Byubilo 2 - KNTP

Kwiya kwa Mupashi Wazhila

¹ Byo jafikile juba ja Pentekosta, ne bonse kasa bapwila pamo.

² Ponkapo mwafumine kilulumo mwiulu nobe mwela mukatampe upuupa, kabiji wayuzhizhe nzubo yonse mobaikajile.

³ Ne ponkapo kwibamwekejile njimi kasa ya abana nobe mujilo yaikajile pa bonse pa muntu pa muntu.

⁴ Ne abo bonse bayujile na Mupashi Wazhila kabiji batatwile kwamba mu njimi ingi, monka mo ebapelejile byambo Mupashi.

⁵ Bino mu Yelusalema mwaikajilenga Bayudea, banemeka Lesa, bafumine mu mikoka yonse ya muno munshi.

⁶ Kabiji byo kyaumvwanyikile akya kilulumo, jibumba japwijile pamo po bajinga, ne bulaka bwibashinkile, mambo bantu bonse bebomvwine kasa bamba mu milaka yabo, au wanji, au wanji.

⁷ Kabiji bonse bakuminye bingi ne kwiipuzha amba “Olo, bano bantu babena kwamba bonse kechi bena Ngalilea nenyi?

⁸ Mambo ka atweba bonse, pa muntu pa muntu, tubena kumvwa mu milaka yetu yotwasemenwamo?

⁹ Bena Palatiya, ne bena Media, ne bena Elama, ne bekala mu Mesopotamya, ne mu Yudea, ne mu Kapadokya, ne mu Pontusa, ne mu Asha,

¹⁰ ne mu Filigya, ne mu Pamfilya, ne mu Ijipita, ne monse mu Libya pepi ne ku Kilene, ne benyi bafuma ku Loma,

¹¹ ne bonse Bayudea ne bealula ke Bayudea bena Keleta, ne bena Alabya, tubena kwibomvwa sa bamba mu njimi yetu mambo a mingilo ikatampe ya Lesa.”

¹² Ne abo bonse bakuminye bingi, ne kwiipuzha bene na bene amba, “Kino kyayila mu ka?”

¹³ Pakuba bamo bebakosamikilenga amba, “Bano bantu bapendwa binyu bya bintonto!”

Mambo asapwijile Petelo

¹⁴ Bino Petelo waimene naba jikumi na umo, wasanswile jiwi janji, ne kwibambila amba, “Anweba bena Yudea, ne anweba bonse mwikala mu Yelusalema, yukai kino, ne kumvwa byambo byami.

¹⁵ Mambo bano bantu kechi bapendwa byo mubena kulanguluka anweba ne; mambo juba jikijitu lukeelo.

¹⁶ Pakuba kino kyo kyokya kya ambile ngauzhi Yoela amba.

¹⁷ “Mu moba akapelaako Lesa wa amba amba, ‘nketulwila Mupashi wami pa bantu bonse: Ne baana benu ba balume ne ba bakazhi bakaulanga na Mupashi, Ne bansongwalume benu bakamona bimwesho, ne bakote benu bakalota biloto.

¹⁸ Kine, mu oa moba, nketulwila Mupashi wami pa bakalume bami ba balume ne ba bakazhi ne pa bazha bami, ne abo bakaulanga na Mupashi,

¹⁹ Kabiji nkamwesha bya kukumya mwiulu, ne biyukilo pano panshi; Bya mashi, ne bya mujilo, ne bya mimbulungwa ya bwishi.

²⁰ Juba jikaluka ke jifiita, ne ng'ondo ukaluka nobe mashi, juba ja Nkambo kasa jikyangye kufika, jonkaja jikatampe ne ja lukumo.

²¹ Kabiji bonse baketa pa jizhina ja Nkambo bakapuluka.’

²² “Anweba bena Isalela, umvwai bino byambo! Yesu mwina Nazala, muntu waitabilwe kwi Lesa ku meso enu mu mingilo ya bulume ne mu bya kukumya ne mu biyukilo, byo aubile Lesa mwi aye mukachi kenu, monka mo mwayukila ne anweba bene;

²³ aye uno Yesu, byo asolwelwe na mambo a kutongwela jimo ne kuyukila jimo kwanji aye Lesa, anweba yenu mwamupopele pa musalabu ne kumwipaya konka ku maboko a bampupabizhila.

