Bahebelu 3 - KNTP

Yesu wakila Mosesa

¹ Onkao mambo, anweba bakwetu bazhijikwa, bakutambulako pamo ku lwito lwa mwiulu kwi Lesa! Mulangulukai Yesu, aye mutumwa ne ng'anga mukatampe wa lwitabilo lo twaitabila.

² Wajinga wakishinka kwi aye wamutongwele, byonka byo ajinga Mosesa wakishinka mu nzubo yanji.

³ Mambo Yesu watelwa amba ye wafwainwa lukumo lwakila lwa Mosesa, pamo byonka biji ushimika nzubo uji na buneme bwakila bwa ine nzubo.

⁴ Mambo nzubo yonse kuji ne wiishimika, bino Lesa ye washimika bintu byonse.

⁵ Kabiji Mosesa wajinga wakishinka mu nzubo yanji nobe wamwingilo, amba ashimune bintu bikambiwa palutwe.

⁶ Bino Kilishitu ye wakishinka pa nzubo yanji byo aji Mwana. Kabiji atweba twi nzubo ya Lesa inge kine twakwachisha kuchinchika kwetu ne kwitotela mu luketekelo lwetu.

Kukokoloka kwa bantu ba Lesa

⁷ Onkao mambo byonka, byaamba Mupashi wa Wazhila amba, “Ja lelo umvwe mwaumvwa jiwi ja Lesa,

⁸ kechi mukoseshe michima yenu ne kukolomona bukaji, nobe joja juba ja lweseko mu kiselebwa ne.

⁹ Mo bangesekele bashakulu benu, nangwa bamwene mingilo yami myaka makumi ana.

¹⁰ Onkao mambo ne kizhingijile akya kisemi, kabiji na ambile namba, ‘Bakelwa kuya mungi mu michima yabo; kabiji kechi bayuka mashinda ami ne.’

¹¹ Byonkabyo nachipile mu bukaji bwami, namba ‘Kechi bakatwela mu ntanda ya kukokolokelamo ne!’”

¹² Anweba bakwetu jimukai, kuchiina amba mwi anweba mwakekala nangwa mu umo uji na muchima mubi wamilengulwila, wa kupondoka kwi Lesa mumi.

¹³ Bino kasa mwitundaika anweba bene na bene pa juba pa juba, ponka pano pakitelwa amba, “Ja lelo” kuchiina amba, nangwa umo wa mwi anweba bakamukosesha muchima ku bujimbijimbi bwa bundengamambo.

¹⁴ Mambo atweba twaikala ke ba kushilang'ana nanji pamo Kilishitu, umvwve twalama bulongo ntendekelo ya luketekelo lwetu kasa twakoselamo kufika ne kumpelo.

¹⁵ Kinembelo kyaamba amba, “Ja lelo umvwe mwaumvwa jiwi janji, kechi mukoseshe michima yenu nobe joja juba ja lweseko ne.”

¹⁶ Ng'anyi bantu baumvwine jiwi ja Lesa ne kumusatukila? Ke bonsetu aba boatangijile Mosesa pa kufuma mu Ijipita.

¹⁷ Kabiji ba ng'anyi ba muzhingijishe myaka makumi ana mungyetu? Ke bonkaba balengele mambo, ne mibiji yabo yaponene ne kufwila mungyetu.

¹⁸ Kabiji kwi bang'anyi koachipile amba “Kechi bakatwela mwa kukokolekela mwami ne”? Ke bonkaba bajinga ba milengulwila.

¹⁹ Pano twamona amba bakankelwe kutwela mutanda ya kukokolokelamo na mambo amilengulwila.