afikile pa kino kyambo; ponkapo basanswile mawi abo ne kwamba amba, “Mufumyaipo ao muntu pano pantanda! Mambo kechi kyamufwainwa amba ekale na bumi ne!”

²³ Kabiji byo bakibijikilenga, ne kuvuula bivwalo byabo, ne kufuukula lukungu mwiulu.

²⁴ Aye mukulumpe mwine wa bashilikale wakambiizhe amba, bamulete mu kamba, bamwipuzhe na kumututaula, namba ngyuke byo bamubijikila bibye.

²⁵ Ponkapo byo bamukashile na ntambo, aye Paulo wamwambijile mukulumpe wa bashilikale waimene ponka amba, “Nanchi, kyawama kututaula muntu mwina Loma, ye babula kuzhachisha nyi?”

²⁶ Kabiji aye mukulumpe wa bashilikale pakumvwa byobyo, wayile ku mwine mukulumpe wabo amba, “Pano musa kuubaka? Uno muntu ye mwina Loma.”

²⁷ Ponkapo aye mwine mukulumpe waishile ne kumwambila amba, “Mbule kana wi mwina Loma obewa nyi?” Ne aye amba, “Ee, i mo.”

²⁸ Kumvwa aye mukulumpe mwine amba, “Amiwa ne bumwene buno bwina Loma na mali avula.” Pakuba Paulo amba, “Amiwa nasemenwe monka.”

²⁹ Ponkapo aba basakile kumwipuzha bafumineko koaji; ne aye mukulumpe mwine wa bashilikale naye ke moyo pakuyuka amba ye mwina Loma, mambo wamukashile.

Paulo ku meso a kije

³⁰ Pakuba byo bwakiile lukeelo, byo asakile kuyukisha kine kintu kyo ashiinwa na Bayudea, wamukasulwile, ne kukambizha bang'anga bakatampe ne bena kije bonse bapwijile pamo; ponkapo wamwikizhe Paulo ne kumubiika mu kyenyi kyabo.