Byubilo 14 - KNTP

Banabasa ne Paulo mu Ikonyuma

¹ Kabiji pamotu ne ku Ikonyuma abo batwelele mu shinagoga wa Bayudea ne kwamba kyakuuba ne jibumba jikatampe ja Bayudea ne Bagiliki baitabijile.

² Pakuba Bayudea bamilengulwila bakolomwene michima ya Bangentila, amba bebatale bibi balongo betu.

³ Onkao mambo batumwa baikajileko kimye kyabaya, kasa bambatu mambo a Nkambo na kuchinchika, ne aye Nkambo wamwesheshe bukamonyi ku byambo bya bupe bwanji amba bya kine pa kwibapa bulume bwa kwingila biyukilo ne bya kukumya.

⁴ Pakuba jibumba ja mu muzhi ja abene, bamo bateele muchima ku Bayudea, bakwabo nabo ku batumwa.

⁵ Kabiji Bangentila bamo ne Bayudea ne bakulumpe babo basakile amba bebayanjishe ne kwibasa mabwe.

⁶ Batumwa byo bekiyukile, banyemejile ku Lisitila ne ku Delebe, mizhi ya mu Likonya, ne mu kyalo kyajinga kwipi.

⁷ Konkakwa batwajijile kusapwila Mambo Awama.

Banabasa ne Paulo mu Lisitila ne mu Delebe

⁸ Kabiji mu Lisitila mwajinga muntu walemana maulu kufuma ku kusemwa kwanji aye kechi waendelepo nagwa jimotu ne.

⁹ Aye waumvwinega bya ambilenga Paulo. Ne aye Paulo wamutajijishe ne pa kumona amba, uji na lwitabilo lwa kumubuka,

¹⁰ wamwambijile na jiwi jikatampe amba, “Imana na maulu obe oloke!” Ponkapo wakilukile kaende ne kwenda.

¹¹ Kabiji jibumba pa kumona byaubile Paulo, basanswile mawi abo ne kwamba mu Kilikonya amba, “Mama, ba lesa baikila kotuji ba aluka pamo nobe bantu!”

¹² Banabasa bamutumbile amba Zeusa, ne Paulo naye ja bu Hamesa, mambo ye mwine wamba.

¹³ Ponkapo aye ng'anga wa mu nzubo ya nkishi wa Zeusa, wajinga ku kibelo kya muzhi waletele bang'ombe ne minchinya ya maluba konka ku bibelo, wasakilenga kutapisha bitapisho pamo na mabumba.

¹⁴ Ponkapo abo batumwa ba Banabasa ne Paulo, byo bekyumvwine, batabawile bivwalo byabo, ne kuswatukila mu jibumba kasa babijika amba,

¹⁵ “Anweba bakwetu, mambo ka o mubila bino bintu? Ne atweba twi bantutu pamo ne anweba, twimuletela Mambo Awama, muvundamine ku bino bincha, mwalulukile kwi Lesa mumi, walengele jiulu ne ntanda, ne kalunga ka mema, ne byonsetu bijimo.

¹⁶ Ye walekele mikoka yonse ya bantu mu myaka ya kala amba, bendenga mu mashinda abo bene.

¹⁷ Nangwa byonkabyo aye kechi wilekele mwine kwakubula bukamonyi ne, mambo waubilenga byawama, pa kwimutumina mvula kufuma mwiulu ne bimye bya kajo kavula, kasa ekusha michima yenu na kajo nena lusekelo.”

¹⁸ Nangwa na bino byambo basakile kukankalwa kwiakanya mabumba kwibatapishisha bitapisho.

¹⁹ Kepo kwaishile Bayudea bamo bafumine ku Antioka ne Ikonyuma, ne byo beaswishishe mabumba, Paulo bamwashile mabwe ne kumukulumwina pangye ya muzhi, balangulukile amba, wafwa.

²⁰ Pakuba baana babwanga byo baimene kasa bamuzhokoloka, aye wabuukile ne kutwela mu muzhi. Kabiji juba jalondejilepo aye Paulo ne Banabasa bayile ku Delebe.

Kubwela kwa Banabasa ne Paulo ku Antioka

²¹ Byo basapwijilenga Mambo Awama mu yewa muzhi ne kwitabizha bavula ke baana babwanga, babwelele ku Lisitila, ne ku Ikonyuma, ne ku Antioka.

²² Kasa bakosesha michima ya baana babwanga, ne kwibatundaika kwikala bakishinka mu lwitabilo amba, “Mu bya malwa byavula mo motutwelela mu bufumu bwa Lesa.”

²³ Kabiji byo bebatongwejile bakulumpe mu bipwilo byonse, na kulomba ne kuzhikilwa na nzala, bebafikizhe kwi Nkambo ye baitabijile.

²⁴ Byonkabyo bapichile mu Pisidya, bayile ku Pamfilya.

²⁵ Kabiji byo ba ambile mambo mu Pelega, bakunkulukile ku Atalya,

²⁶ ne pa kufuma kokwa bapatamine mu bwato kuya ku Antioka, ko bapainwe ku bupe bwa Lesa na mambo a yoya mingilo yo bapwishishe.

²⁷ Kabiji byo bafikile, bakonkenye pamo kipwilo, bebabujile byonsetu byaubile Lesa, ne byo a shinkwijile Bangentila kibelo kya lwitabilo.

²⁸ Kabiji baikajile na baana babwanga kimye kikatampe.