Byubilo 10 - KNTP

Petelo ne Koneleusa

¹ Kabiji mu Kesalea mwajinga muntu umo, jizhina janji Koneleusa, mukulumpe wa bashilikale wa mukipamo kyobatelele amba, “Kya ku Italya.”

² Aye wanemekanga ne kumwakamwa Lesa pamo naba mukisemi kyanji bonse, kabiji wapainenga bya bukwasho byavula ku bakajilwa, ne kulomba kwi Lesa moba onse.

³ Juba jimo pepi na pa kulemba juba aye wamwene kimwesho, wamwesheshetu malaika wa Lesa, katwele mo ajinga ne kumwambila amba, “Koneleusa.”

⁴ Ne aye pakumutajisha wa umvwine moyo ne kwamba amba, “Amba ka Nkambo?” Kumvwa aye amba, “Milombelo yobe ne bya bupe byobe ku balanda byafika kwi Lesa, ke bya kukuvulukilako.

⁵ Pano tuma bantu ku Yopa, bakalete Shimona Petelo.

⁶ Wafikila kwi Shimona sendwe wa biseba, nzubo yanji iji ku mukulo wa kalunga ka mema.”

⁷ Ponkapo pa kufumako awa malaika ye a ambilenga nanji, aye waichile bamingilo ya mu nzubo yanji babiji, ne mushilikale wanemekanga Lesa wa mu bonkaba bamwingilo banji.

⁸ Kabiji byo ebabujile byonsetu, wibatumine ku Yopa.

⁹ Kabiji mu juba jalondejilepo byo bakijinga mu jishinda, byo bafikile kwipi na ku muzhi, Petelo wakanjijile pa mutenge wa nzubo na kulomba; kimye kyajinga pepi na kushinkimana juba.

¹⁰ Kabiji wa umvwine nzala kasake kuja, bino byo bakinengezhezhenga kajo, wamwene kimwesho.

¹¹ Ne kumona mwiulu mwashinkuka, ne kijiilo ke kiikile pamo nobe kisapi kyo bekizha panshi ku makonka onse ana.

¹² Mo mwajinga misango yonse ya banyama ba maulu ana, ne ya bikalaba panshi ne ya bang'onyi ba mwiulu.

¹³ Jiwi jaishile kwi aye amba, “Petelo, imana, wipaye, ne kuja!”

¹⁴ Pakuba aye Petelo amba, “Akyo ne, Nkambo! Mambo kechi najiilepo kala kya kijejejetu nangwa kyazhila kuja ine.”

¹⁵ Jiwi jaishile kwi aye jibiji amba, “Kyo atokesha Lesa obewa kechi wikitela amba, kya kijejeje ne.”

¹⁶ Akye kyaubiwe jisatu, ponkapo akya kijiilo kyatwajilwe mwiulu.

¹⁷ Kabiji Petelo byo akizhinaukilenga mu muchima na kyokya kimwesho kyo amwene, amba kana kyayila mu ka, aba bantu bo atumine Koneleusa, byo baipwizhe kala nzubo ya Shimona, baimene pa kibelo.

¹⁸ Baipwizhe amba, “Ba Shimona, jikwabo ba Petelo, bafikila momo nyi?”

¹⁹ Kabiji Petelo byo a kilangulukilenga akya kimwesho, ponkapo Mupashi wamwambijile amba, “Tala, bantu basatu babena kukusaka.

²⁰ Pano imana, wikile, uyenga naabo, kuzhinauka ne, mambo amiwa yami nebatuma.”

²¹ Ponkapo Petelo waikijile, waiya ku bantu ne kwibambila amba, “Amiwa uno ye musaka. Ng'anyi mambo o mwaendela?”

²² Kumvwa abo ba mwambijile amba, Koneleusa, mukulumpe wa bashilikale, muntu waoloka, wa akamwa Lesa, watelwa bulongo ku mukoka yense wa Bayudea, ba mwambijile kwi malaika wazhila wa Lesa, kwimulonda anweba ne kwimutwala ku nzubo yanji, amba omvwe byambo kwi anweba.

²³ Kepo ebechile ne kwibabula pa kufikila. Byo bwakiile lukeelo waimene kaye ne naabo, ne balongo bamo ba ku Yopa bayile nanji.

²⁴ Ne mu juba jalondejilepo batwelele mu Kesalea, Koneleusa wibatengejilenga, kabiji wapwizhizhe jimo balongo banji ne balunda nanji bo atemwang'ene naabo.

²⁵ Petelo byo atwelele, Koneleusa wamutundaijile, ne kumulambila panshi ku maulu, kamupopwele.

