Byubilo 21 - KNTP

Paulo byo ayile ku Yelusalema

¹ Kabiji byo twaabene naabo ne kufumako na bwato, twayilengatu kushulumika ku Kosa, byo bwakiile lukeelo twafikile pa Lodesa, kabiji kufumako twaiya ku Patala.

² Kabiji byo twataine bwato bwa abukilenga ku Finesha, twayile monka.

³ Twafikile pa mwekejile Kipilusa, kupichila ku kipiko, ne kuya konka ku Silya. Twatuntukile pa Tila, mambo po po basakile kufumya bipe mu bwato.

⁴ Twatainemo baana babwanga kabiji twazhikijilweko moba atanu na abiji. Ne abo ba mwambijile Paulo mu Mupashi amba, kechi atwajijile kuya ku Yelusalema ne.

⁵ Kabiji byotwapwishishe oa moba, twafumineko twayilenga pa lwendo lwetu, ne abo bonse pamo ne bakazhi babo ne baana, betushinjikinyeko, poso byo betupezhezhe pangye ya muzhi, ne pa kufukama panshi ku kitulu twalombele ne kwishajikapo.

⁶ Ne atweba twayile mu bwato, pakuba abo babwelele kwabo.

⁷ Twa twajijile lwendo lwa kufuma ku Tila kufika ku Tolemesa, ko twaimwine balongo ne kuzhikilwa naabo juba jimo.

⁸ Byo bwakiile lukeelo twafumineko ne kufika ku Kesalea. Kabiji twatwelele mu nzubo ya kwa Filipa musapwishi wa Mambo Awama, ye umo wa boba batanu na babiji, ne kwikala twaikele nanji.

⁹ Kabiji uno muntu wajinga na baana bana bazhike, bajinga bangauzhi.

¹⁰ Kabiji byo twakikajileko moba amo, kwafumine ngauzhi umo ku Yudea, jizhina janji Agabusa,

¹¹ Kabiji byo aishile kotwajinga, washikwile jiponda ja kwa Paulo ne kwikasajo ku maulu ne ku maboko ne kwamba amba, “Mupashi Wazhila wa amba byonka bino amba, byobyo bakakasa ne mwina jino jiponda ku Bayudea mu Yelusalema, ne kumupana mu maboko a Bangentila.”

¹² Kabiji byo twaumvwine bino, atweba ne ba konkakwa, twamusashijile amba, kechi akaye ku Yelusalema ne.

¹³ Ponkapo Paulo wakumbwile amba, “Mubena kuubaka, byo mubena kujila ne kundajisha muchima? Mambo amiwa naswa kechi kukaswa konka ne, nangwatu ne kwijifwila jizhina ja Nkambo Yesu ku Yelusalema.”

¹⁴ Byo abujile kuswa kumukanjikizha twalekele namba, “Kyaswa muchima wa Nkambo kyubiwe.”

¹⁵ Pakupita oa moba, twakashile bipe byetu ke tuye ku Yelusalema.

¹⁶ Kabiji twayile na bamo baana babwanga ba ku Kesalea, bo betutwajile ku nzubo ya kwa Nasoni wa ku Kipilusa, mwana wabwanga mutanshi, amba tukafikile kwanji.

Paulo byo amupempwile Yakoba

¹⁷ Kabiji byo twafikile ku Yelusalema, balongo betutambwijile bingi na lusekelo.

¹⁸ Byo bwakiile lukeelo, Paulo ne atweba twatwelele mwajinga Yakoba ne bakulumpe bonse.

¹⁹ Kabiji pa kupwisha kwibemuna, aye Paulo wibabujile bintu byonse byo aubile Lesa mu Bangentila na mingilo yanji.

²⁰ Ne abo byo bebyumvwine, bamutumbijikile Mwine Lesa. Kabiji ba mwambijile amba, “Mulongo wetu, mwamona byo baji biumbi ne biumbi bya Bayudea baitabila, ne bonse batesha michima ku Mizhilo.

²¹ Kabiji be babuula kala mambo a kwa anweba amba, mubena kufunjisha Bayudea bonse bamu Bangentila amba, baleke bisela bya kwa Mosesa, ne kwibatwezha baana babo mu kisela kya mukanda, nangwa kulondela bisela byetu ne.

²² Ng'anyi kintu kisa kubiwa pano? Kine basakumvwa amba mwaiya.

