Bahebelu 6 - KNTP

¹ Onkao mambo nanchi tuleke mafunjisho atanshi a pa bintu bya Kilishitu, tuyenga kulutwe tufike ku bukulumpe. Kechi twale jibiji kitendekesho kya lulapilo lwa ku mingilo ifu nangwa kya lwitabilo lwa kwi Lesa ne;

² nangwa kya mafunjisho a lubatizhilo ne bya kutenteka maboko, bya lusanguko lwa bafu, ne bya luzhachisho lwa myaka ne.

³ Kabiji byobyo tukooba inge Lesa waswa.

⁴ Mambo kechi kyakonsheka kwibabwezha amba balapile jibiji aba batambwile kala kyeya, ne kutompako ku kya bupe kya mwiulu, ne kutambulako Mupashi wa Wazhila;

⁵ ne kutompako ku buwame bwa mambo a Lesa ne ku bulume bwa myaka ikeya.

⁶ Kabiji umvwe ba pondoka! Kechi kyakosheka kwibabwezha jibiji ku lulapilo ne, mambo babena kumupopa pa musalabu jibiji Mwana Lesa, ne kumumwesha bumvu patoka.

⁷ Mambo mushiji watoma mvula wamunokela javula ne kumenesha kajo kafwainwa ku bamujimine, utambula mapesho kwi Lesa.

⁸ Pakuba umvwe wamenesha miba ne bincha, waikala ke watu kabiji uji pepi na kufingwa, ne mpelo yanji ke kusokwa.

⁹ Bino anweba batemwe nangwa twa amba byo byo, twaketekela kwi anweba byonka byawama byenda na lupulukilo.

¹⁰ Mambo Lesa kechi wabula koloka amba avulame mwingilo wenu ne butemwe bo mwijimwesha jizhina janji byo mwibengijilenga bazhijikwa banji ne. Bino ne pano mukibengijila byonkabyo.

¹¹ Kabiji twasaka namba anweba bonse pa muntu pa muntu mumweshe lonkalwa lupata lumo mulumbulule luketekelo lwenu kufika ne kumpelo.

¹² Kechi mube mukose ne, poso kulondela bonkaba baswana milaye monka mu lwitabilo ne mu butekanye.

Mulaye wa Lesa waketekelwa

¹³ Mambo Lesa byo alayile Abulahama, byo kwabujile mukwabo wamukila wa kuchipa, wichipile aye mwine.

¹⁴ Amba, “Kine, nkakupesha kabiji nkakuvuzha.”

¹⁵ Kabiji aye Abulahama byo atekenye watambwile mulaye.

¹⁶ Mambo bantu bachipa awa wibakila, ne mu kupachika kwabo konse luchipo lo lupwisha lupata.

¹⁷ Ne aye Lesa byo asakile kwibamweshatu bulongo banswanyi bamulaye amba poso akafikizhe mulaye ye alayile, wachipile luchipo.

¹⁸ Nanchi kuji bintu bibiji bibula kwaluka, mo abujila kuyuka Lesa kubepa. Atweba twanyemena mwa kupulukila twafwainwa kwikala na lutundaiko lwakosa ne kukwachisha ku luketekelo lwitutujilwa kumeso etu.

¹⁹ Tuji na kino nobe kine kintu kyakosa kya mu muchima. Luketekelo lwakutwela kunyuma ya kipembe.

²⁰ Moetutwelela kala Yesu, byo aikala ke Ng'anga mukatampe wa myaka mwayila musango wa bung'anga bwa kwa Melekizedeke.