²⁴ Pakuba aye Lesa wamusangwile mu bafu byo apwishishe kumukasulula ku misongo ya lufu, mambo kechi kyakonshekele amba lufu lumulame ne.”

²⁵ Mambo Davida wa ambile mambo a aye amba, Namwene Nkambo kasa aikala ku meso ami moba onse, mambo aye uji ku kilujo kyami, kechi ntenkene ne.

²⁶ Onkao mambo muchima wami watokele to, ne lujimi wami wasekejile. Mubiji wami naye, ukakelwa mu luketekelo.

²⁷ Mambo anweba kechi mukalekelela mweo wami mu Kalunga ne, nangwa kupana wenu Wazhila amba amone bubole ne.

²⁸ Mwangyukisha ne mashinda a bumi, mukangyuzha na lusekelo mambo muji ne amiwa.

²⁹ “Anweba bakwetu, nanchi pano nsa kwimwambilatu kwakubula kupita mumbaji na mambo a mushakulu Davida, namba wafwile kabiji bamuzhikile, ne kilende kyanji tuji nakyo ne leelo.

³⁰ Byo ajinga ngauzhi, ne kuyuka amba, Lesa wanchipila luchipo amba, ku nkunwa ya mukifuka kyobe nkekazha umo pa jitanda jobe.

³¹ Aye, byo amwenejile jimo kino, wa ambile na mambo a kusanguka kwa Kilishitu amba, “Kechi bamushiile mu Kalunga ka bafu ne, nangwa mubiji wanji naye kechi wabolele ne.”

³² Uno Yesu bamusangwile kwi Lesa, ne atweba bonse twi batumonyi banji.

³³ Byonkabyo byo atumbijikilwe ku kilujo kya Lesa, ne kutambula kwi Shanji kyo alayile kya Mupashi Wazhila, aye waitulula uno. Byonka byo mwamona ne kumvwa.

³⁴ Mambo Davida kechi wakanjijile mwiulu ne, bino aye mwine wa ambile amba, “Nkambo wa ambijile Nkambo yami amba, ikala ku kilujo kyami

³⁵ Poso ngalule balwanyi bobe ke kyakutulapo maulu obe.”

³⁶ “Onkao mambo bonse ba munzubo ya Isalela bayukishetu amba, Lesa wamupa bu Nkambo ne bu Kilishitu, yenka uno Yesu ye mwaipayile pa musalabu.”

³⁷ Ponkapo byo ba umvwine bino, ne michima ibapiile munda, ne kwambila Petelo ne batumwa bakwabo amba, “Anweba bakwetu, tube byepi?”

³⁸ Ne Petelo wibambijile amba, “Lapilai, ne kubatizhiwa bonse mu jizhina ja Yesu Kilishitu mu kulekelwa mambo enu, kabiji mukatambula Mupashi Wazhila wa bupetu.

³⁹ Mambo awa mulaye walaijilwe anweba, ne baana benu, ne bonse baji kwalepa, ne bonse mobavujila bobaketa kwi Nkambo Lesa wetu.”

⁴⁰ Ne na byambo bikwabo byavula aye wibabujishenga ne kwibambila amba, “Ipulushai ku kyo kino kisemi kyaluwankana!”

⁴¹ Byonkabyo abo batambwile mambo anji ba batizhilwe, kabiji mu jonkaja juba bantu babikilweko kwi abo kampe biumbi bisatu.

⁴² Kabiji bakosejiletu mu mafunjisho a batumwa ne mu lumvwang'ano, ne mu kutebaula shinkwa ne mu milombelo.

⁴³ Ponkapo ne moyo wibakwachile bantu bonse, ne byavula bya kukumya ne biyukilo byaubilwe kupichila mu batumwa.

⁴⁴ Ne bonse baitabijile baikajile pamo, ne byonse byo bajinga naabyo byajinga ke bya bonse.

⁴⁵ Kabiji bapoteshenga ne mishiji yabo ne bikwabo byo bajinga naabyo, ke baabile ne ku bonse bakajilwe,

⁴⁶ Kabiji pa juba pa juba, bakelelwenga na muchima umo mu nzubo ya Lesa, kasa batebula shinkwa ku mazubo kwabo, ne kuja kajo kabo na lusekelo ne na muchima umo,

⁴⁷ kasa batota Lesa, ne kutalwa bulongo ku bonse. Kabiji ne aye Nkambo wabikilengapo kwi abo pa juba pa juba aba bapulukilenga.