Byubilo 13 - KNTP

Kusalululwa ne Kutumwa kwa Banabasa ne Saulo

¹ Mu kipwilo kya ku Antioka mwajinga bangauzhi ne bafunjishi, ba Banabasa ne Shimeona (jikwabo amba Ufiita), ne Lukiusa mwina Kilene, ne Manena ye balelelenga pamo ne Heloda mfumu, ne Saulo.

² Byo bapopwejilenga Nkambo ne kuzhikilwa na nzala, aye Mupashi Wazhila wibambijile amba, “Mpaatwilai Banabasa ne Saulo bengile uno mwingilo ye nebechila.”

³ Ponkapo byo bazhikijilwe na nzala ne kulomba, be batentekele maboko ne kwibatuma.

Banabasa ne Paulo mu Kipilusa

⁴ Abo byo bebatumine ku Mupashi Wazhila, Banabasa ne Saulo bayile ku Selukya, pa kufumako bayile na bwato ku Kipilusa.

⁵ Byo bafikile ku Salamisa, batatwile kusapwila mambo a Lesa mu mashinagoga a Bayudea. Bajinga ne Yoano wibakwashishenga.

⁶ Bapichile mu jikuji jonse kufika ne ku Pafosa, kobasambakene muyudea wa bingelekezha, ngauzhi wa bubela, jizhina janji Balayesu.

⁷ Ye wajinga mulunda nanji mukulumpe wa kyalo, Seligiusa Paulosi, wajinga muntu wa maana. Mukulumpe wa kyalo waichile Banabasa ne Saulo, amba omvwe mambo a Lesa.

⁸ Pakuba Elimasa uba bingelekezha (mo mwayila jizhina janji pa kwijilumbulula mu Kigiliki) waesekele kumusendula aye mukulumpe wa kyalo ku lwitabilo.

⁹ Ponkapo aye Saulo, jikwabo Paulo, byo ayujile na Mupashi Wazhila wamutajijishe,

¹⁰ ne kumwambila amba, “Obewa mwana Diabola, obewa mulwanyi wa bololoke bonse wayula na bujimbijimbi bonse ne bujimuku bonse bwa kuuba bibi, kechi ukaleka kuvulang'anya mashinda aoloka a Nkambo nenyi?

¹¹ Kabiji pano tala kuboko kwa Nkambo kwakufikila, kabiji usakwikala ke mpofu ka kimye, ne kumona mute ne.” Ponkapotu kamfwa ne mfishi byamuponejile, kapupuute na kusaka wakumukwata ku kuboko na kumutangijila.

¹² Ponkapo aye mukulumpe wa kyalo, pa kumona kyaubilwe waitabijile, mambo wakuminye lufunjisho lwa Nkambo.

Banabasa ne Paulo mu Antioka wa mu Pisidya

¹³ Kabiji Paulo ne boajinga naabo bafumine ku Pafosa mu bwato ne kuya ku Pelega mu Pamfilya. Kabiji Yoano Mako wibashiile ne kubwela ku Yelusalema.

¹⁴ Bino abo bafumine ku Pelega ne kuya ku Antioka mu ntanda ya Pisidya, ne mu juba ja Sabado batwelele mu shinagoga ne kwikala baikajile panshi.

¹⁵ Byo bapwishishe kutanga mu buku wa Mizhilo ya Mosesa ne wa bangauzhi, bakulumpe ba shinagoga batumine jiwi kwi abo amba, “Bakwetu, kana muji na byambo bya kutundaika bantu byambai.”

¹⁶ Ponkapo Paulo waimene, ne pa kukebaula na kuboko kwanji wa ambile amba. “Anweba bena Isalela ne anweba baakamwa Lesa, umvwai.

¹⁷ Aye Lesa wa bano bantu bena Isalela wasalulwile bashakulu betu ke mukoka mukatampe byo bajinga benyi mu kyalo kya Ijipita. Ponkapo wibafumishemo na kuboko kwanji kwa kutanyika.

¹⁸ Kabiji myaka pepi makumi ana wibalamine mungyetu.

¹⁹ Kabiji byo a onawine mikoka itanu na ibiji mu kyalo kya Kenana, wibapele kyalo kyabo ke buswanyi.

²⁰ Abye byonse byamwekele pakupita myaka bitota bina ne myaka makumi atanu.” Ne pakupita bibye wibapele mitonyi, kufika ne kwi Samwela ngauzhi.

²¹ Kabiji palutwe byo balombele mfumu, aye Lesa wibapele Saulo mwana Kisha wa mu mukoka wa Benjamina, myaka makumi ana.

²² Kabiji pa kumufumyapo, waimikile Davida amba ekale mfumu wabo, yenkaye ye a shimwine amba, “Namona Davida, mwana Yese, muntu wayila monka mwayila muchima wami, ye ukooba byonse byo nasaka.”

²³ Monka mu ba munkunwa ya Davida, aye Lesa wibemenyamo bena Isalela Mupulushi Yesu, monka mwayila mulaye wanji.

²⁴ Kabiji kasa akyangye kwiya, aye Yoano wasapwijile patanshi mambo a lubatizhilo lwa lulapilo, kubena Isalela bonsetu.

²⁵ Kabiji Yoano byo ayilenga na kupwisha kikonkwanyi kyanji, wibambijile amba, “Anweba mundanguluka amba, amiwa ne ng'anyi? Amiwa kechi yami iye ne. Pakuba talai, panyuma yami peya umo, makwabilo a ku maulu anji amiwa kechi nafwainwa kwiakasulula ne.”

