Byubilo 11 - KNTP

Petelo byo apaine sawakya ku kipwilo kya mu Yelusalema

¹ Batumwa ne balongo bajinga mu Yudea ba umvwine amba, Bangentila nabo batambula mambo a Lesa.

² Byonkabyo Petelo byo afikile mu Yelusalema, ba mu mukanda bamunenene amba,

³ “Anweba mwakatwelele mu babula mukanda, ne kuja naabo.”

⁴ Bino Petelo wibalondolwejile mo kyamwekejile amba.

⁵ “Amiwa najinga mu muzhi wa Yopa kasa ndomba, kabiji naponejile mutulo tukatampe. Ponamwene kimwesho kya kijiilo kasa kiikila, pamo nobe kisapi kikatampe kyo bekizha panshi ku makonka onse ana kufuma mwiulu, ke kiye ne ponji,

⁶ byo nekizanzhile meso, ne kwikitajisha, namwene banyama ba mikupa ina, ne banyama bakaji, ne bikalaba panshi, ne bang'onyi ba mwiulu.

⁷ Kabiji naumvwine jiwi amba, ‘Petelo, imana; wipaye uje!’

⁸ Pakuba amiwa namba, ‘Akyo ne, Nkambo! Mambo kechi napishishepo kala mu kanwa kami kyatu kya kijejeje nangwa kyazhila ne.’

⁹ Bino jiwi jang'ambijie jibiji mwiulu amba, ‘Kyoatokeshaa Lesa, obewa kechi wikitela amba, kyatu kya kijejeje ne.’

¹⁰ Kino kyaubiwe jisatu ne byonse bebikokejile jibiji mwiulu.

¹¹ Kabiji talai ponkapotu ne banabalume basatu baimene pangye ya nzubo yo twajingamo, bo bantumijile amiwa kufuma ku Kesalea.

¹² Ne aye Mupashi wang'ambijie amba, uye naabo kwakubula kuzhinauka ne. Ne bano balongo batanu na umo bayile ne amiwa, kabiji twakatwelele mu nzubo ya yeo muntu.

¹³ Ne aye witubujile mo amwenejile malaika kasa aimana mu nzubo yanji, ne kumwambila amba, ‘Tuma bantu ku Yopa, baleete Shimona, jikwabo Petelo.

¹⁴ Ye ukakubula byambo byo ukapulukilamo, obewa ne bonse ba munzubo yobe pamo.’

¹⁵ Byo natatwile kwamba, ponkapo aye Mupashi Wazhila waikijile pe abo, pamo byonka byo aikijile pe atweba kuntendekelo.

¹⁶ Ne amiwa ponkapo navulukile byambo bya Nkambo, byo a ambile amba, ‘Yoano kine wabatizhilenga na mema, pakuba anweba mukabatizhiwa na Mupashi Wazhila.’

¹⁷ Byonkabyo umvwe aye Lesa wibapele kya bupetu kimotu kyonka kyoetupelepo ne atweba byo twamwitabijile Nkambo Yesu Kilishitu, amiwa yami ng'anyi, wakonsha kukanya Lesa!”

¹⁸ Byo ba umvwine bino, bazhindamine nzo, ke bamutumbijike Lesa amba, “Nanchi kine Lesa wibapa ne Bangentila nabo lulapilo lwa ku bumi!”

Kipwilo kya ku Antioka

¹⁹ Kabiji abo bapalang'ene na mambo a bya malwa byabuukile pe Setepena bayile bakafikile ne ku Finesha, ne ku Kipilusa, ne ku Antioka, ne kwamba mambo ku bangi nangwa umo ne, kana ku Bayudea bonka.

²⁰ Kabiji kwajinga bamo ba mwi abo, bena Kipilusa ne bena Kilene, abo pakufika ku Antioka, kebambe ne ku Bagiliki, kasa basapwila Mambo Awama a Nkambo Yesu.

²¹ Ne kuboko kwa Nkambo kwajinga naabo, ne jibumba jikatampe ja itabijile ne kwalulukila kwi Nkambo.

²² Kabiji nkuwa yabo yaumvwanyikile ne mu matwi a kipwilo kya mu Yelusalema, kabiji bamutumineko Banabasa amba akafike ku Antioka.

²³ Aye pakufikako ne kumona bupe bwa Lesa, wasekejile kabiji wibatundaikile bonse amba, balamachile kwi Nkambo na michima yabo yonse.

²⁴ Mambo aye wajinga muntu wawama, wayujilwe na Mupashi Wazhila ne na lwitabilo, ne bantu bavula banungilweko kwi Nkambo.

²⁵ Ponkapo Banabasa waimene lwendo kuya ku Talasusa na kukeba Saulo.

²⁶ Ne byo a mutaine wamuletele ku Antioka, byonkabyo mwaka umo mutuntulu bapwijilenga pamo na kipwilo ne kufunjisha bantu bavula. Kabiji baana babwanga mu Antioka momo batelelwe patanshi amba bena Kilishitu.

²⁷ Kabiji mu onka a moba mu Antioka mwaishile bangauzhi bafumine ku Yelusalema.

²⁸ Kabiji mwaimene umo jizhina janji Agabusa, ka ambe mu Mupashi amba kukeya kipowe kikatampe kikakumbana pano pantanda ponse. Ne akyo kyaishile mu moba a kwa Kaludiusa.

²⁹ Byonkabyo baana babwanga bapwishishe mu michima yabo amba bonse pa muntu pa muntu, monka mo akonshesha kuuba muntu, tutume bya bupe bya kwibakwasha bakwetu bekala mu Yudea.

³⁰ Kabiji bekyubile, ne kwibituma ku bakulumpe ku maboko a ba Banabasa ne Saulo.