Bahebelu 7 - KNTP

Ng'anga Melekizedeke

¹ Mambo uno Melekizedeke wajinga mfumu wa Salema, ng'anga wa Lesa Mwine Wakila. Wasambakene ne Abulahama byo abwelelenga kufuma ko akatapile ba mfumu ne kumupesha,

² kabiji aye Abulahama wapaine byonse bifikizha bya bujikumi kwi aye. (Pa kulumbulula jizhina janji, patanshi ye “Mfumu wa bololoke,” kabiji wajinga mfumu wa Salema ko kuuba amba ye “Mfumu wa mutende.”)

³ Wabula kuyukanyikwa shanji nangwa inanji nangwa kisemi, wabulwa kuyukanyikwa kimye kya kusemwa kwanji nangwa kimye kya lufu lwanji. Wapashang'ana pamo na Mwana Lesa; ke ng'anga wa myaka ne myaka.

⁴ Mwamona bukata bwa uno muntu, Abulahama mushakulu ye apele byonse bifikizha mu bujikumi bya pa bipukulwa.

⁵ Kabiji ne aba ba mu baana ba kwa Levi batambula bung'anga, baji na mukambizho mu Mizhilo wakutambula bifikizha bya bujikumi ku bantu, ko kuuba amba kufuma ku balongo babo, nangwa nabo bo ba mukifuka kya kwa Abulahama.

⁶ Pakuba uno Melekizedeke wabujile kusemwa mu kisaka kya bena Levi watambwile bifikizha mu bujikumi kufuma kwi Abulahama ne kumupesha, aye wajinga na milaye.

⁷ Kwa kubula kuzhinauka, mucheche ye upeshiwa ku mukatampe.

⁸ Pano bantu bafwa bo batambula bifikizha mu bujikumi; pakuba akwa umo watambwile, yebashimuna amba, mumi.

⁹ Kabiji umo wakonsha ne kwamba amba, Levi (aye mwine utambula bifikizha mu bya bujikumi) wapaine kupichila mwi Abulahama.

¹⁰ Mambo Levi wakijinga mukifuka kya mushakulu wanji byo asambakene nanji Melekizedeke.

¹¹ Pano umvwe kulumbuluka kwamwekele kupichila mu bung'anga bwa bena Levi, mambo mwi abo momo batambwijile Mizhilo, kechi kyasakiwe amba ng'anga mukwabo amweke wa mwayila musango wa bung'anga bwa Melekizedeke, kechi wa musango wa kwa Alona ne.

¹² Mambo bung'anga byo bebupimpula mo mwafwainwa amba ne Mizhilo nayo ipimpulwe.

¹³ Mambo aye ye batongwela bino bintu wajinga wa mukoka ungi, mu yewa mukoka kafwako muntu nangwa umo waingijile ku kyakusokelapo bitapisho ne.

¹⁴ Mambo kyayukanyikwatu bulongo amba Nkambo yetu wasemenwe mu mukoka wa Yuda; kabiji na mambo a uno mukoka Mosesa kechi wa ambilepo nangwa kintu kimo kya bung'anga ne.

Ng'anga mukwabo, wapasha Melekizedeke

¹⁵ Kino kyamwekeshatu pakumweka ng'anga mukwabo mwayila kipasha kya Melekizedeke.

¹⁶ Wapewa bung'anga, kechi mwayila Mizhilo ya mikambizho ya ku buntunshi ne, poso mwayila bulume bwa bumi bubula kupwa.

¹⁷ Mambo kya mushimunwa amba, “Obewa wi ng'anga wa myaka, mwayila musango wa bung'anga bwa Melekizedeke.”

¹⁸ Ku lubaji lukwabo, awa mukambizho wa kala bamufumyapo mambo a kunekena kwanji ne kwikala wabula mwingilo.

¹⁹ Mambo Mizhilo kechi ya lengejile kintu nangwa kimo kwikala ke kyalumbuluka ne. Bino pano kwasoloka luketekelo lwakila mu kuwama lo tufwenyenyamo kwipi na Lesa.

²⁰ Kabiji kechi kyamwekele kwakubula luchipo ne. Bino abo batanshi bapelwe bung'anga pakubula luchipo.

²¹ Pakuba uno wapelwe bung'anga na luchipo kwi aye wa mwambijile amba, “Nkambo wachipa kabiji kechi ukaaluka ne. Obewa ukekala ng'anga wa myaka.”

²² Muno mo motwayukila amba tuji na lulayang'ano lwakila mu kuwama mwi Yesu.

²³ Ba ng'anga batanshi bajinga bavula, mambo lufu lwibakayinyenga kutwajijila myaka yonse mu mwingilo.

²⁴ Bino aye walama bung'anga bwanji kikupu, mambo aye ye wa myaka.

²⁵ Onkao mambo aye wakonsha kwi bapulusha kya kine abo bafwenya kwipi na Lesa mwi aye, mambo waikala myaka na kwibalombelela.

²⁶ Mambo kitufwanyijilwe atweba kwikala na ng'anga mukatampe wa byonkabyo wazhila, wabula mambo, wabula kuzhilululwa, waabana na bandengamambo kabiji wasuntulwa kukila mwiulu.

²⁷ Aye kechi kyamufwainwa kulambula bitapisho pa juba pa juba, patanshi kya na mambo a bubi bwanji mwine, kabiji ne na mambo a bubi bwa bantu pamo nobe aba bang'anga bakatampe bakwabo ne. Mambo kino wikyubile jimotu kwapwa, byo elambwile mwine.

²⁸ Mambo Mizhilo itongola bantutu banekena amba bekale bang'anga ba katampe, pakuba luchipo lwayishile panyuma ya Mizhilo lwatongwele Mwana, ye walumbululwa myaka yonse.