Bahebelu 13 - KNTP

Kumutokesha Lesa pa muchima

¹ Butemwe bwa kutemwa balongo bwikale kikupu.

² Kechi muvulame kutambwila benyi ne. Mambo mo monka bantu bamo mo batambwijile bamalaika kwakubula kuyuka.

³ Vulukai boba baji mu kaleya, nobe mwakaswa naabo pamo. Ne boba babena kumanyikwa, mambo ne anweba mukiji mu mibiji.

⁴ Masongola ekale a mushingi ku bonse, ne baji mu masongola bekale bakishinka mu masongola abo. Mambo Lesa ukebazhachisha ba bulalelale ne bankende.

⁵ Mwikale babula kutemwa mali, sekelai na byonka byo muji naabyo. Mambo aye mwine wa amba amba, “kechi nkakusha nangwa pachechetu ne, ne kukulekelela nangwa pachechetu ne.”

⁶ Onkao mambo twa amba na kuchinchika namba, “Nkambo ye nkwasho wami, kechi nkachiine ne. Muntu angubeka?”

⁷ Vulukai bajinga ba ntangi benu, bemusapwijile mambo a Lesa. Langulukai kumpelo ya bwikalo bwabo, ne kulonda lwitabilo lwabo.

⁸ Yesu Kilishitu ujitu pamo, kesha ne ja lelo, ne moba onsetu myaka ne myaka.

⁹ Kechi mutwalwe mungi ku mafunjisho a misango ne misango ne. Mambo kyo kintu kyawama amba muchima bamukoseshe na bupe, kechi na bya kuja ne; mambo abo bateele michima monka kechi bamwenejilemo kintu ne.

¹⁰ Atweba tuji na kyakusokelapo bitapisho kyo baabula luusa lwa kujako bengila mwingilo wa mutente wazhila.

¹¹ Mambo mibiji ya aba ba nyama ba oa mashi, obatwala mwine mwazhila ku ng'anga mukatampe na mambo a bubi, beisokela pangye ya nkambi.

¹² Byonkabyo Yesu naye wamanamijile pangye ya nkambi, byo asakile kwibazhijika bantu na mashi anji mwine.

¹³ Onkao mambo tulupukile ko aji pangye ya nkambi kasa twasenda mwenga wanji.

¹⁴ Mambo pano kechi tujipo na muzhi wa myaka ne, bino tubena kukeba yewa ukeya.

¹⁵ Monka mwi aye tuletenga kitapisho kya kutota Lesa moba onse, kokuuba amba bipangwa bya pa byatunwa byetu bitaba jizhina janji.

¹⁶ Kechi muvulame kuuba byawama, ne kukwasha bakajilwa ne, mambo bitapisho bya byonka bino byo bimutokesha Lesa pa muchima.

¹⁷ Kookelai ba ntangi benu ne kwibanekenena. Mambo abo babena kwimukenketela na mambo a kulama michima yenu, byo baketotolwela na mambo a ayo. Umvwe mwibakookela, bakengila mwingilo wabo na lusekelo, kuchiina amba bakooba mwingilo wabo na bulanda, mambo akyo kechi kikemuletela byawama ne.

¹⁸ Tulombelelai, mambo twaketekela kine namba tuji na jiwi ja mu muchima jibula kwituzhachisha, kasa tusaka kuuba bulongotu mu bintu byonse.

¹⁹ Kabiji ne musashijila kine namba mulombe kino, mbwezhiwe koko ko muji bukiji.

Milombelo ya kupezhako

²⁰ Pano aye Lesa wa mutende, yenka wamusangwile mu bafu Nkambo yetu Yesu, yenkawa waubile ke kafunga mukatampe wa mikooko na mambo a mashi anji, a lulayang'ano lwa myaka,

²¹ emupe bintu byonse byawama, mube kyaswa muchima wanji, kasa engila mwi atweba kyonka kyawama ku meso anji, monka mwi Yesu Kilishitu. Kwi aye kwikale lukumo myaka ne myaka! Amena.

Byambo bya kupezhako

²² Kabiji ne musanshijila anweba bakwetu, namba ntekenyai mu ano mambo akwimutundaika, mambo ne munembela byambo bicheche.

²³ Yukai amba mulongo wetu Timoti wafumamo mu kaleya. Umvwe waiya bukiji tukamonang'ana nenu pamo ne aye.

²⁴ Imunai bonse bemutangijila ne bazhijikwa bonse. Bafuma mu Italya bemwimuna.

²⁵ Bupe bwikale ne anweba bonse.