²⁶ “Anweba bakwetu, baana ba ku kikota kya Abulahama, ne bo muji naabo bamwakamwa Lesa, kwi atweba bonse koatumwa ano mambo aluno lupulukilo!

²⁷ Mambo bekala mu Yelusalema ne bakulumpe babo kechi bamuyukile, nangwa kuyuka byambo bya bangauzhi byo batanga moba onse a Sabado ne. Nangwa byonkabyo balengejile byambo bya bangauzhi kufikizhiwa pa kumuzhachisha aye.

²⁸ Kabiji abo nangwa kechi bataine mambo mwi aye afwainwa lufu ne, abo balombele Pilato amba bamwipaye.

²⁹ Kabiji byo bafikizhe byonse byamunembejilwe, bamwikizhe kufuma ku kichi ne kumubika mu kilende.

³⁰ Pakuba Lesa wamusangwile mu bafu,

³¹ ne aye wamwekele moba avula kuboba bo aishile naabo kufuma ku Ngalilea kwiya ku Yelusalema. Abo pano bo batumonyi banji ku bantu.

³² Kabiji atweba twimuletela anweba Mambo Awama amba, abya bintu byo alayile Lesa ku bashakulu betu,

³³ aye wibifikizha kwi atweba baana babo pa kumusangula Yesu mu bafu; namo monka mo kyanembelwa mu Salamo wa bubiji amba,” “Obewa wi Mwanami, jonka ja leelo jino jo nakusema.”

³⁴ Kabiji mwayila mambo a kumusangula mu bafu, amba pano kechi akabwele ku bubole ne, mo a ambijile mo muno amba, “Nkemupa bibusa byazhila ne bya kine byo nalayile kwi Davida.”

³⁵ Byonkabyo ne mu Salamo mukwabo namo aye amba, “Kechi mukaswisha wenu Wazhila amba amone bubole ne.”

³⁶ Pakuba aye Davida, wafwile byo apwishishe kwingijila kisaka kyanji mwine monka mwayijile muchima wa Lesa, kabiji wazhikilwe pamo na bashakulu banji, ne mubiji wanji wamwene bubole mu kilende.

³⁷ Pakuba aye ye basangwile kwi Lesa kechi wamwene bubole ne.

³⁸ Byonkabyo anweba bakwetu, yukai amba mu ye uno muntu, lulekelo lwa mambo lubena kusapwilwa kwi anweba. Mambo mizhilo ya Mosesa kechi yakonsha kwi mukasulula ku bubi bwenu bonse ne.

³⁹ Kabiji mwi aye, bonse baitabila ba bingishiwa ku byonse byakankelwe kwibabingisha ku Mizhilo ya Mosesa.

⁴⁰ Byonkabyo jimukai, kuchiina amba akya kyo ba ambile bangauzhi kya kemufikila amba,

⁴¹ “Monai, anweba bamilengulwila! Kumyai ne konaika! Mambo amiwa mbena kwingila mwingilo mu moba enu, mwingilo ye mukabula kwitaba, nangwa umo ukemubulaye!”

⁴² Byo balupukilenga, bebasashijile amba, bino byambo muketubuule ne mu juba ja Sabado jikwabo jalondelapo.

⁴³ Kabiji pa kupalang'ana mu shinagoga, bavula Bayudea ne bealula ke Bayudea bapopwela Lesa balondejile ba Paulo ne Banabasa, ne abo bebambijile ne kwibasashijila amba, “Ikajikwai mu bupe bwa Lesa.”

⁴⁴ Kabiji muja Sabado jikwabo jalondejilepo pepi muzhi yense bapwijile na kumvwa mambo a Nkambo.

⁴⁵ Pakuba Bayudea pa kumona aa mabumba, baubile kichima, kabiji batatwile kwibilengulula bya ambilenga Paulo ne kumuba mwenga.

⁴⁶ Kabiji ba Paulo ne Banabasa ba ambilengatu na kuchinchika amba, “Kyaji kufwainwa mambo a Lesa asapwilwe kwi anweba patanshi. Pakuba byo mwiakana ne kwichibila mambo anweba bene amba, kechi mwafwainwa bumi bwa myaka ne, nanchi, pano twaalukila ku Bangentila.

⁴⁷ Mambo mo moetukambizha Nkambo amba, “Nakutongola namba wikale ke kyeya kya Bangentila, amba ufikizhe lupulukilo konsetu ne kwapela ntanda.”

⁴⁸ Ne Bangentila byo ba umvwine bino basekejile bingi ne kwiatumbijika mambo a Nkambo, kabiji mo bavujile batongwejilwe bumi bwa myaka baitabijile.

⁴⁹ Ponkapo mambo a Nkambo akumbene amwa mu kyalo kyonse.

⁵⁰ Bino Bayudea bebakolomwene banabakazhi bashing'ama bapopwelanga Lesa, ne bakulumpe ba mu muzhi, babushishe lupato lwa kwibapata ba Paulo ne Banabasa, ne kwibapanga bebapangile mu kyalo kyabo.

⁵¹ Batumwa bakunchile lukungu lwa ku maulu abo kabiji bayile ku Ikonyuma,

⁵² Kabiji baana babwanga bayujile na lusekelo ne na Mupashi Wazhila.