Byubilo 12 - KNTP

Kipwilo byo kyatwajijile na kumanyikwa

¹ Pa kyonkakya kimye Heloda mfumu wakolomokele kwibamanyika bamo bamu kipwilo.

² Waipayile Yakoba mulongo wa kwa Yoano na mpoko.

³ Bino byo amwene amba kibatokesha Bayudea pa muchima, wayile na kukwata ne Petelo pamo. Kabiji aa moba ajinga a bashinkwa ba kubula mbizho.

⁴ Kabiji byo a mukwachile, wamubikile mu kaleya, wamufikizhe ku bashilikale biombe bina, bya pa bana pa kiombe, ba kumulama amba nkamusolole ku bantu pakupwa moba a kijiilo kya Lupitailo.

⁵ Byonkabyo Petelo bamulamine mu kaleya, bino kipwilo kyamulombejilenga kwi Lesa na muchima yensetu.

Kupokololwa kwa Petelo kufuma mu kaleya

⁶ Kabiji aye Heloda byo ajinga pepi na kumulupulamo, bonkabwa bufuku, Petelo walaajile pakachi ka bashilikale babiji, kasa bamukasa na minyololo ibiji, ne baota balaminenga kaleya kasa baji pa kibelo.

⁷ Kabiji talai malaika wa Nkambo waimene po aji, ne kyeya kyasamine mu kaleya. Ne aye wamupumine Petelo mu mbavu ne kumubusha amba, “Imana bukiji.” Ponkapo minyololo yanji yaponeneko ku maboko anji.

⁸ Kabiji malaika wamwambijile amba, “Inyinge ne kuvwala makwabilo obe.” Ne aye waubile byonkabyo. Kabiji wamwambijile amba, “Ikumbakanye kivwalo kyobe ne kundondela.”

⁹ Ne Petelo walupukile pangye kamulondele. Kechi wayukile amba kyo abena kuuba malaika kyokya kine ne, walangulukile amba, wamonatu kimwesho.

¹⁰ Byo bapitaijile muota mutanshi, ne wa bubiji, bafikile ne ku kibelo kya kyela kyatala mu muzhi. Akyo kibashinkukijile kine, byo balupukilemo ne kupitailapo mukwakwa umo, ponkapotu malaika wamushiile.

¹¹ Kabiji Petelo pa kulubuluka muchima, wa ambile amba, “Pano nayuka kine, namba Nkambo waji kutuma malaika wanji kwiya na kumpokolola mu kuboko kwa Heloda, ne monse mo baketekela Bayudea.”

¹² Kabiji pa kupwisha kwikilanguluka bulongo, wayile ku nzubo yakwa Maliya inanja Yoano, jikwabo Mako, ko kwapwijile bantu bavula na kulomba.

¹³ Kabiji byo a konkonsheshe ku kibelo kya pangye, kwaishile kamwale wa mwingilo na kwitaba, jizhina janji Loda.

¹⁴ Ne aye byo ayukile jiwi amba ja kwa Petelo, kechi washinkwileko ne, na mambo a lusekelo, wabwelele monka lubilo na kwibabula amba, Petelo ye waimana ku kibelo.

¹⁵ Kumvwa abo ba mwambijile amba, “Wakonya nyi?” Pakuba aye wakoselepo amba, “Kine i ye.” Kabiji abo amba, “Ye malaika wanji.”

¹⁶ Bino Petelo watwajijiletu na kukonkonsha. Byo bashinkwileko kibelo, bamumwene, ne kukumya bingi.

¹⁷ Bino aye wibakebawile na kuboko, amba bazhindame, ke ebabuule mobamufumisha kwi Nkambo mu kaleya, kabiji wibambijile amba, “Kabulai Yakoba ne balongo bakwabo bino bintu.” Ponkapo aye wafumineko, ne kuya kungi.

¹⁸ Kabiji pa kukya lukeelo, kwalukuchile bingi ku bashilikale, amba kana kika kyamweka kwi Petelo?

¹⁹ Kabiji Heloda byo amukebele ne kumumona ne, watotolweshe baota, ne kukambizha amba bebepaye. Ponkapo Heloda wafumine ku Yudea ne kuya na kwikala ku Kesalea.

Lufu lwa kwa Heloda

²⁰ Pano Heloda wibazhingijile bingi bena Tila ne bena Shidona, ne abo baishile koaji na muchima umo, byo aswile Bulashita, kalama wa nzubo ya mfumu, bayile kwi mfumu na kulomba mutende, mambo kyalo kyabo kyatambulanga kajo kufuma ku kyalo kya mfumu.

²¹ Pa juba joatongwele Heloda wavwajile bivwalo byanji bya bufumu, waikele ne pa jitanda janji, na kwibabuula byambo.

²² Ne bantu babijikilenga amba, “Jo jiwi ja lesa, kechi ja muntu ne!”

²³ Ponkapotu malaika wa Nkambo wamupumine, mambo kechi wapaine lukumo kwi aye Lesa ne, kabiji bamujiile ku mizambo ne kufwa wafwile.

²⁴ Pakuba mambo a Lesa ayilenga kulutwe na kukomenako.

²⁵ Kabiji Banabasa ne Saulo, byo bapwishishe mingilo yabo, babwelele kufuma ku Yelusalema, bamusendele ne Yoano Mako.