Byubilo 1 - KNTP

¹ Anweba Teofilusa, mu buku mutanshi mambo o nanembele, ajinga a byonse byo atatwile kuuba Yesu ne kufunjisha,

² kufika ne mu juba joatambwilwe mwiulu, byo apwishishe mu Mupashi Wazhila kwibakambizha batumwa boatongwele.

³ Boemweshesheko mumi pakupita kumanama kwanji mu biyukilo byavula, kasa amweka kwi abo moba makumi ana, kasa amba bya bufumu bwa Lesa.

⁴ Kabiji byo apwijilenga naabo pamo, wibakambizhe amba, “Kechi mufume mu Yelusalema ne, mupembele akya kyalayile Bataata, kyo mwaumvwine kwi amiwa.

⁵ Mambo Yoano kine wabatizhilenga na mema, pakuba anweba mukabatizhiwa na Mupashi Wazhila, bino kechi kwashala moba avula ne.”

Kutwalwa kwa Yesu mwiulu

⁶ Ponkapo abo, byo bapwijile pamo, bamwipwizhe amba, “Nkambo, musakubwezha bufumu kubena Isalela mu kyonka kino kimye nyi?”

⁷ Kumvwa aye wibambijile amba, “Kechi kyo kyenu kya kuyuka bimye nangwa moba, byo belamina bene bataata na luusa lwabo ne.

⁸ Pakuba anweba mukatambula bulume, byo ake mwikijila Mupashi Wazhila, kepo mukekala batumonyi bami ba kunshimuna mu Yelusalema, ne monse mu Yudea, ne mu Samaliya, ne monse mwapela ntanda.”

⁹ Kabiji byo a ambile bino, abo kasa bamutala, watwajilwe mwiulu ne jikumbi jamutambwile ne kumuzhita ku meso abo.

¹⁰ Byo bakitajilenga mwiulu aye kasa aya, talai banabalume babiji baimene kobaji mu bivwalo bitoka,

¹¹ ne kwamba amba, “Anweba bena Ngalilea, mambo ka o mwaimena na kutala mwiulu? Uno Yesu, watambulwa mwiulu kufuma kwi anweba, ukeya pamo byonkabye byo mwamumona kasa aya mwiulu.”

Wa kupingakena pa kifulo kya kwa Yudasa

¹² Ponkapo babwelele ku Yelusalema, kufuma ku mutumba yebatela amba wa Maolivi, ye uji kwipi na Yelusalema, pa lwendo lwa juba jimo ja Sabado.

¹³ Kabiji byo batwelele, bakanjijile mu nzubo ya peulu, mobaikajile ba Petelo, ne Yoano, ne Yakoba, ne Andeleo, ne Filipa, ne Tomase, ne Batolomo, ne Mateo, ne Yakoba mwana Alefesa, ne Shimona Muzelote, ne Yudasa mwana Yakoba.

¹⁴ Abano bonse bakoseletu na muchima umo mu milombelo pamo na banabakazhi, ne Maliya inanja Yesu, ne balongo banji.

¹⁵ Mu oa moba Petelo waimene mukachi ka balongo banji, kwajinga jibumba ja bantu bapwijile pamo, bafikile kampe kitoota kimo ne makumi abiji, ne kwamba amba.

¹⁶ “Anweba bakwetu, kyafwainwe kufika akya kinembelo kyo a ambijile jimo Mupashi Wazhila mu kanwa ka Davida, na mambo a Yudasa, yenkaye watangijile bamukwachile Yesu,

¹⁷ Mambo wabajilwe pamo ne atweba, kabiji watambwile mwingilo wanji wa mu ino mingilo.”

¹⁸ (Bino uno wapotele bujimi na mfweto ya bubi bwanji, ne byo aponene kamfulamukonko, jivumo jasabikile ne mila yanji yonse yapokomokelemo.

¹⁹ Ne akyo kyayukanyikilwe ku bonse bangikazhi bamu Yelusalema, onkao mambo mu mulaka wabo abwa bujimi bebutelele amba, Akeladama, kulumbulula amba, “Bujimi bwa mashi.”)

²⁰ Mambo kyanembwa mu buku wa Masalamo amba, “Kifulo kyanji poaikajile paluke ke pamasala, Kechi pekale muntu nangwa umo ne. Kabiji amba, bukulumpe bwanji ungi ebuje.”

²¹ “Onkao mambo mu bano banabalume botwaendelenga naabo moba onse o twakijinga ne Nkambo Yesu,

²² kutatula ku lubatizhilo lwa Yoano kufika ne ku juba joatambwilwe mwiulu kufuma kwi atweba, kyafwainwa umo ekale kamonyi pamo ne atweba wa mu kusanguka kwanji.”

²³ Kepo batongwele babiji, Yosefwa jikwabo Basabasa, (jikwabo amba Yusitusa), ne Matiasa.

²⁴ Ponkapo balombele amba, “Anweba Nkambo, mwayuka michima ya bantu bonse, mwitubuule pa bo bano babiji ye mwasalulula,

²⁵ wa kupingakena mu uno mwingilo, ne mu butumwa, moafumine Yudasa, ne kuya kwa mufwainwa mwine.”

²⁶ Ponkapo bebatayijile bubale, ne bubale bwakwachile Matiasa, ne aye wabajilwe pamo na batumwa jikumi na umo.