Bahebelu 5 - KNTP

¹ Mambo yense ng'anga mukatampe byo apatulwa mu bantu watongwelwa kwimenako bantu mu bintu bya kwa Lesa, amba alambule bya bupe ne bitapisho bya bubi.

² Wakonsha kwibatekenya bulongo aba babula kuyuka ne baya mungi, mambo ne aye mwine kunekena ko kwanji.

³ Mambo a kino aye kyamufwainwa amba alambule kitapisho kya mambo a bubi bwanji byonka byo ebalambwila bantu na mambo abo.

⁴ Kabiji kafwako muntu nangwa umo wipa aye mwine buno buneme ne, bino kana bamwita kwi Lesa byonka byo bamwichile Alona.

⁵ Byonkabyo ne Kilishitu naye kechi witumbijikile aye mwine amba ekale ng'anga mukatampe ne, bino watongwelwe kwiyewa wa mwambijile amba, “Obewa wi Mwanami; ja lelo jino jo nakusema.”

⁶ Byonka byo a amba ne pakwabo amba, “Obewa wi ng'anga wa myaka, monka mwayila musango wa kwa Melekizedeke.”

⁷ Yesu mu moba anji a bu muntu walombele milombelo ne misanshijilo na kujila kukatampe na mipolo, kwi aye wakonsheshe kumupulusha ku lufu. Kabiji aye ba mumvwine na mambo a kwakamwa Lesa kwanji.

⁸ Nangwa aye wajinga Mwana, wafunjile lukookelo kupichila mu byo amanamine.

⁹ Kabiji byo alumbulwilwe, waalukile ke mwine wa lupulukilo lwa myaka ku bonse bamukookela.

¹⁰ Kabiji bamutongwele kwi Lesa amba, ng'anga mukatampe wa mwayila musango wa Melekizedeke.

Bya kwi bajimuna na mambo a lwitabilo lwabo

¹¹ Na mambo a kino, tuji na byavula bya kwamba, bino kyakatazha kwibilumbulula, byo muji bantu ba banda kumvwa.

¹² Nangwa pa kino kimye mwaji kufwainwa kwikala bafunjishi, bino mu kisaka jibiji muntu wa kwi mufunjisha bya bwanyike bya ntendekelo ya byambo bya Lesa. Mwa aluka ke bafwainwa mukaka, kechi kajo kakosa ne.

¹³ Mambo bonse baja mukaka bakyangye kwiayuka bulongo mambo a bololoke, mambo bo balukeke.

¹⁴ Bino kajo kakosa koka bakoma, bo baji na maana alumbuluka a kupima ne kuyuka byawama ne byatama mambo akupijilwa nabyo.