Byubilo 17 - KNTP

Kiwowo kyajinga mu Tesalonika

¹ Paulo ne Silasa bapichile mu Amafipolisa ne Apolonya, baishile ku Tesalonika, ko kwajinga shinagoga ya Bayudea.

² Kabiji monka mwayijile kisela kyanji aye Paulo watwelelenga mu mashinagoga mo bajinga, wisambilenga naabo mu binembelo moba a sabado asatu,

³ kasa ebilumbulula ne kwibambila amba, kyafwainwe Kilishitu kumanama, ne kusanguka mu bafu. Kabiji amba, “Uno Yesu yenka, ye mbena kwimusapwila ye Kilishitu.”

⁴ Ne bamo baitabijile kabiji bebikile kwi ba Paulo ne Silasa, mwi abo mwajinga jibumba jikatampe ja Bagiliki bapopwejilenga Lesa, ne banabakazhi bashing'ama nabo kechi bacheche ne.

⁵ Pakuba Bayudea baubile kichima, kabiji bakaletele bamo ba malofwa batama, bamu kisankanyi ne pa kupwizha pamo jibumba, babushishe kiwowo kikatampe mu muzhi, kabiji bavulumukijile nzubo ya kwa Yasona amba bebalupwile ku bantu.

⁶ Kabiji byo babujile kwibatanamo, bakokele Yasona ne balongo bamo bakwabo ku bakulumpe bamuzhi, babijikishe amba, “Bano bakuvumika ntanda baiya ne kuno,

⁷ ne aye Yasona wibatambula. Kabiji bano bonse babena kuzhilulula mizhilo ya kwa Kesala, amba koaji mfumu ungi wa jizhina ja Yesu.”

⁸ Ponkapo balukushishe michima ya jibumba ne ya bakulumpe bamuzhi, byo ba umvwine bino bintu.

⁹ Kabiji byo batambwile mali kwi Yasona ne bakwabo a kwibalamwinako, bebalekele ke baye.

Paulo ne Silasa byo bajinga mu Beliya

¹⁰ Ponkapo balongo batumine ba Paulo ne Silasa bufuku ku Beliya. Kabiji abo byo bafikileko batwelele mu shinagoga ya Bayudea.

¹¹ Bino bano Bayudea bakijile bena Tesalonika mushingi byo batambwile mambo na maboko abiji, ne kupima binembelo pa juba pa juba amba bamone kana bya ambilenga Paulo bya kine.

¹² Onkao mambo bavula ba mwi abo baitabijile, banabakazhi Bagiliki bashing'ama ne banabalume bavula.

¹³ Bino Bayudea ba ku Tesalonika pakumvwa amba Paulo ubena kusapwila mambo a Lesa ne mu Beliya, baishile monka ne kwiavulumuna mabumba ne kwialukusha.

¹⁴ Ponkapotu balongo bamwimenye Paulo amba afike ne ku kalunga ka mema, bino ba Silasa ne Timoti bashajile konka.

¹⁵ Kabiji aba bamutwajile Paulo bamufikizhe ku Atene, ne byo babwelelenga aye Paulo wibakambizhe amba, Silasa ne Timoti bafwainwa kwiya ko aji bukiji.

Paulo byo ajinga mu Atene

¹⁶ Bino aye Paulo, byo ebapembelejilenga ba Timoti ne Silasa ku Atene, kyamukolele ku muchima wanji byo amwene muzhi wayula na bankishi.

¹⁷ Aye kepo aipuzhang'enenga naba mu shinagoga ne Bayudea ne bapopwelanga Lesa, ne pa kisankanyi napo na bantu bo a sambakenenga pa juba pa juba.

¹⁸ Kabiji bamo bena Epikyulya ne bena Sitoiki batemwa maana, basambakene nanji. Kabiji bamo ba ambile amba, “Uno kyabauki ambe ka?” Bakwabo amba, “Wauba nobe usapwila balesa bangi.” Mambo aye wasapwijilenga Mambo Awama a Yesu ne lusanguko lwa bafu.

¹⁹ Ponkapo bamukwachile ne kumutwala ku Aleopagusa amba, “Tuyuke molwayila luno lufunjisho lupya, lomubena kufunjisha anweba.

²⁰ Mambo mubena kuleeta bintu bimo bipya mu matwi etu, kyotwasakila kuyuka mo byayila.”

²¹ (Mambo bonse bena Atene ne benyi baikalangako kechi batayanga kimye mukuuba kintu kingi ne, kana mu kwamba nangwa kumvwa bintu bipya.)

²² Ponkapo Paulo waimene mukachi ka kije kya Aleopagusa ne kwamba amba, “Anweba bena Atene, mu bintu byonse namona byo mwakizhamo kupandawila ba lesa.

²³ Mambo byo nabapitenga ne kumona bintu byo mupopwela, nataine kipandawilo panembwa amba, ‘KWI LESA WABULA KUYUKANYIKWA.’ Nanchi aye ye mupopwela kwakubula kumuyuka, iye ye mbena kwimusapwila.

²⁴ Lesa yenkaye walengele ntanda ne byonsetu bijimo, byo aji Nkambo wa mwiulu ne panshi, kechi wikala mu mazubo o bashimika na maboko a bantu ne.

²⁵ Nangwa kwingijilwa na maboko a bantu nobe wakajilwa kintu ne, byo aji mwine upana mweo ne muuya ku bonse, ne bintu byonse.

²⁶ Kabiji walengele ku umo mikoka yonse ya bantu bekala pano pantanda ponse, ne kwibatongwela myaka yabo, ne mipaka ya kwikalamo.

²⁷ Amba bamukebe Lesa, kana kampe bakapapaate na kumukeba ne kumutaana, kabiji byonkabyo kechi uji kwalepa ne atweba bonse ne;”

²⁸ mambo Mwi aye mo motumwena bumi bwetu, mo motupitang'ena, mo motwikela. Monka mo ba ambijile bamo benu banembele nyimbo amba, Mambo atweba twi bamu kisaka kyanji.

²⁹ Byonkabyo byo tuji ba mukisemi kya Lesa, kechi twafwainwa kulanguluka amba, bu Lesa bwapashang'ana na ngolode, nangwa na siliva, nangwa na jibwe, byo basonga na busendwe ne maana a bu muntu ne.

³⁰ Kabiji aya myaka bantu ya bulubi, Lesa wiileka, pakuba pano ubena kukambizha bantu bonse konse amba balapile ne kufuma ku mashinda abo atama.

³¹ Mambo aye watongola juba jo ake bachibilamo mambo ba pano pantanda monka mu bololoke konka kwi yewa muntu ye atongola. Kabiji byo akooba byonkabyo aye wibapa bonse kiyukilo kya kwibayukishako, byo amusangwile awa muntu mu bafu!

³² Kabiji byo ba umvwine mambo a lusanguko lwa mu bafu, bamo kebamuseke mwenga, kabiji bakwabo amba, “Twasaka kumvwa ne jikwabo ano mambo.”

³³ Kepo Paulo alupukile mo bajinga.

³⁴ Pakuba banabalume bamo belamikile kwi aye ne kwitabila, mwi abo mwajinga ba Dionisiusa wa mukije kya Aleopagusa, ne mwanamukazhi jizhina janji Damalisa, ne bakwabo bamo.