Byubilo 20 - KNTP

Paulo byo ajinga mu Makedonya, ne mu Akaya

¹ Akya kiwowo byo kyapwile, Paulo waichile baana babwanga ne pa kwibakosesha wibashajikilepo, ke lwendo lwa kuya ku Makedonya.

² Byo apichile monse mu byobyo byalo, wibakoseshe bantu na byambo byavula, kepo aishile ne mu ntanda ya Bagiliki,

³ akwa waikajileko ba ng'ondo basatu, kabiji byo ayukile amba bamubelamina ku Bayudea byo a sakilenga kuya ku Silya mu bwato, ponkapo aye walangulukile kubwela mu jishinda japita mu Makedonya.

⁴ Bantu bavula ba mushinjikinyeko ne kumupezha ku kyalo kya Asha, mwi abo mwajinga Sopetela mwina Beliya, mwana Pilusa, ne ba Alisatakusa ne Sekundusa bena Tesalonika; ne Ngayusa mwina Delebe, ne Timoti; ne ba ku Asha ba Tikikusa ne Tolofimusa.

⁵ Bino abo batangijilepo kabiji ba ketupembejile ku Toloasa.

⁶ Kabiji moba a bashinkwa ba kubula mbizho pakupita, atweba twafumine ku Filipai na bwato, ne kufika ku Toloasa ko bajinga mu moba atanu, twaikajileko moba atanu na abiji.

Lwendo lwa Paulo lwapelaako ku Toloasa

⁷ Mu juba jitanshi ja mu mulungu, twapwijile pamo na kutebula shinkwa. Paulo wa ambile naabo ne kwibafunjisha, byo asakile amba nkemana kesha, aye wabanjile na kwamba kufikizha ne pakachi ka bufuku.

⁸ Mwajinga malampi avula mu nzubo ya peulu motwapwijile.

⁹ Ne nsongwalume umo jizhina janji Yutikusa, waikajile mu kipenze, walemenenwe natulo tukatampe twiine kabiji Paulo byo abanjishe na kwamba, aye byo a lemenenwe natulo, waponene panshi kufuma pa nzubo ya busatu. Byo ba mushikwilepo, sa afwa.

¹⁰ Bino Paulo waikijile, wamuponejile ne kumukumbata ne kwamba amba, “Lekai kuwowakana mambo mweo wanji uji monka.”

¹¹ Kabiji wakanjijile jibiji peulu, ne kutebula shinkwa ne kuja. Aye wisambile naabo kimye kikatampe, kufikizha ne kumakya, ponkapo wafumineko.

¹² Kabiji baleetele awa nsongwalume kasa aji mumi, ne abo ba tekeneshiwe bingi.

Kufuma ku Toloasa kuya ku Miletusa

¹³ Bino atweba twatangijilepo mu bwato, ke tuye ja pa mema ku Asosa, ko twafwainwe kumusenda Paulo, mambo byo byo alayile mwine, byo asakile kupita ja kungye.

¹⁴ Kabiji byotwasambakene nanji ku Asosa, twamusendele mu bwato, ne kwiya twaishile ku Mitilene.

¹⁵ Bino pa kufumako mu juba ja keesha twafikile pamwekela Kiosa mu kabeya, kabiji lukeelo twafikile ku Samosa, juba jalondejilepo twafikile ku Miletusa.

¹⁶ Mambo aye Paulo wafukwiile amba, kechi tupite ku Efisesa ne, poso amba tupitetu ja pa mema pakuba amba akabule kubanda mu Asha, mambo aye waendeshenga amba, inge kyakonsheka juba ja Pentekosta jikamutaine monka mu Yelusalema.

Paulo byo ebashajikilepo bakulumpe ba kipwilo kya ku Efisesa

¹⁷ Kufuma mu Miletusa Paulo watumine jiwi ku Efisesa, ja kwita bakulumpe ba kipwilo kwiya ko ajinga.