²⁶ Bino aye Petelo wamwimenye amba, “Imanai, ne amiwa ne muntutu.”

²⁷ Ne byo a ambile nanji watwelele, kabiji wataine bantu bavula kasa bapwila.

²⁸ Ne aye wibambijile amba, “Anweba mwayuka amba, kizhila mu Yudea kwilamika ku wa mu mukoka ungi, nangwa kumupempulatu ne; bino aye Lesa wambuula amiwa amba, kechi utele muntu amba watu ne, nangwa amba, wazhila ne.

²⁹ Kyo kyonaishila kwakubula kukosakana, byo mwangichile. Byonkabyo pano nemwipuzha namba mwangichilaka?”

³⁰ Kumvwa aye Koneleusa wa ambile amba, “Ke moba ana apitapo, kabiji pa kyonka kino kimye, byo nalombelenga mu nzubo yami mu kimye kya milombelo po pa kulemba juba, kabiji ponkapo muntu waimene kwi amiwa kasa avwala byabembela,

³¹ wang'ambijile amba, Koneleusa, milombelo yobe yaumvwanyika, kabiji aye Lesa wamona ne bya bupe byobe byoukwasha balanda.

³² Byonkabyo tuma bantu ku Yopa, bakakwichile Shimona, jikwabo Petelo; wafikila mu nzubo ya kwa Shimona sendwe wa biseba, iji ku mukulo wa kalunga ka mema.

³³ Onkao mambo natumine bantu ponkapotu kuji anweba; ne anweba mwauba bulongo byo mwaiya. Byonkabyo pano atweba bonsetu tuji kuno ku meso a Lesa, namba tumvwe byonse byo bemukambizha kwi Nkambo.”

Mambo a ambile Petelo ku nzubo ya kwa Koneleusa

³⁴ Ponkapo Petelo watatwile kwamba amba, “Kine pano nayuka namba aye Lesa kechi utala ku bilungi bya bantu ne.

³⁵ Pakuba ne mu mikoka yonse ya bantu, aye wamwakamwa, ne kuuba byaoloka, ye waitabilwa kwi aye,

³⁶ O mambo o atumine kubena Isalela, a kusapwila Mambo Awama a mutende mwi Yesu Kilishitu, aye ye Nkambo wa bonsetu.

³⁷ Ne anweba bene mwayuka byamwekele monse mu Yudea, kutatwila ku Ngalilea, kufuma pa lubatizhilo lwasapwijilenga Yoano,

³⁸ a Yesu mwina Nazala, byo bamushingile manyi kwi Lesa na Mupashi Wazhila ne na bulume. Ye wapitang'enenga na kwingila byawama, ne kubuka bonse bo bamanyikilenga kwi Diabola, mambo Lesa wajinga nanji.

³⁹ Ne atweba twi batumonyi ba byonse byo aubilenga, ne mu kyalo kya bena Yudea, ne mu Yelusalema. Ye baipayile byo bamupopele pa kichi.

⁴⁰ Pakuba Lesa wamusangwile mu juba ja busatu, ne kumusolola amba amweke ku bantu,

⁴¹ kechi ku bonsetu ne, kana ku bonka batumonyi bo asalulwijile jimo mwine Lesa, ye atweba, twajile ne kutoma nanji, byo asangukile mu bafu.

⁴² Kabiji ye witulayile amba, mukebasapwile bantu, ne kunshimuna amba, ye mwine ye atongola Lesa amba akekale wa kwibachibila mambo bomi ne bafu.

⁴³ I ye yebashimuna ku bangauzhi bonsetu amba, mu jizhina janji bonse bamwitabila, bakatambula lulekelo lwa mambo.”

Bangentila byo batambwile Mupashi Wazhila

⁴⁴ Petelo byo akyambilenga bino byambo, Mupashi Wazhila wibekijiile bonse ba umvwine ano mambo.

⁴⁵ Ne boba ba mu mukanda baitabila, bonse mobavujila baishile ne Petelo, bakuminye mambo Mupashi Wazhila waitulwilwe wa bupetu, ne pa Bangentila.

⁴⁶ Mambo bebomvwine kasa bamba mu njimi ingi, ne kumutumbijika Lesa. Ponkapo aye Petelo wa ambile amba,

⁴⁷ “Lelo muntu akonshe kukanya mema, amba kechi babatizhiwe ne, bano batambula Mupashi Wazhila pamo ne atweba nyi?”

⁴⁸ Ne aye wibakambizhe amba babatizhiwe mu jizhina ja Yesu Kilishitu. Ne abo bamusashijile Petelo amba, “Twikale nenu moba amo.”