²³ Onkao mambo mube kyonka kino kyo tusakwimwambila. Tuji na banabalume bana balaya kwi Lesa.

²⁴ Ivwangai naabo ne kwizhijika pamo ne abo mwibapaineko, batende mitwe yabo. Kabiji bonse bakayuka amba, nanchi abya byo twaumvwine bya mambo anji byajinga byatu, nanchi ne aye mwine wenda bulongo, kasa alama Mizhilo.

²⁵ Pakuba mambo a Bangentila baitabila, atweba twanembele motwachibila namba, bazhile byo batapisha ku bankishi, ne mashi, ne nyama yo baipaya kwakubula kwichila mashi, ne bulalelale.”

²⁶ Ponkapo Paulo wasendele boba banabalume, kabiji lukeelo pa kwizhijika wivwangile naabo abo bantu, kabiji watwelele mu nzubo ya Lesa, na kwibabula byo akapwa ao moba a kwizhijika kwabo, ne byo ikebalambwilwa milambo yabo bonse.

Paulo byo bamukwachile mu Nzubo ya Lesa

²⁷ Kabiji aa moba atanu na abiji byo ajinga pepi na kupwa, Bayudea ba ku Asha, byo bamumwene mu nzubo ya Lesa, bavulumwine jibumba jonse, ne kumukwata.

²⁸ Kasa babijika amba, “Anweba bena Isalela! Tukwashaiko, uno i ye muntu ufunjisha bonse bantu konse kasa etuneena atweba Bayudea, ne Mizhilo nayo, ne pano pantu pamo, kabiji ne kikwabo waletele Bagiliki mu nzubo ya Lesa, ne kuzhilulula pano pantu pazhila.”

²⁹ Mambo bamwene kala Tolofimusa mwina Efisesa, kasa enda nanji mu muzhi, ne abo balangulukile amba Paulo wamuletele mu nzubo ya Lesa.

³⁰ Ponkapo muzhi yense wabuukile, ne bantu bonse banyemejile pamotu. Ba kwachile Paulo ne kumufumya mu nzubo ya Lesa, ponkapo ne bibelo bebishinkile.

³¹ Kabiji byo basakilenga amba bamwipaye, jiwi jakafikile ne ku mwine mukulumpe wa bashilikale, amba monse mu Yelusalema mwauba bingi kiwowo ne kulukuta.

³² Ponkapo wasendele bashilikale ne bakulumpe babo, ne kwibavundumukila kabiji abo byo bamwene aye mukulumpe mwine ne bashilikale, balekele kumupuma Paulo.

³³ Ponkapo aye mwine mukulumpe wa bashilikale waishile kwipi, kabiji wamukwachile Paulo, ne kukambizha amba, bamukase na minyololo ibiji. Kabiji waipwizhe amba, “Uno ye ng'anyi, kabiji wauba ka?”

³⁴ Bamo bamu jibumba babijikilenga kintu kimo, bakwabo nabo kintu kingi. Kabiji aye byo akankelwe kuyuka kine kintu, mambo a kiwowo wibakambizhizhe amba, bamutwale mu kamba.

³⁵ Byo afikile po bakanjijila, bamushikwile ku bashilikale na mambo a bukaji bwa jibumba.

³⁶ Mambo jibumba ja bantu jalondejilenga panyuma, kasa babijika amba, “Mwipayai!”

³⁷ Kabiji Paulo byo bamutwajilenga mu kamba, wamwambijile mwine mukulumpe wa bashilikale amba, “Kyaswishiwa kwimwambila kintu nyi?” Kumvwa aye amba, “Nanchi wayuka kigiliki nyi?”

³⁸ “Obewa nanchi kechi yobe iye mwina Ijipita, walengele kala bantu biumbi bina bya bambanzhi kusatuka ne kwibatangijila mungyetu nenyi?”

³⁹ Kumvwa aye Paulo wamwambijile amba, “Amiwa ne mu Yudea, mwina Talasusa wa mu Kilikya, kechi muzhi wabula kunema ne. Nemusashijila namba bandeke, ng'ambe ku bantu.”

⁴⁰ Ponkapo mwine mukulumpe wabashilikale wamuswishishe, Paulo waimene po bakanjijila, ne kwibakebaula bantu na kuboko. Kabiji byo bazhindaminepo, aye wibambijile mu Kihebelu amba.