¹⁸ Byo baishile ko ajinga, aye wibambijile amba, “Anweba bene mwayuka byo naikajile nenu moba onse, kufuma ku joja juba jitanshi jo na nyanchile mu Asha,

¹⁹ kasa na mwingijila Nkambo na muchima wipelula, ne na mipolo, ne na bya kungeseka byamfikijile na mambelamina a Bayudea.

²⁰ Byo nabujile kuchiina kwimubula nangwa kimotu kimuwamina, kasa ne mufunjisha patoka, ne pa nzubo pa nzubo.

²¹ Kasa nebabujisha Bayudea ne Bagiliki, lulapilo lwa kwalulukila kwi Lesa, ne lwitabilo lwa kumwitabila Nkambo yetu Yesu Kilishitu,

²² Kabiji talai, pano mbena kuya ku Yelusalema kasa nakaswa na Mupashi, ne kuyuka bintu bikamfikila ne.

²³ Poso byonka bibena kumbujisha Mupashi Wazhila mu mizhi yonse, amba mfungwa ne bya malwa bibena ku kupembelela konka.

²⁴ Pakuba amiwa kechi nataako muchima ku mweo wami nobe kyo kintu kyanema kwi amiwa ne, poso mpwishe kikonkwanyi kyami, ne mwingilo ye natambwile kwi Nkambo Yesu, wa kusapwila Mambo Awama a bupe bwa Lesa.

²⁵ Kabiji pano nayuka namba, anweba bonse mo nabapitang'anenga na kusapwila mambo a bufumu, kechi mukamona kilungi kyami jibiji ne.

²⁶ Kyo kyombena kwimubuujisha leelo, namba amiwa nabinga ku mashi enu anweba bonse.

²⁷ Mambo kechi nachiine kwimubula monse mwasakila Lesa ne.

²⁸ Iketai anweba bene, ne jitanga jonse, jo bemupejilepo bukulumpe kwi Mupashi Wazhila, amba mujishe kipwilo kya Lesa, kyoapotele na mashi anji mwine.

²⁹ Amiwa nayuka namba, pa kufumako amiwa misuka ikaji ikatwela mwi anweba, kechi ikaleka jitanga ne.

³⁰ Kabiji ne mwi anweba bene namo, mukemana bantu, bakambanga bintu byaluwankana, bya kwibakokamo baana babwanga amba bebalondele.

³¹ Onkao mambo jimukai, kasa muvuluka akya kimye kya myaka isatu, kyo nabujilenga kuzhikilwa kwimufunda anweba bonse, bufuku ne mute na mipolo.”

³² “Ne pano nemufikizha kwi Lesa, ne ku mambo a bupe bwanji, o ayuka kwimukomesha, ne kwimupa buswanyi mwi abo bonse bazhijikwa.

³³ Kechi na kumbilwepo siliva nangwa ngolode, nangwa bivwalo bya muntu ne.

³⁴ Anweba bene mwayuka ano maboko ami byo ang'ingijilenga mu kummwena byamfwainwa, ne abo bonajinga naabo pamo.

³⁵ Mu byonse nemumwesheshe mo mwafwainwa kwingijila kyakosa byonkabyo, ne kukwasha banekena, kasa muvuluka byambo bya Nkambo Yesu, byo a ambile aye mwine amba, ‘Kupana kuji na mapesho kukila kutambula.’”

³⁶ “Kabiji byo a ambile abino bintu, wafukamine panshi ne kulomba naabo bonse.

³⁷ Ne bonsetu bajijile bingi mipolo, ne kumukumbata Paulo mwishingo ne kumufyompa ba mufyompelenga na kumwimuna.

³⁸ Kasa baubisha bulanda na kyambo kyo a ambile amba, kechi bakamona kilungi kyanji jibiji ne. Ponkapo ba mushinjikinyeko ne kumufikizha ku bwato.”