Bahebelu 4 - KNTP

¹ Onkao mambo, byo tukiji na mulaye wakutwela mwanji mwakukokolokela, nanchi tube moyo kuchiina amba nangwa umo wakakankalwa kufikamo.

² Mambo ne atweba twaumvwine Mambo Awama byonka byo aishile kwi abo. Bino byambo byo ba umvwine kechi bamwenejilemo kintu ne, mambo kechi asambakene na lwitabilo mwi abo beomvwine ne.

³ Mambo atweba twaitabila tutwela mutanda ya kukokoloka monka mo a ambila amba, “Monka mo nachipijile mu bukaji bwami, Kechi bakatwela mu ntanda ya kukokolokelamo ne!” Nangwa mingilo yanji yapwile kuntendekelo ya pano pantanda.

⁴ Mambo wa amba mu binembelo pamo na mambo a juba ja butanu na bubiji byonka bino amba, “Ne Lesa wakokolokele mu juba ja butanu na bubiji ku mingilo yanji yonse.”

⁵ Kabiji kubwezhapo byambo bimo byaambiwa kala amba, “Kechi bakatwela mutanda yami ya kukokolokelamo ne.”

⁶ Byonkabyo kwi boba bobasapwijile kala Mambo Awama bakankelwe kutwelamo na mambo amilengulwila. Onkao mambo bamo bakwabo bakonsha kutwela monka.

⁷ Kabiji aye Lesa watongwele juba jikwabo amba, “Ja lelo,” wa ambile kupichila mwi Davida pakupita myaka yavula, monka motwajikwambila kala amba, “Ja lelo umvwe mwaumvwa jiwi janji, kechi mukoseshe michima yenu ne.”

⁸ Umvwe Yoshua wibapele mwakukokolokela, Lesa inge kechi wa ambile palutwe na mambo a juba jikwabo ne.

⁹ Byonkabyo kukokoloka kwa Sabado kwibashajila bantu ba Lesa.

¹⁰ Mambo aye watwela mutanda ya kukokolokelamo ya kwa Lesa, ye wakokoloka ku mingilo yanji byonka byo akokolokele Lesa ku mingilo yanji.

¹¹ Onkao mambo tuteshekotu muchima amba tutwele muyoya ntanda ya kukokolokelamo, kuchiina amba nangwa muntu umo wakaponena mumusango umo wamilengulwila.

¹² Pakuba mambo a Lesa o omi ne kwingila engila, atwisha kukila mapoko onse atwa kubiji, kabiji asaba kufika ne kukwabanya kwa muchima ne mupashi, ne kwa manungi ne mikolokofwa, kabiji alondalonda ne kupima milanguluko ya mumuchima ne mo yayila.

¹³ Kabiji kafwako nangwa kilengwa kimo kyafyamika ku meso a Lesa ne, pakuba bintu byonse byasoloka patoka ku meso a yewa ye tukatotololako.

Yesu Ng'anga mwine mukatampe

¹⁴ Byo tuji na Ng'anga mwine mukatampe watwelele mwiulu, Yesu Mwana Lesa, tukwachishetu ku kwitabila kwetu.

¹⁵ Mambo kechi tuji na Ng'anga mukatampe wabula kukonsha kumvwa kunekena kwetu ne, kana umo waesekelwe mu mashinda onse pamo ne atweba, bino kechi walengele mambo ne.

¹⁶ Onkao mambo nanchi tufwenye kwipi konka ku jitanda ja bupe kasa twachinchika. Amba tutambule lusa ne kumona bupe bwa kwitukwasha mu kimye kya kupelelwa kwetu.