Bahebelu 8 - KNTP

Yesu ng'anga wetu mukatampe

¹ Kine kintu kikatampe kyo tubena kwamba kyo kino amba atweba tuji na Ng'anga Mukatampe, umo waikala ku kilujo kya jitanda ja Mfumu wa mwiulu.

² Wamwingilo wa mu nzubo yazhila, mutente wa kine, ye apopele Nkambo, kechi muntu ne.

³ Mambo yense ng'anga mukatampe utongolwa amba alambule bya bupe ne bitapisho; onkao mambo kyamufwainwa ne uno ng'anga amba ekale na kyakulambula.

⁴ Pano umvwe wajinga pano pantanda, aye inge kechi waikala ke ng'anga ne, mambo po baji bang'anga balambula bya bupe mwayila muzhilo.

⁵ Abo bengijila kifwanyikizho ne kimvule kya bintu bya mwiulu. Mambo Mosesa kasa akyangye kupopa tente, ba mwambijile kwi Lesa amba, “Tala, ulenge byonse monka mwayila akya kya kumwenako kyo bakumwesheshe pa mutumba.”

⁶ Pakuba pano Kilishitu watambula mwingilo wa wamisha wakila wa kala byonka biji lolwa lulayang'ano loaleeta lwakila lolwa lwakala, mambo lwalayilwe na milaye yawamisha.

⁷ Mambo inge alwa luyang'ano lutanshi lwajinga lwalumbuluka, inge kechi pasakiiwe kwikajikwa lukwabo lwa bubiji ne.

⁸ Mambo pa kwibalengulula na mambo abilubo byabo aye wa ambile amba, “Talai moba abena kwiya, byo byaamba aye Nkambo amba, amiwa nkalenga lulayang'ano lupya na ba mu kikota kya Isalela ne na ba mu kikota kya Yuda.

⁹ Kechi lukekala nobe lolwa lulayang'ano lo nalayang'ene na bashakulu babo mu joja juba jo ne bakwachile pa kuboko byo ne bafumishe mu ntanda ya Ijipita ne. Mambo abo kechi bakelelwe mu lulayang'ano lwami ne, ne amiwa kechi ne bateele muchima ne. Byo byaamba Nkambo.

¹⁰ Mambo luno lo lulayang'ano lo nkalenga na ba mu kikota kya bena Isalela mu oa moba, byo byaamba aye Nkambo. Amiwa nkabika Mizhilo yami mu milangwe yabo ne kwiinemba pa michima yabo. Amiwa nkekala ke Lesa wabo, ne abo bakekala ke bantu bami.

¹¹ Kabiji kechi bakefunjishanga bene na muntu mo bekela ne, nangwa na mulongo amba ‘yukai Nkambo’ ne. Mambo bonse bakangyuka amiwa, kufuma ku mucheche mwine kufika ne ku mukatampe wakila.

¹² Mambo amiwa nkebobila lusa pa bubi wabo, ne mambo abo kechi nkeavuluka jibiji nangwa pachechetu ne.”

¹³ Byo a amba pa lulayang'ano lupya, waalula lutanshi ke lwakala. Ne alwa lwakala lwakota ne kala ke luji pepi na kuzhimang'ana.