Bahebelu 9 - KNTP

Bupopweshi bwa panontanda ne bwa mwiulu

¹ Pano ne lulayang'ano lutanshi nalo lwajinga na byatongolwa bya bupopweshi ne nzubo yazhila ya pano pantanda.

² Mambo kwajinga Tente wabikijilwemo jimo byonse, mukibamba kitanshi kya ku kibelo mo mwajinga kitulwapo lampi ne tebulu ne shinkwa wa ku meso a Lesa. Mo mwatelelwe amba Mwazhila.

³ Pa kupitaila kipembe kya bubiji ke mukibamba kyatelelwe amba Mwazhijisha.

⁴ Mo mwajinga kyakusokelapo bya kufutumuna kya ngolode ne jikwachi jazhila ja lulayang'ano jo babambikapo ngolode jonsetu, mo mwajinga kapuki ka ngolode mwajinga manna, ne mukombo wa kwa Alona yenka wasapukile, ne mabwe apapakana a luyang'ano.

⁵ Peulu yajo pajinga ba kelubi ba lukumo kasa banyeng'amina pa kya kufuchilapo mambo. Mambo a bino bintu kechi twakonsha kwiamba pano pa kintu pa kintu ne.

⁶ Bino byajinga bya nengezhiwa jimo. Bang'anga batwelelenga moba onse mutente mutanshi kasa bengila mingilo yabo,

⁷ pakuba mu wa bubiji kanatu ng'anga mukatampe bunke bwanji ye watwelangamo jimotu pa mwaka pa mwaka. Nakyo kechi kwakubula mashi ne, o alambwile pa mambo anji aye mwine, ne pa mambo a bubi bwa bantu bwa kubula kuyuka.

⁸ Mukino momo etubujila Mupashi wa Wazhila amba jishinda ja kutwelelamo mwazhila jajinga jikyangye kusololwa byo akijingapo awa Tente mutanshi.

⁹ Kino kyajinga kifwanyikizho kya kino kimye kya katataka. Mwayila kuno kunengezha, bya bupe ne bitapisho bya lambwilwenga na bang'anga, kechi bya koshenshe kutokesha muchima wa yewa upopwela ne,

¹⁰ mambo byayijile mu bya kuja ne mu bya kutoma ne mu bya kwiovwa kwa misango ne misango. A bino byajinga mizhilo ya pangye ya mubiji, yapainwe poso mwaka wa bikwabo bipya akafike.

¹¹ Bino Kilishitu wamwekele ke Ng'anga Mukatampe wa bintu byawama byaiya. Ubena kwingijila mutente wakila bukata ne kulumbuluka; kechi walengwa na maboko ne, kokuuba amba kechi walengwa pamo na bya panontanda ne.

¹² Aye watwelele jimo jonka kikupu amwa Mwazhijisha kechi na mashi a bambuzhi ne a twana twa ng'ombe ne, poso na mashi anji mwine, ne kwitumwena bukuuzhi bwa myaka.

¹³ Mambo umvwe mashi a bambuzhi ne bang'ombe balume ne buto bwa ng'ombe mukazhi pa kwibisansa pa bazhilulula mizhilo bibazhijika ke batoka pa mibiji yabo.

¹⁴ Nanchi mashi a Kilishitu yenka wilambwile mwine kwi Lesa mu Mupashi wa myaka kasa abula bulema akakijishamo kwiitokesha michima yetu ku mingilo ifu amba tumwingijile Lesa mumi.

¹⁵ Onkao mambo aye ye ng'ambi waleeta lulayang'ano lupya amba, abo baitwa batambule bonkabwa buswanyi bwa myaka bwalayilwe. Mambo lufu lwamweka lwa kwibakuula ku mizhilulwila yo bazhilulwile mu lulayang'ano lutanshi.

¹⁶ Mambo mwayila mulaye wa muntu wafwa, lufu lwa yewa wamulayile lwafwainwa kuyukanyikwa ku bonse.

¹⁷ Mambo mulaye wa muntu wafwa wikala na bulume pakufwa awa wamulayile. Mambo mulaye kechi wikala na luusa byo akiji mumi mwine mwina mulaye ne, wikalatu na luusa kana wafwa.

¹⁸ Onkao mambo ne alwa lulayang'ano lutanshi nalo kechi lwaikajikilweko kwakubula mashi ne.

¹⁹ Mambo mikambizho yonse byo beyambile kwi Mosesa ku bantu bonse monka mwayila Mizhilo, aye washikwile mashi a baana bang'ombe ne a bambuzhi, ne kuvwanga na mema ne boya bwachijisha bwa mikooko, ne isopi ne kusansa pa buku mwine ne pa bantu bonse.

²⁰ Ne kwamba amba, “Ano o mashi a lulayang'ano o akambizhe Lesa kwi anweba.”

²¹ Ne Tente naye ne bijiilo byonse bya mwingilo wa bupopweshi nabyo wibisanshile mashi.

²² Kine mwayila Mizhilo pepi bintu byonse bitokeshiwa na mashi, kabiji pakubula kwichila mashi lulekelo lwa mambo kafwako.

Kitapisho kya Kilishitu kyo kifumya bundengamambo

²³ Byonkabyo kyafwainwe bifwanyikizho bya bintu bya mwiulu kwibitokesha mu joja jishinda. Pakuba bintu bine bya mwiulu bikebewa bitapisho byawama kukila bibye.

²⁴ Mambo Kilishitu kechi watwelele Mwazhila mwalengwa na maboko ne, mwapashang'ana na mwa kine ne. Kana mwiulu mwine, mo etumwekela ku meso a Lesa.

²⁵ Nangwa kutwelamo amba elambule mwine javula nobe ng'anga mukatampe byo atwelanga mwazhijisha pa mwaka pa mwaka na mashi abula anji mwine ne,

²⁶ inge byo byo, kyamufwainwe amba amaname javula kufuma ku ntendekelo ya pano pantanda. Pakuba pano byo kiji bino, kuno kumpelo ya myaka aye wamweka jimo jonka na kufumya bundengamambo na kitapisho kya kwitapisha aye mwine.

²⁷ Kabiji byonka byo kibatongwelwa bantu kufwa jimo jonka bino palutwe kuya ku kije.

²⁸ Byonkabyo Kilishitu naye walambwilwe jimo jonka mu kusenda mambo a bavula. Ukamweka jibiji kechi na mambo a bundengamambo ne, poso na kuleeta lupulukilo kuboba babena kumutengela.