Bahebelu 2 - KNTP

Lupulukilo lukatampe

¹ Onkao mambo twafwainwa kuteshakotu muchima ku abya bintu byo twaumvwine, kuchiina amba twakakumpuka.

² Pakuba mambo o baambile bamalaika ajinga akine, ne mizhilulwila yonse nangwa milengulwila yatambwile mfweto yafwainwa.

³ Atweba tukapuluka byepi, umvwe twabula kutaako muchima ku luno lupulukilo lukatampe luji byonka bino? Lwa ambilwe patanshi kwi Nkambo, kabiji betulumbulwijile atweba kwi boba bamumvwine.

⁴ Lesa naye kasa ashimuna naabo na biyukilo ne bya kukumya ne bya bulume bya misango ne misango ne kupana bya bupe bya Mupashi wa Wazhila monka mwayila kyaswa muchima wanji mwine.

Witutangijila kulupulukilo

⁵ Lesa kechi wapana ku bamalaika bundamakyalo bwa pa ntanda ipya ikeya, yo tubena kwambaapo ne.

⁶ Pakuba byonka byo kyaambiwa mu byanembwa amba, “Muntu ye ng'anyi, byo mumulanguluka; nangwa mwana muntu byo mwamuta muchima?

⁷ Mwamupelwile kimye kicheche kukila bamalaika; Bino mwamuvwikile lukumo ne buneme,

⁸ kabiji mwamupele luusa lwa pa bintu byonse.” Kyaambiwa amba Lesa wamupele “luusa lwa pa bintu byonse;” kechi kwashajilepo nangwa kimo kyo abujile kwikalapo na luusa ne. Bino tukyangye kumona bintu byonse kasa byaikajikwa mu luusa lwanji.

⁹ Bino twamumona aye Yesu, ye bapelwile ka kimye kacheche kukila bamalaika, kasa avwikwa na lukumo ne buneme na mambo a lufu lo amanamine, amba monka mu bupe bwa Lesa ebatompele lufu bantu bonse.

¹⁰ Mambo kyamufwainwe aye Lesa, mulenga ne kalama wa bintu byonse, pakusaka kwibaleeta baana bavula mu lukumo, kumulumbulula ntangi wa lupulukilo lwabo na bya kumanama.

¹¹ Mambo aye wibazhijika ne abo bazhijikwa, kabiji aye ne abo bo a zhijika, bonse basemwa kwi shabo umo. Onkao mambo aye kechi uba bumvu pa kwibateela amba balongo banji ne.

¹² Amba, “Nkasolola jizhina jenu ku balongo bami; Nkemwimbila ya kwimutota mu kipwilo.”

¹³ Kabiji amba, “Nkaketekela mwi aye.” Kabiji amba, “Talai amiwa bano ne baana boampa Lesa.”

¹⁴ Mambo baana byo batambula mibiji ya mashi, byonkabyo ne aye mwine watambwile wa byonkabyo, amba monka mu lufu amonaune awa uji na bulume bwa lufu, ko kuuba amba Diabola,

¹⁵ ne kwibapokolola bonse bajinga mu buzha moba onse a bumi bwabo na mambo a kuchiina lufu.

¹⁶ Mambo kine kechi bamalaika bo bo ateshako muchima ne, bino aye watesha muchima kuba mukisemi kya kwa Abulahama.

¹⁷ Onkao mambo kyamufwainwe aye apashang'ane na balongo banji mu byonse, pakuba amba akekale ke ng'anga mukatampe wa lusa ne wakishinka mu bintu bya kwa Lesa, mu kufuchila mambo a bantu.

¹⁸ Kabiji aye wakonsha kwibakwasha aba baesekwa, mambo ne aye mwine wamanamine ne kwesekwa.