Byubilo 18 - KNTP

Paulo byo ajinga mu Kolinda

¹ Kabiji pakupita bibye aye wafumine ku Atene ne kuya ku Kolinda.

² Kabiji wataineko mu Yudea umo, jizhina janji Akwila, wasemekelwe mu Pontusa, po po aki fuminetu ku Italya, ne mukazhanji Pilisila, mambo Kaludiusa wakambiizhe amba, Bayudea bonse bafume mu Loma. Ne aye Paulo wayile na kwibamona.

³ Kabiji waikajile ne kwingila naabo pamo, mambo ne aye wajinga na busendwe pamo nobe abo, bwa kuluka matente.

⁴ Kabiji waipuzhang'enenga na bantu mu shinagoga moba onse a Sabado, kasa eseka kwibetabizha Bayudea ne Bagiliki.

⁵ Kabiji byo baishile ba Silasa ne Timoti, kufuma ku Makedonya, Paulo wapaine kimye kyanji kyonse na kusapwila, kasa ebabujisha Bayudea amba Yesu ye Kilishitu.

⁶ Kabiji byo bakanyishetu na lupata ne kumuba mwenga, aye wakunchile lukungu ku bivwalo byanji ne kwibambila amba, “Mashi enu ekale pa mitwe yenu anweba bene, amiwa nabinga kufuma ku ja leelo nkaya ku Bangentila.”

⁷ Ne aye wafumineko ne kuya ku nzubo ya muntu umo jizhina janji Titusa Yusitusa, wapopwelanga Lesa. Nzubo yanji yalamankene na shinagoga.

⁸ Kilishipusa, mukulumpe wa shinagoga, wamwitabijile Nkambo ne ba munzubo yanji bonse pamo; ne bavula bena Kolinda byo ba umvwine mambo baitabijile ne kubatizhiwa.

⁹ Ne Nkambo wamwambijile Paulo bufuku mu kimwesho amba, “Kuuba moyo ne, ambangatu na kuchinchika,

¹⁰ mambo amiwa nji ne obewa, kafwako muntu ukakuuba kyatama ne, mambo bavula baji mu yeuno muzhi bo bantu bami.”

¹¹ Ne aye waikajileko mwaka umo ne bang'ondo batanu na umo, na kwibafunjisha mambo a Lesa.

¹² Pakuba Galio, byo ajinga mukulumpe wa kyalo kya Akaya, Bayudea baishile pamo na kumulwisha Paulo, kabiji bamutwajile ku kije.

¹³ Ne kwamba amba, “Uno muntu ubena kukanjikizha bantu amba, bapopwele Lesa mwabula kuyila mizhilo!”

¹⁴ Pakuba Paulo byo asakile kwamba, Galio wibambijile Bayudea amba, “Inge aji mambo akuuba bintu byatama nangwa a kulenga mambo, abyo inge naji kwimutekenya anweba Bayudea namba nemumvwe.

¹⁵ Pakuba byo aji mepuzho a byambo ne a mazhina ne a mizhilo yenu, apwishai anweba bene; amiwa kechi naswa kwimuchibilao ne!”

¹⁶ Ne aye wibapangile mukije,

¹⁷ Ponkapo bonse bakwachile Sositenesa, mukulumpe wa shinagoga, ne kumupumina konka ku meso a kije. Bino aye Galio kechi wateleko muchima ku byobya ne.

Paulo byo abwelele ku Antioka

¹⁸ Kabiji Paulo waikajileko moba avula, wibashajikilepo balongo, ke lwendo lwa mu bwato kuya ku Silya pamo ne ba Pilisila ne Akwila. Kasa atenda kala nsuki yanji mu Kenkelea; mambo a luchipo lwanji.

¹⁹ Kabiji byo afikile ku Efisesa waabene naabo, bino aye mwine wakatwelele mu shinagoga ka aipuzhang'ane naabo Bayudea.

²⁰ Kabiji byo bamusakile amba abandeko, aye kechi waswile ne.

²¹ Bino pa kwibashajikapo, aye wibalayile amba, “Nkabwela ko muji umvwe aye Lesa waswa.” Kabiji wafumineko ku Efisesa na bwato.

²² Kabiji byo afikile ku Kesalea, wayile na kwimuna kipwilo, kabiji ponkapo wakunkulukijile ku Antioka.

²³ Byo aikajileko bimye bimo wafumineko, wakapichile mu kyalo kya Ngalatiya ne Filigya, monka mo ya londankena mizhi na kukosesha baana babwanga bonse.

Apolosa byo ajinga mu Efisesa ne mu Kolinda

²⁴ Pano umo mu Yudea jizhina janji Apolosa, wa ku Alekesandiliya, waishile ku Efisesa wajinga wafunda bingi, kabiji wajinga wa bulume mu binembelo, wayukile binembelo kya kine kine.

²⁵ Uno wafunjishiwe mwayila jishinda ja Nkambo. Kabiji byo ajinga na muchima walupata, wa ambilenga ne kufunjisha bulongo bintu bya kwa Yesu, nangwa wayukiletu lonkalwa lubatizhilo lwa kwa Yoano.

²⁶ Watatwile kwamba na kuchinchika mu shinagoga. Kabiji byo bamumvwine ba Pilisila ne Akwila, bamutwajile kwabo, ne kumulumbulwila bulongo mwayila jishinda ja Lesa.

²⁷ Kabiji Apolosa wasakile kwabukila mu Akaya, balongo bamukoseshe, ne kumunembela nkalata ya ku baana babwanga amba, bakamutambule. Byo afikileko wibakwashishe bingi aba baitabijile na mambo a bupe bwa Lesa.

²⁸ Mambo aye wibashinkishe bulaka Bayudea na bulume, ku meso a bantu pa kwibamwesha na binembelo amba Yesu ye Kilishitu.